Read sango Jérémie 22 Bible Online

Jérémie 22 - sango bible

Jérémie 22

¹Tënë so *KOTA GBIA atene na Jérémie ayeke so: “Gue na yangbo ti gbia ti Juda, mo tene tënë so kâ.

²Fade mo yeke tene: ‘Gbia ti Juda, mo so mo duti na ndö ti mbata ti gbia David so, ma tënë so KOTA GBIA atene! Tënë ni abaa nga agbenyogbia na azo ti kodro ti mo, ala so kue ayeke li na ayanga ti yangbo so!’

³Tënë so KOTA GBIA atene ayeke so: Ayeke nzoni ala sara ye mbirimbiri si ala baa lege ti fango ngbanga mbirimbiri. Ala zi azo so a yeke te ala na mbana na maboko ti azo so ayeke sara ngangu na azo. Awande, anyindu nga na awali-mua, ala sara pasi na ala pepe, ala sara ngangu na azo ni pepe. Azo so tënë ayeke na li ti ala pepe so, ala tuku mene ti ala na ndo so pepe!

⁴Tongana ala sara ye alingbi na atënë so, fade agbia so aduti na ndö ti mbata ti gbia David ayeke ngba lakue ti li na ayanga ti yangbo so, ala yeke tambula na ambarata wala na apusu ti mbarata. Agbia ni na agbenyogbia ti ala nga na azo ti kodro ni ayeke ngba ti li na ayanga ni.

⁵Me tongana ala, azo ti Juda, ala ma tënë so pepe — mbi KOTA GBIA, mbi deba na iri ti mbi wani — fade yangbo so ayeke ga ndo ti gba ti atêne; so tënë ti yanga ti KOTA GBIA laa.”

⁶“Tënë so KOTA GBIA atene ndali ti yangbo ti gbia ti Juda ayeke so: Ataa na le ti mbi, mo pendere tongana gbako ti sese ti Galaad, wala tongana li ti hoto ti Liban, biani, fade mbi yeke sara si mo ga tongana benyama, wala mbeni gbata so azo alango daa pepe.

⁷Mbi yeke tokua azo ti ga na tere ti mo, ala yeke ga ti buba aye ti mo kue; zo oko oko ayeke ga na ye ti bira ti lo. Angbongboro pendere keke ti sedre ti mo so, ala yeke de ni na sese si ala bi na le ti wâ.

⁸“Awande mingi ayeke hon nduru na tere ti gbata so; ala yeke hunda tere ti ala, atene: ‘Ae! KOTA GBIA asara mara ti ye tongaso na kota gbata so ngbanga ti nyen?’

⁹Tongaso, fade a yeke kiri tënë na ala: ‘Ayeke ndali ti so azo ti gbata ni abuba ya ti *mbuki so ala na KOTA GBIA Nzapa ti ala asara: ala kuku na gbe ti anzapa nde ti voro ala.’ ”

¹⁰Ala azo ti Juda, lo so akui awe so, ala toto lo pepe! Ala toto tere ti ala ndali ti lo pepe! Me ala toto mingi ndali ti lo so ayeke hon hongo so. Ala toto lo mingi, ngbanga ti so kodro so a du lo daa, lo yeke kiri ti baa ni pepe.

¹¹Biani, tënë so KOTA GBIA atene ayeke so; tënë ni ayeke ndali ti Shalum, molenge ti Yosias, gbia ti Juda, lo so lo le-gbia na peko ti babâ ti lo si lo sigigi na ndo so lo hon awe; KOTA GBIA atene: “Fade lo yeke kiri na ndo so pepe;

¹²lo yeke kui na ndo so a gbu lo si a gue na lo daa, lo yeke kiri ti baa kodro ti lo pepe.”

¹³“So mawa na mo, Yoakim! Mo kpe fango ngbanga ti mbirimbiri pepe; mo laa mo yeke leke gi yangbo ti mo so! Mo yeke leke ada-nduzu ni na ndö ti tere, na ndö ti tere; me fango ngbanga na legeni, mo yeke ne ni pepe. Azo ayeke sara kua na mo gi senge senge, mo yeke futa ala oko pepe!

¹⁴Mo tene: ‘Mbi ye ti leke ndali ti mbi mbeni da so akono mingi, aya ni akono ahon ndoni.’ Mo zi afenetere daa; adere ti da ni kue gi na keke ti sedre si mo zia bengba mbamba na tere ni!

¹⁵Na lege ti sarango da na keke ti sedre si mo ye ti fa atene, mo hinga ti le-gbia? Babâ ti mo ate, anyon ando, lo fâ ngbanga mbirimbiri si lo sara ye ti mbirimbiri; so asara si lo baa nzoni mingi.

