Read sango Awayango-sandaga 6 Bible Online

Awayango-sandaga 6 - sango bible

Awayango-sandaga 6

¹KOTA GBIA atene na Moïse

²ti mu yanga na Aaron nga na amolenge ti lo, atene: “Baa lege ti mungo *sandaga so a yeke gbi ni kue na wâ ayeke so: Fade sandaga so ayeke ngba na ndö ti gbalaka, na le ti wâ na bi ngbii asi na ndaperere; wâ ti ndö ti gbalaka ni ayeke ngba na zango ni.

³Na pekoni, wayango-sandaga ayeke yu yongoro bongo ti lo so a sara na *len nga na kilote so a sara na len. Lo yeke zi mburu ti wâ ti mafuta ti anyama so a gbi ni kue na wâ si lo yeke zia ni na tere ti gbalaka ni.

⁴Lo yeke zi abongo so ayeke na tere ti lo, lo yu ambeni bongo nde si lo mu mburu ti wâ ni, lo sigigi na ni na ya ti bâbâ ni ti gue na ni na mbeni ndo so ayeke *nzoni.

⁵Wâ so ayeke na ndö ti gbalaka ayeke ngba ti lo ti za lakue na ndö ni, ayeke mingo pepe. Lakue na ndaperere, wayango-sandaga ayeke zia akeke ti wâ daa, lo yeke leke sandaga so a yeke gbi ni kue na wâ na ndö ni, lo yeke zö nga mafuta so a mu na sandaga ti beoko na ndö ni.

⁶Fade wâ ayeke ngba ti za lakue na ndö ti gbalaka ni, ayeke mingo pepe.”

⁷“Ndia ndali ti mungo sandaga ti ale ti kobe ayeke so: Amolenge ti Aaron laa ayeke ga nduru na gbalaka si ala yeke ya sandaga ni na KOTA GBIA.

⁸Mbeni wayango-sandaga oko ayeke mu farini ti ale ti kobe asi ya ti maboko ti lo, farini so a tuku mafuta daa si a zia dukani daa, lo yeke zö ni na ndö ti gbalaka. So ayeke sandaga so fion ni anzere na KOTA GBIA, a iri ni sandaga ti dango be.

⁹Tanga ni so angba so, Aaron na amolenge ti lo alingbi ti te ni; me ala zia mama ti mapa na ya ni pepe. Fade ala te ni na mbeni ndo so ayeke nde si ayeke nzoni kue, so ti tene na ya ti gbagba ti da ti bongo so KOTA GBIA na azo ti lo ayeke wara tere daa.

¹⁰Titene ala zö ni, ala zia mama ti mapa daa pepe. So ayeke mbage ti sandaga so ayeke gbi ni kue na wâ, so azo amu aga na ni na mbi si mbi mu na Aaron na amolenge ti lo. Ayeke mbeni ye so ayeke nde si ayeke nzoni kue. Ayeke nzoni kue tongana sandaga so zo ayeke mu titene Nzapa azi siokpari na li ti lo, wala sandaga so zo ayeke mu ti leke na tënë ti lo.

¹¹Fade gi *ahale ti Aaron ti koli laa ayeke te kobe ni so. Biani, mbage ti sandaga so a yeke gbi ni kue na wâ na KOTA GBIA, ni laa ayeke ga ti ala kpu na kpu. Tanga ti azo so kue andu sandaga so, a yeke zia ala nde si ala yeke ga nzoni kue.”

¹²KOTA GBIA atene na Moïse:

¹³“Ti londo na lango so a yeke tuku mafuta na li ti Aaron na amolenge ti lo ti zia ala nde, sandaga so ala yeke mu na KOTA GBIA ayeke tongaso: ala yeke mu na ya ti lango oko oko kilo ota ti farini, ndambo ni na ndaperere, ndambo ni na lakui.

¹⁴Alingbi ala tuku mafuta na ya ti farini ni, ala gbu ya ni si ala zö ni na ya ti kpangbara sembe. Fade ala yeke fâ ya ni kete kete si ala mu na sandaga na KOTA GBIA titene fion ni anzere na lo.

¹⁵“Na popo ti amolenge ti Aaron, lo so a yeke tuku mafuta na li ti lo titene lo ga kota wayango-sandaga na peko ti babâ ti lo, fade lo yeke mu nga gi mara ti sandaga so. So ayeke sandaga so a zö ni kue na wâ si a yeke mu lakue lakue na KOTA GBIA.

¹⁶Akobe ti yaka so wayango-sandaga ayeke ya na sandaga, ayeke nzoni a zö ni kue na wâ: alingbi zo oko ate ni pepe.”

¹⁷KOTA GBIA atene na Moïse:

¹⁸Tene na Aaron na amolenge ti lo, mo tene: “Ndia ndali ti mungo *sandaga titene Nzapa azi siokpari na li ti zo ayeke so: Nyama ti sandaga ni, a yeke fâ go ti lo na ndo so a yeke fâ ka go ti anyama ti sandaga so a yeke gbi ni kue na wâ daa, na dawa ti KOTA GBIA. So ayeke sandaga so a ayeke nde si ayeke nzoni kue ahon atanga ni.

¹⁹Wayango-sandaga so ayeke ya sandaga ni laa alingbi ti te ni. Fade lo yeke te ni na ya ti gbagba ti da ti bongo so KOTA GBIA na azo ti lo ayeke wara tere daa, na ndo so ayeke nde si ayeke nzoni kue.

²⁰Ye so kue ayeke ndu kasa ti sandaga so, fade ayeke ga ye so a zia nde si ayeke nzoni kue. Tongana mene ti nyama ni ati na tere ti bongo, ndo so mene ni ati daa so, a yeke sukula ni na mbeni ndo so ayeke nde si ayeke nzoni kue.

²¹Tongana a to nyama ni na ya ti ta ti sese, fade a yeke fâ ya ti ta ni. Tongana a to ni na ya ti ta so a sara na bengba wen, a yeke kpaka ni si a sukula ni nzoni.

²²Akoli so kue ayeke azo ti ya ti sewa ti awayango-sandaga laa alingbi ti te nyama ni: so ayeke mbeni sandaga so ayeke nde si ayeke nzoni kue ahon atanga ni.

²³Me nyama so kue azo amu na sandaga titene Nzapa azi siokpari na li ti ala, tongana a mu mene ni, a gue na ni na ya ti da ti bongo so KOTA GBIA na azo ti lo ayeke wara tere daa, alingbi zo ate ni pepe, me ala zö ni na wâ.”