Read sango Jérémie 12 Bible Online

Jérémie 12 - sango bible

Jérémie 12

¹*KOTA GBIA, mo yeke mbirimbiri ahon ndoni, mbi lingbi ti dekite na mo pepe; me mbi ye ti hunda na mo tënë na ndö ti alege ti fango ngbanga ti mo: Ngbanga ti nyen si gigi ti azo ti sioni ayeke ga nzoni so? Ngbanga ti nyen si azo so ake tënë ti mo ayeke duti ti ala kpoo so?

²Mo lu ala tongana keke so agunda ni ali sese; ala yeke mai si ala yeke le. Iri ti mo ayeke na yanga ti ala lakue, me be ti ala ayeke yongoro na mo.

³Ti mbi KOTA GBIA, mo hinga mbi, mo baa mbi, mo hinga so be ti mbi ayeke nduru na mo. Ti azo ti sioni, ayeke nzoni mo zia ala na mbage tongana ataba so a bata ala ti gue na ala na ndo ti fango anyama. Ayeke nzoni mo zia ala nde ti ku na lango ti fango ala.

⁴Kodro ni ayeke ngba na mua ngbii asi lawa? Apere ti ayaka kue ayeke ngba ti hole ngbii asi lawa? Ndali ti sioni ti azo ti kodro ni, anyama na andeke ayeke kui kue. Azo ni ayeke tene: “Jérémie ayeke hunzi kozo ti e.”

⁵KOTA GBIA atene: “Tongana mo lingbi ti mu loro na azo ti kpengo loro pepe, mo lingbi ti sara mandako ti loro na ambarata tongana nyen? Tongana mo duti na siriri gi na ya ti kodro so ye kue ayeke na legeni, fade mo yeke sara tongana nyen na ya ti gbako ti yanga ti ngu ti Jourdain?

⁶“Biani, ataa azo ti mara ti mo, ataa azo ti da ti mo, ala yeke ka mo; ala yeke bongbi gba ti azo ti sara sioni na mo, me mo hinga pepe. Tongana ala yeke tene anzerengo tënë na mo, mo zia be ti mo na ndö ti ala pepe.”

⁷“Mbi do da ti mbi, mbi zia awe; ye so ayeke ti mbi, mbi ke ni awe. Mara so mbi ye lo na be ti mbi kue, mbi zia lo na maboko ti awato ti lo awe.

⁸Ye so ayeke ti mbi aga tongana mbeni bamara na ya ti gbako: lo dekongo ti ga na tere ti mbi. Nilaa fadeso, mbi ke lo awe.

⁹Ye so ayeke ti mbi aga tongana mbeni ndeke so anzoroko ti tere ti lo ayeke gbani gbani — ndeke so asioni ndeke aga na tere ti lo mbage na mbage ti te lo? Ala gue, abongbi asioni nyama kue aga na ala na matanga ti tengo kobe!

¹⁰Awabatango-taba mingi abuba yaka ti *vinye ti mbi; ala do na gbe ti gere ti ala yaka ti mbi, ala sara si pendere yaka so aga benyama, aga ngonda.

¹¹Biani, ala sara si yaka ni aga ngonda. Na le ti mbi, yaka ni ayeke na mua; kodro ni kue aga ngonda, me tënë ni agbu be ti zo oko pepe.”

¹²Na ndö ti alege so kue ayeke na benyama, azo ti bubango ye ayeke ga. Yongoro zeme ti KOTA GBIA ayeke fâ aye, ti londo na mbeni yanga ti kodro asi na mbeni yanga ni; zo oko ayeke na siriri mbeni pepe.

¹³Ala lu *ble, me ala wara akeke ti ki. Ala baa pasi senge senge, ye ti peko ni ayeke daa oko pepe. Aye so ala wara so aga ye ti kamene na ala ndali ti ngonzo ti wâ ti KOTA GBIA.

¹⁴Tënë so KOTA GBIA atene ayeke so: “Asioni zo so ayeke lango nduru na azo ti mbi, ala ndu ye so aga ye ti mbi, ala ndu sese so mbi mu ando na Israel, azo ti mbi. Fade mbi yeke gboto azo ni na ndö ti sese ti ala tongana ti so a yeke gboto pere; mbi yeke gboto nga azo ti Juda na popo ti ala.

¹⁵Me na peko ti so mbi gboto ala na ndö ti sese ni awe, mbi yeke kiri ti baa mawa ti azo ni si mbi yeke kiri na zo oko oko na ndö ti sese ti lo nga na ya ti kodro ti lo.

¹⁶Tongana azo ni amanda lege ti dutingo ni tongana ti azo ti mbi, tongana azo ni adeba na iri ti mbi, atene: ‘KOTA GBIA ayeke na fini!’, tongana ti so a fa na ala ti deba na iri ti *Baal, fade azo ni ayeke wara ndo ti duti daa na popo ti azo ti mbi.

¹⁷Me tongana ala ma pepe, fade mbi yeke gboto mara ni so na ndö ti sese ti lo biani biani, mbi yeke hunzi lo”; so tënë ti yanga ti KOTA GBIA laa.