¹⁶Zo ti mawa na wayere, lo fâ ngbanga ti ala na legeni; so asara si lo baa nzoni mingi. So tënë ti yanga ti KOTA GBIA laa.

¹⁷Me ti mo, mo yeke gi gi nzoni ti mo wani; nilaa azo so tënë ayeke na li ti ala pepe, mo ye gi ti tuku mene ti ala senge senge; mo ye gi ti sara ngangu na azo, ti sara ala na ngangu, na ngangu.”

¹⁸Baa, tënë so KOTA GBIA atene ndali ti Yoakim, molenge ti Yosias, gbia ti Juda ayeke so: “Na ndembe ti kuâ ti lo, zo ayeke he bia ti totongo kuâ ndali ti lo pepe; wala ti tene pepe: ‘Ae ita ti mbi ti koli, so ye ti mawa ti nyen!’ ‘Ae ita ti mbi ti wali, so ye ti mawa ti nyen!’ Zo ayeke he bia ti totongo kuâ ndali ti lo pepe, atene: ‘Ae gbia, so ye ti mawa ti nyen!’ ‘Ae kota zo, so ye ti mawa ti nyen!’

¹⁹Fade a yeke lu kuâ ti lo tongana ti nyama, a yeke gboto kuâ ti lo na sese ti bi na gigi, yongoro na ayanga ti gbagba ti Jérusalem.”

²⁰“Jérusalem, gue na li ti hoto ti Liban si mo dekongo ngangu. Na sese ti Bashan, sara si azo ama go ti mo. Na ndö ti hoto ti Abarim, dekongo ngangu! Biani, ti andeko ti mo ahunzi awe.

²¹Lani mbi gboto mê ti mo na ndembe so mo duti na siriri, me mo kiri tënë: ‘Zia mê ti mbi, mbi ke awe!’ So fini ye pepe: sarango ye ti mo ngbene ye na molenge laa; laoko mo ma tënë ti mbi pepe!

²²Azo ti li ti kodro ti mo kue, fade pupu ayeke ya ti mu ala ti hon na ala; a yeke gbu andeko ti mo ti gue na ala na kodro wande. Ndali ti sioni ye so kue mo sara, nengo ti mo ayeke ti na sese si kamene ahon ndö ti mo.

²³Mo so lani mo duti kpoo na ndö ti hoto ti Liban; lani mo sara da ti mo na ya ti keke ti sedre tongana ti ndeke, fade mo yeke dema na ndembe so pasi ayeke ga na ndö ti mo; ye ayeke gboto mo si mo yeke do tere ti mo tongana wali na ndembe ti dungo ni!”

²⁴“Fade mo yeke tene na Konia, molenge ti Yoakim, gbia ti Juda, mo tene: ‘Fini ti mbi! Ataa mo yeke fade tongana *ye ti kpongo na nzoroko so a yeke kpo na ndö ti mbeti si mbi zia na maboko ti mbi ti koli, ka mbi yeke gboto mo ti zi mo na li ti maboko ti mbi; so tënë ti yanga ti KOTA GBIA laa.

²⁵Mbi yeke sara si mo ti na maboko ti azo so aye gi kuâ ti mo, azo so mo sara mbeto ti ala mingi, so ti tene gbia Nabukodonosor na aturugu ti lo.

²⁶Mo na mama ti mo, mbi yeke bi ala na ya ti mbeni kodro so a du ala daa pepe; fade ala yeke kui kâ.

²⁷Nzara ti kiringo na ya ti kodro ti ala wani ayeke gbi be ti ala, me ala yeke kiri oko pepe.’ ”

²⁸Azo ayeke hunda ndo, atene: “Koli so, Konia so, lo yeke mbeni ta so ya ni afâ awe? So ti tene mbeni ta so zo alingbi ti sara na kua pepe? Lo ga mbeni ta so zo aye ni mbeni pepe? Ngbanga ti nyen si a tumba lo, lo na amolenge ti lo si a bi ala na ya ti mbeni kodro so ala hinga ni pepe so?”

²⁹Kodro ti mbi, kodro ti mbi! Ma tënë ti KOTA GBIA si!

³⁰Tënë so lo tene ayeke so: “Ala su iri ti koli so na mbeti ti fa so lo yeke na molenge pepe, gigi ti lo abuba awe! Biani, mbeni *hale ti lo oko ayeke wara lege pepe ti duti na ndö ti mbata ti gbia David, ti sara komandema na sese ti Juda.”