Read sango Jérémie 23 Bible Online

Jérémie 23 - sango bible

Jérémie 23

¹“So mawa! Awabatango-taba azia ataba ti mbi, ala yeke kui si ala yeke kangbi kirikiri!” So tënë ti yanga ti *KOTA GBIA laa.

²Ndani laa, tënë so KOTA GBIA, Nzapa ti Israel atene ndali ti awabatango-taba ni ayeke so; so ti tene ala so ayeke bata azo ti mbi so: “Ala zia ataba ti mbi akangbi kirikiri awe, ala tumba ataba ni, ala baa lege ti ala pepe. Ti mbi, mbi yeke baa lege ti ala, awabatango-taba ni, ndali ti asioni sarango ye ti ala; so tënë ti yanga ti KOTA GBIA laa.

³“Na pekoni, mbi wani, mbi yeke bongbi tanga ti ataba ti mbi na ya ti akodro so kue mbi kangbi ando ala daa. Fade mbi yeke kiri na ala na ndo ti tengo pere ti ala. Kâ, ala yeke kiri ti du mingi si ala ga gbani gbani.

⁴Mbi yeke zia na li ti ala awabatango-taba so fade ayeke bata ala nzoni. Tongaso, mbeto ayeke kiri ti sara ataba ni pepe, ala yeke do nga na mbeto pepe si mbeni oko ti ala ayeke kiri ti girisa pepe; so tënë ti yanga ti KOTA GBIA laa.”

⁵“So tënë ti yanga ti KOTA GBIA laa: Baa, mbeni lango ayeke ga so mbi yeke sara titene taa *hale ti David abaa gigi. Lo yeke sigigi tongana kete keke so asigigi na ya ti sese. Lo yeke le-gbia tongana nzoni gbia, lo yeke sara ye na lege ti ndara, lo yeke fâ ngbanga mbirimbiri si lo yeke sara ye ti mbirimbiri na ya ti kodro ni.

⁶Na ngoi ti lo, fade a yeke soo kodro-gbia ti Juda, mbeni ye ti sioni ti si na Israel ayeke duti daa pepe. Iri so fade azo ayeke iri na lo laa: ‘KOTA GBIA ayeke mbirimbiri ti e.’

⁷“So tënë ti yanga ti KOTA GBIA laa: Biani, mbeni lango ayeke ga so azo ayeke kiri ti tene pepe: ‘Na iri ti KOTA GBIA so ayeke na fini, lo so lo sara si azo ti Israel asigigi na sese ti Ezipte…’

⁸Me azo ni ayeke tene: ‘Na iri ti KOTA GBIA so ayeke na fini, lo so lo sara si ahale ti Israel asigigi na kodro ti mbage ti Banga nga na akodro so kue lo kangbi ando ala daa. Fade ala yeke kiri ti duti na ndö ti sese ti ala wani!’ ”

⁹Tënë na ndö ti awayanga-Nzapa: Be ti mbi afâ na ya ni kâ, tere ti mbi kue ayeke do. Mbi yeke tongana zo so anyon samba ahon ndö ti lo ngangu mingi. Aye so kue asi na mbi ndali ti *KOTA GBIA nga ndali ti atënë ti lo so ayeke nde si ayeke nzoni kue. Lo tene:

¹⁰“Kodro so asi singo na azo ti sarango aye ti ndumba. Sese ni ayeke na mua ndali ti adengo ba, ndo ti tengo pere ti anyama ahole kasakasa. Azo ni ayeke kpe gi na peko ti ye ti sioni; be ti ala awoko pepe na sarango ye so akpa pepe.

¹¹Ataa awayanga-Nzapa na awayango-sandaga, ala kue aga sioni. Ataa na ya ti kota da ti mbi, mbi baa peko ti asioni sarango ye ti ala ni; so tënë ti yanga ti KOTA GBIA laa.

¹²Ndani laa, fade lege ti ala ayeke *zene zenengo. Ala yeke pika gere ti ala na ya ti vukongo ndo si ala yeke ti. Biani, fade mbi yeke sara si sioni kpale aga na ndö ti ala na ndembe so mbi yeke ga na tere ti ala; so tënë ti yanga ti KOTA GBIA laa.”

¹³“Na popo ti awayanga-Nzapa ti Samarii, mbi baa ye ti ziango ngonzo na be ti zo: ala tene peko ti tënë ti yanga ti *Baal, ala sara si Israel, azo ti mbi, ague kirikiri.

