Read sango Jérémie 17 Bible Online

Jérémie 17 - sango bible

Jérémie 17

¹“Tongana ti so a yeke de mbeti na wen na tere ti têne, wala na diaman so li ni ayeke tongana ti pondi, a su siokpari ti azo ti Juda legeoko tongaso na ndö ti be ti ala nga na tere ti adidi ti agbalaka ti ala.

²Tongana ti so ala yeke dabe ti ala na amolenge ti ala, ala yeke dabe ti ala legeoko tongaso na agbalaka ti ala, na akeke ti Ashera ti ala nga na akeke so afini kugbe ayeke daa gbani gbani si ayeke na ndö ti ahoto.

³Mo, mara ti Juda, mo so mo yeke voro anzapa nde na ndö ti ahoto nga na yaka so, fade mbi yeke zia azo titene ala ga agbu anzoni ye ti mo na amosoro ti mo kue; ala yeke gbu aye na ando so mo leke na nduzu. Mbi yeke sara ye ni ndali ti asioni ye so mo sara na sese ti mo kue.

⁴Kodro so lani mbi mu na mo si aga ye ti mo, fade mo yeke do ni ti zia. Mbi yeke sara si mo ga ngbaa ti awato ti mo na ya ti mbeni kodro so mo hinga ni pepe. Biani, mo sara si wâ ti ngonzo ti mbi alondo; wâ ni ayeke gbi kpu na kpu.”

⁵Tënë so *KOTA GBIA atene ayeke so: “Deba aga na ndö ti zo so be ti lo ahon yongoro na mbi, lo so lo zia be ti lo na ndö ti azo si lo yeke gi ngangu ti lo na lege ti senge zo ti sese!

⁶Lo yeke tongana mbeni kete keke na ndö ti kuru sese: pasa ti lo ayeke daa oko pepe titene nzoni ye aga na lo. Lo yeke ngba na ndo so gi atêne laa ayeke daa, na ndö ti sese so ingo asi singo daa, ndo so zo asara kodro daa pepe.

⁷Me tufa aga na ndö ti zo so azia be ti lo na ndö ti mbi, KOTA GBIA si zo ni ayeke gi titene mbi bata lo.

⁸Lo yeke tongana keke so a lu na tere ti ngu, keke so agunda ni ali sese na tere ti kete ngu. Tongana ndo-wâ aga, mbeto ti mbeni ye asara lo oko pepe; akugbe ti keke ni angba lakue fini ni. Ataa ngu apika pepe na ya ti ngu oko, lo yeke gi be ti lo pepe, me lo yeke le lakue.”

⁹“Be ti zo ayeke handa zo ahon tanga ti aye kue; zo alingbi ti kai kobela ni pepe. Zo wa laa alingbi ti hinga be ti zo?”

¹⁰“Mbi, KOTA GBIA, mbi yeke baa be ti zo na atënë ti be ti zo kue. Tongaso, mbi lingbi ti sara ye na zo alingbi na dutingo ti lo nga na asarango ye ti lo.

¹¹Zo so awara mosoro na legeni pepe, lo yeke tongana dodoro so alango na ndö ti para so lo laa lo du ni pepe; so zo ni angba ti te gigi, mosoro ti lo ahon si na ndani, lo ga zo so li ti lo ayeke daa pepe.”

¹²Mbeni mbata ti gbia ayeke daa so asi singo na gonda; mbata ti gbia ni ayeke na nduzu, ngbene ye na tongo nda ni; ndo so kota da ti Nzapa ti e ayeke daa laa, da so ayeke nde si ayeke nzoni kue.

¹³*KOTA GBIA, mo laa azo ti Israel azia be ti ala ti ku mo. Azo so kue ado mo azia, ayeke nzoni kamene agbu le ti ala. Azo so azia lege ti mo, ala yeke tongana azo so a su iri ti ala na ya ti fuku ti sese. Biani, ala do mo azia mo awe, KOTA GBIA, mo so mo yeke li ti ngu so ayeke mu fini na zo.

¹⁴*KOTA GBIA, sara si tere ti mbi aga nzoni si fade tere ti mbi aga nzoni; soo mbi si fade mbi soo kuâ, ngbanga ti so mo laa mbi yeke gonda mo.

