Read sango Awayango-sandaga 26 Bible Online

Awayango-sandaga 26 - sango bible

Awayango-sandaga 26

¹“Ala sara ayanda pepe, ala sara limo ti mbeni nzapa wala mbeni ngbongboro têne so aluti na nduzu ndali ti ala wani pepe. Atêne so a de alimo na tere ni, ala zia ni na ya ti kodro ti ala pepe, ala kuku, akpo li ti ala na sese na dawa ni pepe. Biani, mbi laa mbi yeke KOTA GBIA, Nzapa ti ala.

²“Alingbi ala bata *lango ti wungo tere, ala ne ndo so a zia nde ndali ti mbi. Mbi laa mbi yeke KOTA GBIA.”

³“Tongana ala sara ye alingbi na andia ti mbi, tongana ala bata atënë ti ndia ti mbi si ala sara ye alingbi na ni,

⁴fade mbi yeke tokua na ala ngu-Nzapa na ngoi ni so alingbi. Tongaso sese ayeke du ale ti kobe si akeke ayeke du alengo ni.

⁵Na ndo ti ala, fade ala yeke ngba ti pika ale ti kobe ngbii asi na ngoi ti fango ale ti *vinye; ala yeke ngba ti fâ ale ti vinye ngbii asi na ngoi ti lungo ale ti kobe. Ala yeke te kobe, ya ti ala asi si mbeni ye ti sioni ti sara ala ayeke daa pepe.

⁶Mbi yeke zia siriri na ya ti kodro ni. Tongana ala yeke lango, mbeni ye oko ti zia mbeto na be ti ala ayeke daa pepe. Mbi yeke hunzi asioni nyama kue na ya ti kodro ni. Azo ayeke kiri ti tiri bira na ala pepe.

⁷Ala yeke tumba peko ti awato ti ala si ala yeke fâ ala na ya ti bira.

⁸Azo oku na popo ti ala ayeke tumba peko ti awato ngbangbo oko; azo ngbangbo oko ayeke tumba peko ti awato saki baleoko si ala yeke fâ awato ni na ya ti bira.

⁹Mbi yeke ga na mbage ti ala ti sara nzoni be na ala; mbi yeke sara si ala du mingi, mbi yeke sara si ala wu mingi; mbi yeke bata lege ti *mbuki ti mbi na ala.

¹⁰Ala yeke fâ gba ti ale ti kobe, ala yeke te ni ngbii aninga. Ataa angbene le ti kobe so ala bata ni, ala yeke sigigi na ni ti zia ndo na afini ni.

¹¹Fade mbi yeke zia da ti mbi na popo ti ala; mbi yeke ke ala pepe.

¹²Mbi yeke tambula na popo ti ala; mbi yeke duti Nzapa ti ala si ala yeke duti azo ti mbi.

¹³Mbi laa mbi yeke KOTA GBIA, Nzapa ti ala. Mbi mu ala na sese ti Ezipte, mbi sigigi na ala titene ala kiri aduti ngbaa ti azo ti Ezipte pepe. Mbi zi ala na gbe ti ngbaa titene ala tambula li ti ala na nduzu.”

¹⁴“Tongana ala ma yanga ti mbi pepe, tongana ala sara ye alingbi na atënë ti yanga ti mbi so kue pepe,

¹⁵tongana ala ke andia ti mbi, tongana ala ke lege ti asarango ye so mbi fa na ala si ala sara ye alingbi na atënë ti yanga ti mbi pepe, tongana ala buba ya ti mbuki ti mbi,

¹⁶baa ye so mbi yeke sara ande na ala ayeke so: “Fade mbi yeke tokua na ndö ti ala akota kpale: ala yeke nge ngengo, kobela ti wâ ti tere ayeke sara ala; akobela ni ayeke vuko le ti ala si ayeke woko ala. Ala yeke lu ale ti kobe senge senge, awato ti ala laa ayeke te ni.

¹⁷Fade mbi yeke ga na tere ti ala; awato ti ala ayeke kinda ala. Azo so ake ala ayeke ga ti sara komandema na ndö ti ala; ti ala, ala yeke kpe, ataa so mbeni zo atumba peko ti ala pepe.

¹⁸“Na peko ti aye so kue, tongana ala ma yanga ti mbi pepe, fade mbi yeke kiri ti pika ala ngangu fani mbarambara ndali ti asiokpari ti ala.

¹⁹Ngangu so ala yeke sara na baba so, fade mbi yeke buba ni; mbi yeke sara si le ti nduzu akpengba na ala tongana wen si sese ti ala ayeke kpengba tongana bengba wen.

²⁰Ala yeke hunzi ngangu ti ala na sarango kua senge senge; sese ti ala ayeke du ale ti kobe oko pepe, akeke ti kodro ni ayeke du alengo ni oko pepe.

²¹“Tongana ala ngba ti sara ngangu li na mbi si ala ke ti ma yanga ti mbi, fade mbi yeke kiri ti pika ala ngangu fani mbarambara ndali ti asiokpari ti ala.

²²Mbi yeke tokua anyama ti ngonda na tere ti ala; anyama ni ayeke fâ amolenge ti ala, ala yeke hunzi anyama ti ala, anyama ti ngonda ni ayeke fâ ala kue si alege ti ala ayeke ga ngonda.

²³“Tongana ala yeda na apika ti mbi ni pepe si ala ngba ti sara ngangu li na mbi,

²⁴fade mbi nga, mbi yeke sara ngangu li na ala, mbi yeke kiri ti pika ala fani mbarambara ndali ti asiokpari ti ala.

