Read sango Awayango-sandaga 5 Bible Online

Awayango-sandaga 5 - sango bible

Awayango-sandaga 5

¹“Tongana mbeni zo abaa wala ahinga tënë ti mbeni ye so asi, tongana a hunda na lo titene lo fa peko ti ye ni na le ti ngbanga si lo ke, fade ngbanga ti siokpari ni ayeke ti na li ti lo.

²“Mbeni tapande ni: tongana zo andu mbeni ye so ayeke *sioni so lo hinga pepe, ataa kuâ ti nyama ti ngonda wala ti kodro so ayeke sioni, ataa kuâ ti akete nyama so ayeke hara harango so ayeke sioni, fade zo ni ayeke ga sioni si lo yeke wara tënë.

³“Mbeni tapande ni: tongana zo andu mbeni zo so aga *sioni na lege ti mbeni ye so asara si zo aga sioni si lo hinga pepe, me na pekoni lo hinga tënë ni, lo yeke wara tënë.

⁴“Mbeni tapande ni: tongana zo agbu li ti lo pepe si mbeni tënë ti dengo ba asigigi na yanga ti lo, ataa deba ni asara sioni wala nzoni na zo si na pekoni lo hinga tënë ni, lo yeke wara tënë.

⁵“Zo so awara tënë ndali ti mbeni ye oko so a fa ni so, alingbi lo fa na gigi siokpari so lo sara so.

⁶Na pekoni, zo ni ayeke ga na mama ti taba wala mama ti ngasa ti mu na *sandaga na KOTA GBIA ndali ti siokpari ti lo ni. Tongaso wayango-sandaga ayeke ya nyama ni na sandaga titene Nzapa azi siokpari na li ti zo ni.”

⁷“Tongana mbeni zo ayeke na ngangu ti ga na mama ti taba wala mama ti ngasa ndali ti siokpari ti lo pepe, lo lingbi ti ga na *akolokoto use, wala *ambipa use na KOTA GBIA. A yeke mu mbeni ndeke ni oko na *sandaga titene Nzapa azi siokpari na li ti zo ni; mbeni ndeke ni, a yeke ya lo na sandaga so a yeke gbi ni kue na wâ.

⁸Zo ni ayeke mu andeke ni na wayango-sandaga. Kozoni, wayango-sandaga ayeke ya na KOTA GBIA ndeke so zo ni aga na ni ndali ti zingo siokpari na ti lo so. Wayango-sandaga ayeke kungbi go ti ndeke ni, me lo yeke zi li ti ndeke ni zingo daa pepe.

⁹Lo yeke fi mene ni na tere ti gbalaka. Na pekoni, lo yuru tanga ti mene ni na sese na gere ti gbalaka ni. So ayeke sandaga ndali ti zingo siokpari na li ti zo laa.

¹⁰Na pekoni, wayango-sandaga ayeke ya use ndeke ni na sandaga so a yeke gbi ni kue na wâ, alingbi na ndia ni. Tongana wayango-sandaga asara aye ni so kue na tere ti zo ni titene Nzapa azi siokpari na li ti lo, Nzapa azi siokpari ni awe.

¹¹“Tongana mbeni zo ayeke na akolokoto use, wala ambipa use so na maboko ti lo pepe, lo lingbi ti ga na kilo ota ti farini na sandaga ndali ti siokpari ti lo. Me alingbi lo tuku mafuta daa wala lo zia dukani daa pepe. Biani, so ayeke sandaga ndali ti zingo siokpari na li ti zo laa.

¹²Zo ni ayeke ga na farini ni na wayango-sandaga; wayango-sandaga ayeke mu mbeni farini ni asi ya ti maboko ti lo; a iri farini ni farini ti dango be. Wayango-sandaga ayeke zö farini ni na ndö ti gbalaka legeoko na tanga ti asandaga so a yeke gbi ni kue na wâ ndali ti KOTA GBIA. So ayeke sandaga ndali ti zingo siokpari na li ti zo laa.