¹⁵Azo ayeke tene na mbi: “Tënë ti KOTA GBIA ni ague na ndo wa? Ayeke nzoni tënë ni asi, e baa ma!”

¹⁶KOTA GBIA, mbi laa mbi pusu mo titene mo bi kpale na sese pepe. Mbi ye pepe titene lango ti kota kpale tongaso asi, mo hinga kue. Tënë so asigigi na yanga ti mbi, ni laa ayeke na le ti mo so.

¹⁷Mo so mbi kpe na mo ti bata tere ti mbi na ndembe ti ye ti ngangu, mo ga ye ti ziango mbeto na be ti mbi pepe!

¹⁸Azo so ayeke sara ngangu na mbi so, ayeke nzoni kamene agbu le ti ala, me mbi pepe! Ayeke nzoni ala do na mbeto, me mbi pepe! Sara si lango ti kota kpale aga na ndö ti ala, mo fâ ala biani biani!

¹⁹Tënë so *KOTA GBIA atene na mbi ayeke so: “Gue mo luti na yanga ti gbagba so iri ni Ti-azo-ti-kodro, ndo so laa agbia ti Juda ayeke hon ka daa ti li na Jérusalem wala ti sigigi na ya ti gbata ni. Na pekoni, fade mo yeke gue, mo luti nga na tere ti tanga ti ayanga ti gbagba ti gbata ni kue.

²⁰Fade mo yeke tene na ala: ‘Ala agbia ti Juda, ala azo ti Juda kue, ala so kue ayeke lango na Jérusalem na ala so kue ayeke hon na ndo so, ala ma tënë ti KOTA GBIA si!

²¹Tënë so lo tene ayeke so: Ala sara hange! Ala yo akungba na *lango ti wungo tere pepe, ala li na kungba na mbeni oko ti ayanga ti gbagba ti Jérusalem pepe!

²²Na lango ti wungo tere, ala mu akungba na da ti ala ti sigigi na ni pepe; ala sara mbeni kua oko pepe. Me ala bata lango ni nde ndali ti mbi tongana ti so mbi mu ando yanga daa na akotara ti ala.

²³Ti akotara ti ala ni, ala ma mbi pepe, ala dingi mê ti ala ti ma mbi pepe. Ala sara ngangu li, ala ke ti ma tënë si ala ke awango ti mbi.

²⁴‘Me ti ala, ala ma mbi nzoni; so tënë ti yanga ti KOTA GBIA laa. Na lango ti wungo tere, alingbi ala hon na akungba na ayanga ti gbagba ti gbata so pepe. Ala bata lango ni so nde ndali ti mbi, ala sara nga mbeni kua na lango ni so pepe.

²⁵Tongaso, agbia so aduti na ndö ti mbata ti gbia David, ala so ayeke tambula na ndö ti ambarata nga na apusu ti mbarata, fade ala yeke wara lege ti li na ayanga ti gbagba ti gbata ni. Akota zo ti kodro ti ala, azo ti Juda, na azo so ayeke lango na Jérusalem ayeke ngba ti li na ndo so. Ti gbata ni, azo ayeke ngba ti lango na ya ni kpu na kpu.

²⁶Tongaso nga, fade azo ayeke londo na ya ti agbata ti Juda, na ya ti akodro so angoro Jérusalem nga na sese ti Benjamin ti ga; ambeni ayeke londo na *Kodro-ti-gbeni, na Kodro-ti-nduzu nga na sese ti Negev ti ga. Ala yeke ga na ya ti kota da ti Nzapa ti mu na KOTA GBIA amara ti *sandaga nde nde: sandaga so a yeke gbi ni kue na wâ, asenge sandaga, sandaga ti ale ti kobe wala ti dukani na sandaga ti mungo singila.

²⁷Me tongana ala ma mbi pepe, tongana ala ke ti bata lango ti wungo tere nde ndali ti mbi, tongana ala yo akungba na lango ni so si ali na ni na yanga ti gbagba ti Jérusalem, fade mbi yeke bi wâ na tere ti ayanga ti gbagba ni. Wâ ni ayeke gbi apendere da ti gbata ni si ayeke mingo pepe.’ ”