Read sango Awayango-sandaga 4 Bible Online

Awayango-sandaga 4 - sango bible

Awayango-sandaga 4

¹*KOTA GBIA atene na Moïse

²ti tene na azo ti Israel, atene: “Tongana mbeni zo asara siokpari na mbana ti be ti lo pepe, tongana lo sara ye so ndia ti KOTA GBIA ake ni, ye so a lingbi ti sara ndali ti zo ni ayeke so:

³“Tongana kota wayango-sandaga laa asara siokpari si ndali ti siokpari ti lo tënë aga na li ti azo, alingbi lo ya na KOTA GBIA *sandaga ti koli-bagara so mbeni mbage ti tere ti lo abuba pepe ndali ti zingo siokpari na li ti lo.

⁴Kota wayango-sandaga ni ayeke gue na nyama ni na dawa ti KOTA GBIA, na yanga ti da ti bongo so KOTA GBIA na azo ti lo ayeke wara tere daa. Lo yeke zia maboko ti lo na li ti nyama ni si lo yeke fâ go ti nyama ni na ndo so.

⁵Lo yeke mu mene ni si lo gue na ni na ya ti da ti bongo so KOTA GBIA na azo ti lo ayeke wara tere daa;

⁶lo yeke yoro li ti maboko ti lo na ya ti mene ni si lo yeke fi ni fani mbarambara na tere ti ridoo so a kanga na yanga ti ndo so ayeke nde si ayeke nzoni kue, na dawa ti KOTA GBIA.

⁷Lo yeke zia nga mene ni na tere ti adidi ti gbalaka, na ndo so a yeke zö dukani daa na dawa ti KOTA GBIA na ya ti da ti bongo so KOTA GBIA na azo ti lo ayeke wara tere daa. Na pekoni, lo yeke tuku tanga ti mene ni na gere ti gbalaka so a yeke ya na ndö ni sandaga so a yeke gbi ni kue na wâ si ayeke na dawa ti da ti bongo so KOTA GBIA na azo ti lo ayeke wara tere daa.

⁸Lo yeke zi akasa so kue mafuta ayeke daa mingi ti koli-bagara ni, so ti tene mafuta so ayeke na tere ti akamba ti ya ti nyama ni,

⁹aronyon use na mafuta so ayeke na tere ti aronyon ni, na mafuta so ayeke na tere ti ngbonda ti nyama ni nga mafuta so ayeke na tere ti be ni na aye so ayeke na tere ni; lo yeke zi ni na aronyon ni.

¹⁰Gi mara ti akasa ti mafuta ti koli-bagara so a ya na sandaga ti beoko laa lo yeke zi ni. Na pekoni, lo yeke zö ni na ndö ti gbalaka so a yeke ya na ndö ni sandaga so a yeke gbi ni kue na wâ.

¹¹Me poro ti koli-bagara ni, kasa ni kue, li ni, gere ni, na akamba ti ya ti nyama ni nga na puru ni,

¹²so ti tene bagara ni na ngbongboro ni kue, lo yeke gue na lo na peko ti bâbâ, na mbeni ndo so ayeke *nzoni, ndo so a yeke tuku mburu ti wâ ti mafuta ti anyama daa si lo yeke gbi ni kue na ndö ti akeke ti wâ. Na ndo so laa a yeke gbi aye ni kue na ndö ti mburu ti wâ ti mafuta ti anyama.”

¹³“Tongana bongbi ti azo ti Israel kue laa asara siokpari si azo ni ahinga tënë ni pepe, me ala sara ni na mbana ti be ti ala pepe, tongana ala sara ye so ndia ti KOTA GBIA ake ni, tënë ayeke ga na li ti ala.

¹⁴Tongana azo ni ahinga atene, ala sara siokpari, fade ala yeke mu mbeni koli-bagara ti ya na *sandaga na Nzapa ndali ti siokpari ti ala. Ala yeke gue na bagara ni na yanga ti da ti bongo so KOTA GBIA na azo ti lo ayeke wara tere daa.

¹⁵*Akangba ti bongbi ni ayeke zia maboko ti ala na li ti koli-bagara ni si mbeni oko na popo ti ala ayeke fâ go ti bagara ni na dawa ti KOTA GBIA.

¹⁶Kota wayango-sandaga ayeke mu mene ni si lo gue na ni na ya ti da ti bongo so KOTA GBIA na azo ti lo ayeke wara tere daa;

¹⁷lo yeke yoro li ti maboko ti lo na ya ti mene ni si lo yeke fi ni fani mbarambara na tere ti ridoo so a kanga na yanga ti ndo so ayeke nde si ayeke nzoni kue, na dawa ti KOTA GBIA.

¹⁸Lo yeke zia nga mene ni na tere ti adidi ti gbalaka, na dawa ti KOTA GBIA na ya ti da ti bongo so KOTA GBIA na azo ti lo ayeke wara tere daa. Na pekoni, lo yeke tuku tanga ti mene ni na gere ti gbalaka so a yeke ya na ndö ni sandaga so a yeke gbi ni kue na wâ si ayeke na dawa ti da ti bongo so KOTA GBIA na azo ti lo ayeke wara tere daa.

