Read sango Jérémie 11 Bible Online

Jérémie 11 - sango bible

Jérémie 11

¹Tënë ti *KOTA GBIA asi na Jérémie atene:

²“Ala ma atënë ti ya ti *mbuki so nzoni! Mo tene tënë ni na azo ti Juda nga na azo so ayeke lango na Jérusalem.

³Fade mo yeke tene na ala: Tënë so KOTA GBIA, Nzapa ti Israel atene ayeke so: Deba aga na ndö ti zo so abata tënë ti ya ti mbuki so pepe!

⁴Ando, mbi sara si akotara ti ala asigigi na sese ti Ezipte so ayeke tongana kota wâ so a yeke kporo wen na ya ni. Na ndembe ni so, mbi mu yanga na ala, mbi tene: Ala ma tënë ti mbi, ala sara ye so kue mbi mu yanga na ala ti sarango ni. Tongaso, fade ala yeke duti azo ti mbi si mbi, mbi yeke duti Nzapa ti ala.

⁵Tongaso, zendo so mbi mu ando na akotara ti ala, fade mbi yeke sara ye alingbi na ni. Mbi deba ando yanga ti mbi ti mu na ala *kodro so ngu ti me ti bagara na mafuta ti wotoro asi singo daa, kodro ni laa ala yeke daa laso so.” Mbi kiri tënë: “Amen, KOTA GBIA!”

⁶KOTA GBIA akiri atene na mbi: “To mbela na atënë so kue na ya ti agbata ti Juda nga na ndö ti alege ti Jérusalem, mo tene: ‘Ala ma atënë ti ya ti mbuki so, ala sara ye alingbi na ni!

⁷Biani, mbi gboto mê ti akotara ti ala na ndö ni, ti londo na ndembe so mbi sara si ala sigigi na sese ti Ezipte, ngbii asi laso; mbi mu ngoi ti mbi kue ti gboto mê ti ala na ndö ni si mbi kiri mbi tene: Ala ma tënë ti mbi.

⁸Me ala ma tënë ni pepe, ala dingi mê ti ala pepe ti ma tënë ni. Zo oko oko angba ti sara sioni ye so be ti lo afa na lo. Tongaso, mbi sara si atënë kue ti ya ti mbuki ni akiri na ndö ti ala, ngbanga ti so mbi mu yanga na ala ti sara ye alingbi na atënë ti ya ti mbuki ni, me ala ke.’ ”

⁹KOTA GBIA akiri atene na mbi: “Mbeni tënë ayeke daa so azo ti Juda na azo ti Jérusalem ayeke leke na hondengo ni.

¹⁰Sioni so akotara ti ala asara ando so, gi ni laa ala kiri daa. Akotara ti ala ni ake ti ma atënë ti mbi; ala kpe na peko ti anzapa nde ti voro ala. Azo ti Israel na azo ti Juda abuba ya ti mbuki so mbi na akotara ti ala, e sara ni.

¹¹“Ndani laa, tënë so KOTA GBIA atene ayeke so: ‘Fade mbi yeke sara si mbeni kota kpale aga na ndö ti ala; kota kpale so ala lingbi ti sigigi na ya ni pepe. Ala yeke dekongo ti iri mbi, me mbi yeke ma ala pepe.

¹²Azo ti agbata ti Juda na azo ti Jérusalem ayeke gue ti voro tere ti ala na anzapa so ala yeke zö dukani na ala, me anzapa ni ayeke soo ala oko pepe na ndembe so ye ti ngangu ayeke si na ala.

¹³Biani, ala azo ti Juda, ala yeke na anzapa gbani gbani alingbi na wungo ti agbata ti ala. Kâ na Jérusalem, ala yeke na agbalaka gbani gbani ndali ti Kamene alingbi na wungo ti abalabala ti ya ti gbata ni, agbalaka so ala yeke ya *sandaga na ndö ni na *Baal.’

¹⁴Ti mo Jérémie, mo sambela ndali ti azo so pepe, mo sambela wala mo voro tere ti mo na mbi ndali ti ala pepe, ngbanga ti so fade mbi yeke ma ni pepe, tongana ye ti ngangu asi na ala si ala iri mbi ti mu maboko na ala.”

¹⁵KOTA GBIA atene: “Azo so mbi ye ala mingi so, ala kiri asara ye na mayere mingi. Ala ga ti sara nyen na ya ti da ti mbi? Ala baa atene, azendo so ala mu nga na asandaga so ala yeke ya na mbi so, ni laa alingbi ti kanga lege na kpale ni? Ni laa alingbi ti zi ala na ya ti kpale ni?

¹⁶Mbi zia lani iri na ndö ti mara ni: ‘Keke ti olive so afini kugbe ni ayeke gbani gbani si alengo ni ayeke pendere ahon ndoni.’ Me na ya ti kota wuluwulu tongana toto ti bekpa, mbi sara si wâ ati na ya ti akugbe ti lo, amaboko ni akungbi kue.”

¹⁷KOTA GBIA so ayeke na ndö ti dunia kue laa alu keke ni. Ti fadeso, lo yeke iri kpale na ndö ti lo ndali ti sioni so azo ti Israel na azo ti Juda asara. Biani, ala zia ngonzo na be ti KOTA GBIA na lege so ala ya asandaga na *Baal.

¹⁸*KOTA GBIA afa ye ni na mbi si mbi hinga ni. Lo sara si mbi baa ye so ala ye ti sara.

¹⁹Ti mbi, mbi yeke tongana molenge ti taba so a yeke gue na lo na ndo ti fango anyama. Mbi hinga pepe mbi tene, sioni mayere ti ala so ayeke ndali ti mbi. Ala tene: “E buba keke ni na ngangu ni kue! E zi lo na popo ti azo so ayeke na fini, e sara si zo oko akiri adabe na iri ti lo pepe!”

²⁰Me mo, KOTA GBIA so mo yeke na ndö ti dunia kue, mo yeke fâ ngbanga mbirimbiri. Tënë ti be ti zo na ye so zo ayeke gbu li ti lo daa, mo hinga ni kue. Fade mbi yeke baa lege so mo yeke kiri na ala peko ti sioni so ala sara na mbi, ngbanga ti so mbi zia tënë ti mbi na maboko ti mo.

²¹Ndani laa, tënë so KOTA GBIA atene na tere ti azo ti Anatot, azo so aye ti fâ mbi si ala tene: “Mo zia ti tene peko ti tënë ti yanga ti KOTA GBIA; tongaso pepe, fade e yeke fâ mo.”

²²Ndani laa, tënë so KOTA GBIA so ayeke na ndö ti dunia kue atene ayeke so: “Fade mbi yeke ga na tere ti ala: amaseka ti ala ti koli ayeke kui na ya ti bira, amolenge ti ala ti koli na ti wali ayeke kui na nzara.

²³Zo oko ayeke ngba na fini pepe, na ngu so mbi yeke ga na tere ti azo ti Anatot si mbi yeke tokua kpale na ndö ti ala.”