Read sango Awayango-sandaga 8 Bible Online

Awayango-sandaga 8 - sango bible

Awayango-sandaga 8

¹KOTA GBIA atene na Moïse:

²“Mu Aaron na amolenge ti lo, na abongo so a zia nde ndali ti Nzapa, na mafuta ti tukungo na li ti zo ti zia lo nde, na koli-bagara so a yeke mu na *sandaga ndali ti zingo siokpari na li ti zo, na akoli-taba use nga na sakpa ti mapa so a sara na mama ni pepe.

³Na pekoni, mo bongbi azo ti Israel kue na yanga ti da ti bongo so KOTA GBIA na azo ti lo ayeke wara tere daa.”

⁴Moïse asara ye so KOTA GBIA amu yanga daa na lo: lo bongbi azo ti Israel na yanga ti da ti bongo ni.

⁵Tongaso lo tene na azo ni, lo tene: “Baa, ye so KOTA GBIA amu yanga daa si mbi ye ti sara ni laa.”

⁶Na pekoni, Moïse aga na Aaron na amolenge ti lo, lo sukula ala na ngu.

⁷Lo yu na Aaron yongoro bongo ti gbeni, lo kanga kamba na ndö ni, lo yu na lo kaba si lo zia *efod na ndö ni; lo kanga akamba ti efod na ndö ni.

⁸Lo zia na ndö ti kate ti Aaron bozo so lo zia Urim na Tumim daa.

⁹Moïse azia na li ti lo bongo so a yeke kanga na li tongana kpoto. Na dawa ti kpoto ni, lo zia palata so a sara na lôro si akpa kongo ti fa atene, zo so a zia lo nde ndali ti Nzapa, alingbi na yanga so KOTA GBIA amu na Moïse.

¹⁰Na pekoni, Moïse amu mafuta ti tukungo na li ti zo, lo tuku na ndö ti da so Nzapa ayeke duti daa nga na aye so kue ayeke na ya ni ti zia ni nde ndali ti Nzapa.

¹¹Lo fi mafuta ni na tere ti gbalaka fani mbarambara. Na pekoni, lo tuku mafuta ni na ndö ti gbalaka ni na agbakuru ni kue; na tere ti kota sembe na gere ni ti zia ni nde ndali ti Nzapa.

¹²Lo tuku nga mafuta ni na li ti Aaron ti zia lo nde ndali ti Nzapa.

¹³Na pekoni, Moïse aga na amolenge ti Aaron; lo yu na ala akota bongo, lo kanga kamba na ndö ti abongo ni, lo zia kpoto na li ti ala alingbi na yanga so KOTA GBIA amu.

¹⁴Lo hunda titene a ga na lo koli-bagara so a yeke mu na sandaga ndali ti zingo siokpari na li ti azo. Aaron na amolenge ti lo azia maboko ti ala na li ti koli-bagara ni.

¹⁵Moïse afâ go ti koli-bagara ni, lo yoro li ti maboko ti lo na ya ti mene ni si lo sara na tere ti adidi so ayeke na andangoro ti gbalaka titene aga *nzoni. Na pekoni, lo tuku tanga ti mene ni na gere ti gbalaka ni ti zia ni nde ndali ti Nzapa; tongaso si aga ye so Nzapa ayeke mu ti zi na siokpari na li ti azo.

¹⁶Moïse amu mafuta so kue ayeke na tere ti akamba ti ya ti nyama ni, na mafuta so ayeke na tere ti be ni nga na aronyon use na mafuta so ayeke na tere ni, lo zö ni kue na wâ na ndö ti gbalaka ni.

¹⁷Me tanga ti nyama ni, poro ni, na puru ni, lo gbi ni yongoro na tere ti bâbâ, alingbi na yanga so KOTA GBIA amu na Moïse.

¹⁸Na pekoni, lo ga na koli-taba so a yeke mu na sandaga so a yeke gbi ni kue na wâ. Aaron na amolenge ti lo azia maboko ti ala na li ti koli-taba ni.

¹⁹Moïse afâ go ti koli-taba ni, lo fi mene ni na tere ti gbalaka, angoro ni kue.

²⁰Moïse adoroko koli-taba ni; lo zö li ni, na akasa ni nga na mafuta ni.

²¹Lo sukula akamba ti ya ti nyama ni na agere ni; lo zö nyama ni kue na ndö ti gbalaka ti mu na sandaga so a yeke gbi ni kue na wâ, alingbi na yanga so KOTA GBIA amu na Moïse; so ayeke sandaga so fion ni anzere na KOTA GBIA.