¹⁹Lo yeke zi akasa so kue mafuta ayeke daa mingi si lo yeke zö ni na ndö ti gbalaka.

²⁰Lo yeke sara na koli-bagara so gi mara ti ye so lo sara na koli-bagara so lo ya na sandaga ndali ti siokpari ti lo wani. Tongana wayango-sandaga asara aye ni so kue na tere ti bongbi ti azo ti Israel titene Nzapa azi siokpari na li ti ala, Nzapa azi siokpari ni awe.

²¹Lo yeke gue na koli-bagara ni na peko ti bâbâ si lo yeke gbi ni tongana ti so lo gbi na kozo koli-bagara ni. So ayeke sandaga so bongbi ti azo ti Israel amu ndali ti zingo siokpari na li ti ala laa.”

²²“Tongana mbeni makonzi asara siokpari, me lo sara ni na mbana ti be ti lo pepe, tongana lo sara ye so ndia ti KOTA GBIA, Nzapa ti lo ake ni, tënë ayeke ga na li ti lo.

²³Tongana a fa na lo siokpari ti lo ni, alingbi lo mu koli-ngasa so mbeni mbage ti tere ti lo abuba pepe.

²⁴Makonzi ni ayeke zia maboko ti lo na li ti koli-ngasa ni si lo yeke fâ go ti ngasa ni na dawa ti KOTA GBIA, na ndo so a yeke fâ ka go ti anyama ti *sandaga so a yeke gbi ni kue na wâ daa. So ayeke sandaga ndali ti zingo siokpari na li ti zo laa.

²⁵Wayango-sandaga ayeke yoro li ti maboko ti lo na ya ti mene ti koli-ngasa ni si lo yeke zia na tere ti adidi ti gbalaka so a yeke ya na ndö ni sandaga so a yeke gbi ni kue na wâ. Na pekoni, lo yeke tuku tanga ti mene ni na gere ti gbalaka ni.

²⁶Lo yeke zi akasa so kue mafuta ayeke daa mingi si lo yeke zö ni na ndö ti gbalaka tongana ti so a yeke sara ndali ti sandaga ti beoko. Tongana wayango-sandaga asara aye ni so kue na tere ti makonzi ni titene Nzapa azi siokpari na li ti lo, Nzapa azi siokpari ni awe.”

²⁷“Tongana mbeni senge zo ti kodro asara siokpari, me lo sara ni na mbana ti be ti lo pepe, tongana lo sara mbeni ye so ndia ti KOTA GBIA ake ni, tënë ayeke ga na li ti lo.

²⁸Tongana a fa na lo siokpari ti lo ni, alingbi lo mu mama ti ngasa so mbeni mbage ti tere ti lo abuba pepe ndali ti siokpari ti lo ni.

²⁹Lo yeke zia maboko ti lo na li ti nyama ni si lo yeke fâ go ti nyama ni na ndo so a yeke fâ ka go ti anyama ti *asandaga so a yeke gbi ni kue na wâ daa.

³⁰Wayango-sandaga ayeke yoro li ti maboko ti lo na ya ti mene ti nyama ni si lo yeke zia na tere ti adidi ti gbalaka so a yeke ya na ndö ni sandaga so a yeke gbi ni kue na wâ. Na pekoni, lo yeke tuku tanga ti mene ni na gere ti gbalaka ni.

³¹Lo yeke zi akasa so kue mafuta ayeke daa mingi tongana ti so a yeke sara ndali ti sandaga ti beoko. Wayango-sandaga ayeke zö aye ni so na ndö ti gbalaka titene fion ni anzere na KOTA GBIA. Tongana wayango-sandaga asara aye ni so kue na tere ti senge zo ti kodro ni titene Nzapa azi siokpari na li ti lo, Nzapa azi siokpari ni awe.

³²“Tongana taba laa lo ye ti mu na sandaga ndali ti siokpari ti lo, alingbi lo gue na mama ti taba so mbeni mbage ti tere ti lo abuba pepe.

³³Lo yeke zia maboko ti lo na li ti nyama ni si lo yeke fâ go ti nyama ni na ndo so a yeke fâ ka go ti anyama ti asandaga so a yeke gbi ni kue na wâ daa.

³⁴Wayango-sandaga ayeke yoro li ti maboko ti lo na ya ti mene ti nyama ni si lo yeke zia na tere ti adidi ti gbalaka so a yeke ya na ndö ni sandaga so a yeke gbi ni kue na wâ. Na pekoni, lo yeke tuku tanga ti mene ni na gere ti gbalaka ni.

³⁵Lo yeke zi akasa so kue mafuta ayeke daa mingi tongana ti so a yeke sara ndali ti taba ti sandaga ti beoko. Wayango-sandaga ayeke zö aye ni so na ndö ti gbalaka titene fion ni anzere na KOTA GBIA. Tongana wayango-sandaga asara aye ni so kue na tere ti senge zo ti kodro ni titene Nzapa azi siokpari na li ti lo, Nzapa azi siokpari ni awe.”