¹⁴Me na popo ti awayanga-Nzapa ti Jérusalem, mbi baa kota ye ti buba: ala yeke lango na awali kirikiri, tenengo mvene aga ye ti tere ti ala, ala yeke mu maboko na azo ti sarango sioni. Tongaso, zo oko ti zia sioni ti lo ayeke daa pepe. Na le ti mbi, awayanga-Nzapa ni kue aga tongana azo ti Sodome; azo ti Jérusalem aga tongana azo ti Gomore.”

¹⁵Tongaso, tënë so *KOTA GBIA so ayeke na ndö ti dunia kue atene na tere ti awayanga-Nzapa ayeke so: “Mbi yeke mu na ala sengo pere, ala te, mbi yeke mu na ala ngu so a tuku sioni yoro daa, ala nyon. Biani, na lege ti awayanga-Nzapa ti Jérusalem laa sioni asigigi, asua ngbii amu ya ti kodro ni kue.”

¹⁶Tënë so *KOTA GBIA so ayeke na ndö ti dunia kue atene ayeke so: “Atënë so awayanga-Nzapa ni ayeke tene na ala na iri ti mbi so, ala ma ni pepe, ala yeke handa ala handango. Atënë so awayanga-Nzapa ni ayeke fa na ala so, atënë ni alondo na li ti ala wani, alondo na yanga ti mbi, KOTA GBIA pepe.

¹⁷Awayanga-Nzapa ni ayeke tene lakue na azo so ayeke he mbi, atene: ‘KOTA GBIA atene: Ti ala, fade ye kue ayeke tambula nzoni!’ Ala yeke tene na azo so ayeke sara ye gi na lege ti ngangu li ti ala wani, atene: ‘Fade mbeni sioni ye ayeke si na ala pepe’.

¹⁸Me zo wa laa aduti na ya ti bongbi ti mbi KOTA GBIA, zo wa? Zo wa laa abaa mbi na tenengo tënë ni, zo wa? Zo wa laa ama tënë ni, zo wa? Zo wa laa adingi mê ti lo ti ma tënë ni, zo wa? Zo wa laa ama nda ni, zo wa?”

¹⁹Baa, ngangu pupu ti KOTA GBIA ayeke ga, sioni ngonzo ti lo alondo awe, sioni pupu ti ngu-Nzapa ayeke ya si ayeke turne wirrr ti ti na li ti azo ti sioni.

²⁰Ngonzo ti KOTA GBIA ayeke kai ande pepe ngbii ye so lo leke na be ti lo ti sara, lo sara ni kue si. Gbanda si ala yeke ma ya ti tënë so nzoni.

²¹“Mbi tokua ti mbi awayanga-Nzapa so pepe, me ala laa ayeke mu loro ti be ti ala; mbi tene nga tënë na ala pepe, me ala yeke tene peko ti tënë ti yanga ti mbi.

²²Tongana ala duti fade na ya ti bongbi ti mbi, ka ala yeke tene peko ti atënë ti mbi na azo ti mbi biani; ka ala yeke sara si azo ni azia ngbene lege ti sarango ye ti ala si azo ni azia nga sioni sarango ye ti ala.”

²³“Mbi yeke gi Nzapa ti ye so ayeke nduru ge? Mbi yeke nga Nzapa ti ye so ayeke na yongoro ndo pepe? So tënë ti yanga ti *KOTA GBIA laa.

²⁴Tongana mbeni zo ahonde tere ti lo, mbi lingbi ti baa lo pepe? So tënë ti yanga ti KOTA GBIA laa. Mbi yeke na ndo kue: ataa na yayu wala na sese; ala hinga tongaso pepe? So tënë ti yanga ti KOTA GBIA laa.”

²⁵“Atënë so awayanga-Nzapa ayeke tene na peko ti yanga ti mbi so, mbi ma ni kue awe. Ala tene, ani yeke fa tënë na iri ti mbi, andaa gi mvene laa ala yeke tene. Ala yeke tene: ‘Mbi baa li ti mbi! Mbi baa li ti mbi!’

²⁶Ala yeke ngba ti sara ye so ngbii asi lawa? Nyen laa asara li ti awayanga-Nzapa ni so si ala ngba ti fa atënë ti mvene tongaso so? So ayeke gi atënë so alondo na li ti ala wani ti handa na azo!