²²Na pekoni, Moïse aga na use koli-taba ni; koli-taba so afa atene, Aaron na amolenge ti lo ali na kua ti ala ti awayango-sandaga awe. Ala zia maboko ti ala na li ti koli-taba ni.

²³Moïse afâ go ti taba ni, lo mu mene ni si lo zia na tere ti mê ti Aaron ti mbage ti koli; lo zia ni na ndö ti kota li ti maboko ti lo ti mbage ti koli nga na ndö ti kota li ti gere ti lo ti mbage ti koli.

²⁴Lo ga na amolenge ti Aaron; lo mu mene ni, lo zia na tere ti mê ti ala ti mbage ti koli; lo zia ni na ndö ti kota li ti maboko ti ala ti mbage ti koli nga na ndö ti kota li ti gere ti ala ti mbage ti koli. Na pekoni, Moïse afi tanga ti mene ni na tere ti gbalaka ni, angoro ni kue.

²⁵Moïse amu akasa ti koli-taba ni so mafuta ayeke daa mingi: damba ni, mafuta so ayeke na tere ti ya ti nyama ni, na mafuta so ayeke na tere ti be ni, aronyon use na mafuta so ayeke na tere ni nga na gere ti nyama ni ti mbage ti koli.

²⁶Na ya ti sakpa ti mapa so a sara na mama ni pepe si ayeke na dawa ti KOTA GBIA, lo mu gatoo oko so a sara na mama ni pepe, na mbeni gatoo so a sara na mafuta nga na makara oko; lo zia ni na ndö ti akasa so mafuta ayeke daa mingi nga na ndö ti gere ti nyama ni ti mbage ti koli.

²⁷Lo zia aye so kue na maboko ti Aaron na ti amolenge ti lo. Lo tene na ala ti ya ni na nduzu ti fa atene, ala mu na KOTA GBIA.

²⁸Na pekoni, Moïse akiri amu aye ni na maboko ti ala si lo zö ni kue na wâ na ndö ti gbalaka; lo bongbi ni na sandaga so a yeke gbi ni kue na wâ. So ayeke sandaga ti ziango kua na maboko ti zo laa, sandaga so fion ni anzere na KOTA GBIA, sandaga so a gbi ni kue na wâ ndali ti KOTA GBIA.

²⁹Moïse amu kate ti koli-taba so a mu na sandaga ti ziango kua na maboko ti zo so, lo ya ni na nduzu ti fa atene, lo mu na KOTA GBIA. Mbage ti nyama ni ayeke ga ti Moïse alingbi na yanga so KOTA GBIA amu.

³⁰Moïse amu mafuta ti tukungo na li ti zo ti zia lo nde nga na mene so ayeke na ndö ti gbalaka, lo fi na tere ti Aaron nga na tere ti abongo ti lo. Lo fi nga na tere ti amolenge ti Aaron nga na tere ti abongo ti ala. Lege so Moïse azia Aaron na abongo ti lo nde ndali ti Nzapa laa; lege so lo zia nga amolenge ti Aaron na abongo ti ala nde ndali ti Nzapa laa.

³¹Moïse atene na Aaron na amolenge ti lo: “Ala to kasa ti nyama ni na yanga ti da ti bongo so KOTA GBIA na azo ti lo ayeke wara tere daa. Gi na ndo so, fade ala yeke te ni na mapa so a sara ndali ti matanga ni, alingbi na yanga so mbi KOTA GBIA, mbi mu na ala.

³²Tanga ti kasa ni na tanga ti mapa ni, ala yeke zö ni kue na wâ.

³³Na ya ti lango mbarambara, fade ala yeke ngba na yanga ti da ti bongo ni ngbii lango so a yeke zia kua ti wayango-sandaga na maboko ti ala ahunzi si. Biani, a yeke mu lango mbarambara ndali ti matanga ti ziango ala na kua ni.

³⁴Ye so a sara laso so, KOTA GBIA wani laa amu yanga titene a sara ni tongaso ti zi siokpari na li ti ala.

³⁵Ala yeke ngba lango mbarambara, bi na lâ na yanga ti da ti bongo ni. Na pekoni, ala lingbi ti sara kua ti KOTA GBIA si ala kui pepe. Yanga so KOTA GBIA amu na mbi laa.”

³⁶Aaron na amolenge ti lo asara aye so kue KOTA GBIA amu yanga daa na lege ti Moïse.