¹³Tongana wayango-sandaga asara aye ni so kue na tere ti zo ni titene Nzapa azi siokpari na li ti lo, Nzapa azi siokpari ni awe. “Wayango-sandaga ayeke sara ye ni tongana ti so a yeke sara ndali ti sandaga ti ale ti kobe.”

¹⁴KOTA GBIA atene na Moïse:

¹⁵“Tongana mbeni zo asara ye so ayeke sioni mingi ti ke ye so alingbi fade ti mu na *sandaga na KOTA GBIA, me lo sara ni na mbana ti be ti lo pepe, ye so lo lingbi ti sara na KOTA GBIA ti leke na tënë ti lo ayeke so: lo yeke ga na koli-taba so mbeni mbage ti tere ti lo abuba pepe, so ngere ti lo alingbi na ngere ti taba so a yeke mu ka na ndo so a zia nde ndali ti Nzapa.

¹⁶Mbana so lo sara na tere ti ndo ni so, lo yeke futa mbeni ye ndali ni. Na mbage, na ya ti ye oku, lo yeke mu mbage ni oko, lo zia na ndö ni si lo mu ni kue na wayango-sandaga. Tongana wayango-sandaga asara ye ni so kue na tere ti zo ni na lege ti koli-taba so lo ya na sandaga titene Nzapa azi siokpari na li ti lo, Nzapa azi siokpari ni awe.

¹⁷“Tongana mbeni zo asara siokpari so ndia ti KOTA GBIA ake tënë ni, me lo hinga pepe, tënë ni ayeke na li ti lo si ngbanga ti siokpari ni ayeke ti na li ti lo.

¹⁸Alingbi zo ni amu koli-taba so mbeni mbage ti lo abuba pepe, lo ga na ni na wayango-sandaga; koli-taba so ngere ti lo alingbi na ngere ti taba so a yeke mu ka na sandaga ti lekengo tënë. Tongana wayango-sandaga asara ye ni so kue na tere ti zo ni ndali ti siokpari so lo sara na mbana ti be ti lo pepe si lo hinga pepe, tongaso Nzapa azi siokpari na li ti zo ni awe.

¹⁹So sandaga ti lekengo tënë laa. So ti fa atene, zo ni asara biani siokpari so ake KOTA GBIA awe.”

²⁰KOTA GBIA atene na Moïse:

²¹“Tongana mbeni zo asara ye so ayeke sioni mingi so ake KOTA GBIA. Tapande ni: lo tene mvene na mba ti lo ndali ti mbeni ye so a bata na da ti lo, wala ndali ti mbeni ye so a mu na lo titene lo bata, wala ndali ti mbeni ye so lo hunda na boon wala ye so lo nzi nzingo, wala ye so lo mu na ngangu,

²²wala ye so agirisa si lo wara ni, me lo bere tënë ni; wala lo deba yanga ti lo ti honde amara ti asioni nde nde tongana ti so ni.

²³Zo ni so asara siokpari si tënë ayeke na li ti lo. Alingbi lo kiri na ye so lo nzi so, wala ye so lo mu na ngangu na maboko ti mba ti lo so, wala ye so a mu na lo titene lo bata so, wala ye so agirisa si lo wara so.

²⁴Alingbi lo kiri na aye so kue lo deba yanga ti lo atene, ni laa ni mu pepe so. Lo yeke kiri na ni senge tongaso pepe; na ya ti ye oku, lo yeke mu mbage ni oko, lo zia na ndö ti ye ni si lo kiri na ni kue na wani tongana lo baa so tënë ayeke na li ti lo.

²⁵Ti leke na tënë ti lo na KOTA GBIA, alingbi lo mu koli-taba so mbeni mbage ti tere ti lo abuba pepe, lo ga na ni na wayango-sandaga; koli-taba so ngere ti lo alingbi na ngere ti taba so a yeke mu ka na sandaga ti lekengo tënë.

²⁶Tongana wayango-sandaga asara aye so kue na tere ti zo ni na dawa ti KOTA GBIA titene lo zi siokpari na li ti zo ni, ataa ye so kue zo ni asara si tënë aga na li ti lo, Nzapa azi tënë ni na li ti lo awe.”