Read sango Awayango-sandaga 17 Bible Online

Awayango-sandaga 17 - sango bible

Awayango-sandaga 17

¹KOTA GBIA atene na Moïse:

²Mo tene na Aaron na amolenge ti lo nga na azo ti Israel kue, mo tene: yanga so KOTA GBIA amu ayeke so:

³“Tongana mbeni zo ti Israel aye ti fâ mbeni bagara, wala mbeni taba, wala mbeni ngasa na ya ti bâbâ wala na gigi ti bâbâ ni,

⁴alingbi lo gue na nyama ni kozoni na yanga ti da ti bongo so KOTA GBIA na azo ti lo ayeke wara tere daa. Lo yeke mu nyama ni na *sandaga na KOTA GBIA na dawa ti ndo so KOTA GBIA ayeke duti daa. Tongana lo sara tongaso pepe, fade ngbanga ti mene so lo tuku so ayeke ti na li ti lo si a yeke tumba lo na popo ti azo ti Israel.

⁵Ndia so ayeke kanga lege na azo ti Israel ti kiri ti fâ anyama na ya ti ngonda; me ala yeke gue na anyama ni na wayango-sandaga, na yanga ti da ti bongo so KOTA GBIA na azo ti lo ayeke wara tere daa. Ala yeke mu anyama ni na sandaga ti beoko na KOTA GBIA.

⁶Wayango-sandaga ayeke fi mene ni na tere ti gbalaka so ayeke na yanga ti da ti bongo so KOTA GBIA na azo ti lo ayeke wara tere daa. Na pekoni, lo yeke gbi akasa ti mafuta ni na ndö ti gbalaka titene fion ni anzere na KOTA GBIA.

⁷Tongaso si azo ti Israel ayeke kiri ti mu sandaga pepe na anzapa so akpa akoli-ngasa si ala yeke sara aye ti ndumba na ala so. Ndia so ayeke ngba kpu na kpu ndali ti azo ti Israel na *ahale ti ala.

⁸“Fade mo yeke tene nga na ala, mo tene: Tongana mbeni zo ti Israel, wala mbeni wande so aduti na popo ti ala aye ti mu sandaga so a yeke gbi ni kue na wâ wala mbeni sandaga nde,

⁹alingbi lo gue na nyama ni na yanga ti da ti bongo so KOTA GBIA na azo ti lo ayeke wara tere daa titene lo mu lo na sandaga na KOTA GBIA. Tongana zo ni asara tongaso pepe, fade a yeke tumba lo na ya ti bongbi ti azo ti Israel.

¹⁰“Tongana mbeni zo ti Israel, wala mbeni wande so ayeke duti na popo ti ala ate mene, ataa mara ti mene wa, fade mbi KOTA GBIA, mbi yeke ga na tere ti lo, mbi yeke zi lo na popo ti bongbi ti azo ti Israel.

¹¹Biani, fini ti ye so kue Nzapa asara ayeke na ya ti mene. KOTA GBIA laa amu na ala mene titene ala sara na kua na ndö ti gbalaka ti zi na siokpari na li ti ala. Biani, Nzapa ayeke zi siokpari na li ti azo na lege ti mene, ngbanga ti so fini ayeke na ya ni.

¹²Ndani laa mbi tene na azo ti Israel, mbi tene: ‘Alingbi mbeni zo oko na popo ti ala ate mene pepe, wala mbeni wande so aduti na popo ti ala ate nga mene pepe.’

¹³“Tongana mbeni zo ti Israel wala mbeni wande so aduti na popo ti ala ague ti gi nyama si lo fâ mbeni nyama wala mbeni ndeke so alingbi ti te ni tengo, alingbi lo yuru mene ni na sese si lo kanga sese na ndö ni.

¹⁴Biani, tongana mbeni ye ayeke na fini, fini ti lo ayeke na ya ti mene ti lo. Ndani laa KOTA GBIA atene na azo ti Israel: ‘Ye so kue ayeke na fini, fade ala yeke te mene ni pepe, ngbanga ti so fini ti ye ni ayeke na ya ti mene ti lo. Zo so ate mene ni, fade a yeke tumba lo na popo ti azo ti Israel.’

¹⁵“Tongana mbeni zo ti Israel wala mbeni wande ate kuâ ti nyama, wala nyama so mbeni sioni nyama asuru ya ti lo, fade lo yeke sukula abongo ti lo, lo yeke sukula ngu. Lo yeke ngba *sioni ngbii asi na lakui. Na pekoni, lo yeke kiri ti ga *nzoni.

¹⁶Tongana lo sukula abongo ti lo pepe, wala lo sukula ngu pepe, ngbanga ti sioni ti lo ayeke ti na li ti lo.”