Read sango Awayango-sandaga 2 Bible Online

Awayango-sandaga 2 - sango bible

Awayango-sandaga 2

¹“Tongana mbeni zo aye ti mu na *KOTA GBIA *sandaga ti ale ti kobe, alingbi lo mu farini, lo tuku mafuta daa si lo zia nga dukani daa.

²Na pekoni, lo gue na sandaga ni na awayango-sandaga, amolenge ti Aaron. Mbeni wayango-sandaga oko ayeke mu mbeni farini asi ya ti maboko ti lo, farini so a tuku mafuta daa si a zia dukani daa so, lo zö ni na ndö ti gbalaka; a iri sandaga ni sandaga ti dango be. So ayeke sandaga so a gbi ni kue na wâ titene fion ni anzere na KOTA GBIA.

³Tanga ti sandaga ni ayeke ga ti Aaron na amolenge ti lo; tanga ti sandaga ni ayeke nde si ayeke nzoni kue ahon atanga ni, ngbanga ti so alondo na lege ti sandaga so a gbi ni kue na wâ ndali ti KOTA GBIA.

⁴“Tongana mbeni zo aye ti mu sandaga ti mapa so a zö na ya ti fur, alingbi lo zia mama ni daa pepe. Lo lingbi ti ga na agatoo so a yoro na mafuta wala makara so a yoro na mafuta, me a sara na mama ti mapa pepe.

⁵Tongana sandaga ni ayeke mbeni sandaga so a zö na ya ti kpangbara sembe, alingbi lo mu farini, lo tuku mafuta daa, lo gbu ya ni, me lo zia mama ti mapa daa pepe.

⁶Lo fâ ya ni kete kete, lo tuku mafuta na ndö ni. So ayeke sandaga ti ale ti kobe laa.

⁷Tongana sandaga ni ayeke mbeni sandaga so a yoro na ya ti du ti sembe, alingbi zo ni amu farini, lo tuku mafuta daa si lo yoro na ni.

⁸Sandaga so zo ni aleke ndali ti KOTA GBIA so, lo yeke ga na ni na wayango-sandaga si wayango-sandaga ni ayeke gue na ni nduru na tere ti gbalaka.

⁹Wayango-sandaga ni ayeke mu mbeni mbage ti sandaga so a iri ni sandaga ti dango be so si lo yeke zö ni na ndö ti gbalaka. So ayeke sandaga so a gbi ni kue na wâ titene fion ni anzere na KOTA GBIA.

¹⁰Tanga ti sandaga ni ayeke ga ti Aaron na amolenge ti lo. So ayeke sandaga so a zia ni nde si ayeke nzoni kue ahon atanga ni, ngbanga ti so alondo na lege ti sandaga so a gbi ni kue na wâ ndali ti KOTA GBIA.

¹¹“Sandaga ti ale ti kobe so kue ala yeke mu na KOTA GBIA, alingbi ala zia mama ti mapa daa pepe. Biani, fade ala yeke mu mama ti mapa, wala mafuta ti wotoro ti zö na mapa ti mu na sandaga na KOTA GBIA laoko pepe.

¹²Tongana akobe ni so ayeke akozo le ti kobe, ala lingbi ti mu na sandaga na KOTA GBIA senge. Me alingbi ti gbi akobe ni na wâ na ndö ti gbalaka pepe titene fion ni anzere na KOTA GBIA.

¹³“Asandaga so kue ala yeke mu ni, fade ala yeke zia ingo daa. Ala girisa ti zia ingo daa laoko pepe, ngbanga ti so ingo ni ayeke tongana mbuki so ayeke na popo ti ala na Nzapa. Nilaa, na ya ti asandaga ti ala kue, fade ala yeke zia ingo daa.

¹⁴“Tongana ala ye ti mu akozo le ti kobe ti yaka ti ala na sandaga na KOTA GBIA, fade ala yeke to nda ti yoro ale ti kobe ni na wâ; na pekoni, ala yeke nika ni. Na ndembe so ala yeke ga na ni,

¹⁵fade ala yeke tuku mafuta daa si ala yeke zia dukani daa. So ayeke sandaga ti ale ti kobe laa.

¹⁶Na pekoni, wayango-sandaga ayeke zö sandaga so a iri ni sandaga ti dango be so, so ti tene ale ti kobe kete, mafuta kete na dukani ni kue. So ayeke sandaga so a gbi ni kue na wâ ndali ti KOTA GBIA.