²⁷Ala baa ti ala atene, na lege ti abango-li ti ala so ala yeke tene peko ni na amba ti ala so laa, ala lingbi ti sara si iri ti mbi akai na yanga ti azo ti mbi? Ala ye ti sara legeoko tongana akotara ti ala so agirisa ando iri ti mbi ndali ti *Baal so?

²⁸Tongana mbeni wayanga-Nzapa abaa li ti lo, lo tene peko ni na azo ma! Me tongana lo wara mbeni tënë so alondo na yanga ti mbi, ayeke nzoni lo tene ni kue na legeni! Aporo ti le ti kobe na ale ti kobe alingbi tere? So tënë ti yanga ti KOTA GBIA laa.

²⁹Tënë ti mbi ayeke tongana wâ; so tënë ti yanga ti KOTA GBIA laa; tënë ni ayeke tongana ngangu martoo so ayeke suru ya ti kota têne!”

³⁰So tënë ti yanga ti KOTA GBIA laa: “Awayanga-Nzapa so ayeke nzi tënë ti mbi na popo ti ala so, fade mbi na ala, e yeke baa ya ni.

³¹Biani, so tënë ti yanga ti KOTA GBIA laa: awayanga-Nzapa so amu tënë ti yanga ti ala wani tongana ti mbi so, mbi na ala, e yeke baa ya ni.

³²Awayanga-Nzapa so ayeke tene peko ti bango-li ti mvene so, mbi na ala, e yeke baa ya ni; so tënë ti yanga ti KOTA GBIA laa. Na tenengo peko ti bango-li ni, ala yeke handa azo ti mbi ti gue kirikiri na lege ti atënë ti mvene ti ala nga na lege ti baba ti ala. Mbi, mbi tokua ala pepe, mbi mu yanga na ala pepe; ala yeke sara nzoni na azo ti mbi oko pepe; so tënë ti yanga ti KOTA GBIA laa.”

³³*KOTA GBIA atene na Jérémie: “Tongana azo so, wala mbeni wayanga-Nzapa, wala mbeni wayango-sandaga ahunda mo, atene: ‘Nengo tënë ti KOTA GBIA so lo zia na ndö ti e tongana nengo kungba so ayeke so wa?’ Fade mo kiri tënë na ala, mo tene: ‘Ala laa ayeke nengo kungba ni. Ndani laa, fade mbi yeke bi ala yongoro; so tënë ti yanga ti KOTA GBIA laa.’

³⁴Tongana mbeni wayanga-Nzapa, wala mbeni wayango-sandaga wala mbeni zo na popo ti azo so atene: ‘Nengo kungba so KOTA GBIA azia na ndö ti mbi laa’, mbi yeke ga na tere ti zo ni so, lo na asewa ti lo.

³⁵Tënë so ala yeke tene ande na popo ti ala na amba ti ala laa: ‘KOTA GBIA akiri tënë, lo tene nyen?’ wala ‘KOTA GBIA atene nyen?’

³⁶Me alingbi ala kiri atene pepe: ‘Nengo kungba so KOTA GBIA azia na ndö ti zo tongaso laa’. Tënë ti KOTA GBIA alingbi ti duti mbeni nengo kungba na ndö ti zo? Oko pepe! Me tongana ala tene tënë tongaso, andaa ala yeke ba ya ti tënë ti Nzapa so ayeke na fini, KOTA GBIA so ayeke na ndö ti dunia kue, Nzapa ti e.

³⁷Baa, tënë so fade mo yeke tene na mbeni wayanga-Nzapa laa: ‘KOTA GBIA akiri tënë na mo, lo tene nyen? KOTA GBIA atene nyen?’

³⁸Tongana ala ngba ti tene: ‘Nengo kungba so KOTA GBIA azia na ndö ti e laa’, ataa so mbi ke na ala ti tene tënë ni, tongaso, tënë so mbi, KOTA GBIA, mbi tene ayeke so:

³⁹fade mbi yeke yo ala na ndö ti go ti mbi tongana nengo kungba si mbi yeke bi ala yongoro, ala na gbata so mbi mu ando na ala nga na akotara ti ala.

⁴⁰Fade mbi yeke sara si kamene agbu le ti ala kpu na kpu; ala yeke ti buba lakue lakue, zo ayeke girisa tënë ni pepe.”