Read sango Jérémie 15 Bible Online

Jérémie 15 - sango bible

Jérémie 15

¹*KOTA GBIA atene na mbi: “Ataa Moïse na Samuel aluti fade na dawa ti mbi ti sambela ndali ti mara so, ka tënë ti azo ti mara so ayeke so be ti mbi oko pepe. Mo tumba azo ni na dawa ti mbi, ala hon!

²Tongana azo ni ahunda mo, atene: ‘E yeke gue na ndo wa?’, fade mo yeke kiri tënë na ala: ‘Tënë so KOTA GBIA atene ayeke so: Zo so a diko lo ti kui, fade lo yeke kui! Zo so a diko lo ti kui na ya ti bira, lo yeke kui na ya ti bira! Zo so a diko lo ti kui kuâ ti nzara, lo yeke kui na nzara! Zo so a diko lo titene a gue na lo na kodro wande, a yeke gue na lo na kodro wande!’

³“So tënë ti yanga ti KOTA GBIA laa: Fade mbi yeke tokua asioni ye osio na ndö ti azo ni: yongoro zeme ti fâ ala kue, ambo ti gboto ala ti hon na ala, andeke ti nduzu na anyama ti sese ti suru ya ti ala, ti te ala kue.

⁴Tongaso, fade akodro-gbia kue ti sese ayeke do na kota mbeto na bango azo ni. Andaa, so ayeke gi peko ti sioni so Manase, molenge ti Ezekias, gbia ti Juda asara lani na Jérusalem laa.”

⁵*KOTA GBIA atene: “Mo Jérusalem, zo wa laa ayeke baa mawa ti mo, zo wa? Zo wa laa ayeke toto mawa ti mo, zo wa? Zo wa laa ayeke do tere ti lo ti hunda tënë ti mo, zo wa?

⁶So tënë ti yanga ti KOTA GBIA laa: Mo laa mo zia mbi, mo zia peko ti mo na mbi. Nilaa mbi yoro maboko ti mbi ti fâ mo. Mbi baa mawa ti mo alingbi awe.

⁷Na ya ti gbata oko oko ti kodro ni, mbi pe ala tongana ale ti kobe ti kangbi ala kirikiri. Mbi fâ azo ti mbi, mbi hunzi amolenge kue, me azo ni azia lege ti sarango ye ti ala pepe.

⁸Mbi sara si awali-mua ti ala akiri aga gbani gbani tongana mbutu ti yanga ti kota ngu-ingo. Taa na kota lâ, mbi tokua mbeni zo ti bingo kpale ti ga na ndö ti mama ti ngangu zo ti bira. Gi hio tongaso, mbi bi na ndö ti lo kota ye ti vundu na ye ti mbeto.

⁹Wali so lani azo ayeke gonda lo atene, lo yeke na amolenge mbarambara so, fadeso ngangu ti lo ahunzi kue, lo yeke wu gi na nduzu, na nduzu. Ti lo, taa na kota lâ, lâ akui awe. Kamene ahon ndö ti lo, kamene agbu le ti lo. Ti ala so angba na fini, fade mbi yeke sara si ala kui kuâ ti yongoro zeme taa na le ti awato ti ala.” So tënë ti yanga ti KOTA GBIA laa.

¹⁰Mama ti mbi, so mawa na mbi so mo du mbi so! Na ya ti kodro ni kue, azo ake mbi, ala ye gi kuâ ti mbi. Yongo ti mbi ayeke na li ti zo pepe, yongo ti mbeni zo ayeke na li ti mbi nga pepe, me azo kue ayeke deba mbi!

¹¹Andaa *KOTA GBIA atene lani na mbi, atene: “Mbi mu zendo ti zi mo titene mo baa nzoni; mbi mu zendo ti sara si awato ti mo avoro tere ti ala na mo na ngoi ti ye ti sioni nga na ngoi ti ye ti vundu.

¹²Zo alingbi ti fâ ya ti wen, wen so alondo na Banga so? Zo alingbi ti fâ ya ti bengba wen?”

¹³“Mo Juda, anzoni ye ti mo na amosoro ti mo, mbi yeke mu azo titene ala gbu ahon na ni, fade mo yeke wara ye oko na peko ni pepe. So ayeke ye ti peko ti asioni ye ti mo kue laa, asioni so kue mo sara na ndö ti sese ti mo mobimba.

¹⁴Fade mbi yeke sara si mo ga ngbaa ti awato ti mo na ya ti kodro so mo hinga ni pepe. Biani, wâ ti ngonzo ti mbi alondo awe; wâ ni ayeke gbi ti ga na ndö ti ala.”

¹⁵Mo KOTA GBIA, mo hinga ye kue! Dabe ti mo na mbi maa! Baa lege ti mbi maa! Mo kiri na azo ti sarango ngangu na mbi, peko ti sioni so ala sara na mbi! Ayeke nzoni mo kanga be ti ku ala kungo pepe, tongaso pepe, mbi yeke baa pasi. Ayeke nzoni mo hinga, mo tene, ndali ti mo laa mbi yeke kanga be na azonga ti azo ni so.

¹⁶Gi so atënë ti mo asi na mbi, mbi mu ni si aga ye ti mbi; atënë ni amu ngia na mbi, azia ngia mingi na be ti mbi. Biani, a zia mbi nde ndali ti mo awe, KOTA GBIA Nzapa so ayeke na ndö ti dunia kue.

¹⁷Mbi duti pepe na ya ti bongbi ti azo ti hengo ndo titene mbi na ala, e sara ngia. Me mo gbu mbi na ngangu awe si mbi duti gi mbi oko yamba, ngbanga ti so mo sara si be ti mbi aso ahon ndoni.

¹⁸Ngbanga ti nyen laa pasi ti mbi ayeke hunzi pepe so? Ngbanga ti nyen laa ka ti mbi aye ti mu pepe so? A zia yoro daa gbaa so? Biani, mo ga tongana li ti ngu so ahanda mbi; na mbeni ngoi, ngu asi singo daa; na mbeni ngoi, ngu ni ahole; zo alingbi ti zia be ti lo daa pepe.

¹⁹Ndani laa, tënë so KOTA GBIA atene ayeke so: “Tongana mo kiri na mbage ti mbi, fade mbi yeke kiri na mo na kua ti mbi. Tongana mo yeke tene anengo tënë, me abuba tënë pepe, fade mo yeke duti zo ti tenengo peko ti atënë ti yanga ti mbi. Alingbi azo ti Juda laa akiri na mbage ti mo; me ayeke ti mo ti gue na mbage ti ala pepe.

²⁰Na dawa ti ala, mbi yeke sara si mo ga tongana mbeni gbagba so a sara na bengba wen, so zo alingbi ti kungbi ni pepe. Fade ala yeke tiri na mo, me ala yeke kinda mo pepe, ngbanga ti so mbi yeke na mo ti soo mo, ti zi mo na maboko ti ala; so tënë ti yanga ti KOTA GBIA laa.

²¹Fade mbi yeke gboto mo na maboko ti azo ti sioni; mbi yeke zi mo na maboko ti azo so ayeke sara ngangu na zo.”