²⁵Ndali ti mbuki ti mbi so ala buba ni, fade mbi yeke tokua bira na tere ti ala, ala yeke honde tere ti ala na ya ti agbata ti ala, me mbi yeke tokua sioni kobela ti bubango kodro na tere ti ala si mbi yeke zia ala na maboko ti awato ti ala.

²⁶Mbi yeke gbanzi na ala kobe; awali baleoko alingbi ti to kobe ti ala na ya ti duke oko; awali ni ayeke mu kobe ni gi kete kete ti ga na ni na ala, ala yeke te ni, me ya ti ala ayeke si pepe.

²⁷“Na peko ti aye so kue, tongana ala ma yanga ti mbi pepe si ala ngba ti sara ngangu li na mbi,

²⁸fade mbi nga, na sioni ngonzo na be ti mbi, mbi yeke sara ngangu li na ala; mbi wani, mbi yeke kiri ti pika ala fani mbarambara ndali ti asiokpari ti ala.

²⁹Ala yeke te kasa ti tere ti amolenge ti ala ti koli na ti amolenge ti ala ti wali.

³⁰Ando so ala leke na ndö ti ahoto ti voro anzapa nde daa so, mbi yeke buba ni. Agbalaka so ala yeke zö dukani na ndö ni so, mbi yeke kungbi ni na sese; mbi yeke bongbi kuâ ti ala na ndö ti afango yanda ti ala; fade mbi yeke ke ala.

³¹Mbi yeke buba agbata ti ala kue, mbi yeke sara si ando ti vorongo anzapa ti ala aga ngonda; *asandaga ti ala so ala yeke ya na mbi, mbi yeke kiri ti ma fion ni pepe.

³²Mbi wani, mbi yeke sara si kodro ti ala aga ngonda, awato ti ala so ayeke ga ti duti daa, li ti ala kue ayeke kpe.

³³Ti ala, mbi yeke tokua bira na tere ti ala si mbi yeke sara titene ala kangbi na popo ti amara nde. Kodro ti ala ayeke ga ngonda si agbata ti ala ayeke buba kue.

³⁴“Tongaso, na ya ti angu so kue ala yeke ngba na kodro ti awato ti ala, fade sese ti ala so aga ngonda so ayeke wu tere ti lo. Sese ni ayeke wu tere ti lo, ngbanga ti so na ya ti ngoi so ahon, ala wu tere ti ala pepe.

³⁵Na ndembe so ala yeke lango lani na ya ti kodro ni, sese awu tere ti lo pepe. Me na ngoi so kue sese ni aga ngonda, sese ni ayeke wu tere ti lo.

³⁶“Ti azo so ayeke na popo ti ala si ayeke ngba na fini na kodro ti awato ti ala, mbi yeke sara si ala woko kue. Gi toto ti kugbe so ati na sese ayeke sara si ala kpe. Ala yeke kpe, mo baa mo tene, awato laa ayeke tumba peko ti ala na yongoro zeme. Ala yeke ti na sese, ataa so zo oko atumba peko ti ala pepe.

³⁷Ala yeke ti na sese na ndö ti tere tongana ti so zo ayeke kpe na dawa ti wato, ataa so zo oko ayeke tumba peko ti ala pepe. Ala lingbi ti gbu le ni na awato ti ala pepe.

³⁸Ala yeke kui na kodro wande, sese ti awato ti ala si ayeke mene ala.

³⁹Azo so ayeke na popo ti ala si ayeke ngba na fini na kodro ti awato, fade ala yeke nge ngengo ndali ti siokpari ti ala wani, nga ndali ti siokpari ti akotara ti ala.”

⁴⁰“Me azo so ayeke ngba na fini, fade ala yeke fa na gigi sioni ti ala na ti akotara ti ala. Ala yeke tene: ‘E sara ye so ayeke sioni mingi ti ke KOTA GBIA, e sara ngangu li na lo.’

⁴¹Tongaso, ala yeke hinga atene, mbi nga, mbi sara ngangu li na ala si mbi tokua ala na kodro ti awato ti ala. Mbeni lâ, tongana ala fâ be ti ala na *ganza si ala sara tere ti ala kete, ala yeda titene mbi pika ala ndali ti sioni ti ala,

⁴²fade mbi yeke dabe ti mbi na *mbuki so mbi sara na akotara ti ala: Jacob, Isaac na Abraham. Mbi yeke dabe ti mbi nga na zendo so mbi mu ndali ti kodro ti ala.

⁴³Tongaso, na ngoi so kue, azo ni ayeke zia sese ti ala, sese ni ayeke wu tere ti lo. Na ndembe so sese ni ayeke ga ngonda, ala yeke yeda titene a pika ala, ngbanga ti so ala ke ti sara ye alingbi na andia ti mbi, ala ke lege ti asarango ye so mbi fa na ala.

⁴⁴Me ataa so kue, tongana ala yeke na kodro ti awato ti ala, mbi yeke ke ala biani biani pepe, be ti mbi ayeke ke ala pepe, mbi yeke hunzi ala pepe, mbi yeke buba tënë ti ya ti mbuki na ala pepe. Biani, mbi laa mbi yeke KOTA GBIA, Nzapa ti ala.

⁴⁵Biani, ndali ti nzoni ti ala, mbi yeke dabe ti mbi na mbuki so mbi sara ando na akotara ti ala; akotara ti ala so mbi mu ala na sese ti Ezipte, mbi sigigi na ala na le ti amara nde titene mbi ga Nzapa ti ala. Mbi laa mbi yeke KOTA GBIA.”

⁴⁶So ayeke ambela, lege ti asarango ye nga na andia so KOTA GBIA alu na popo ti lo na azo ti Israel laa; lo mu na ala na lege ti Moïse na li ti hoto ti Sinai.