Read sango Jérémie 27 Bible Online

Jérémie 27 - sango bible

Jérémie 27

¹So Yoakim, molenge ti Yosias ato nda ti le-gbia na sese ti Juda, tënë ti *KOTA GBIA so asi na Jérémie, atene:

²“Tënë so KOTA GBIA atene ayeke so: Leke akota kamba, leke nga *zuge, mo zia ni na ndö ti go ti mo.

³Na pekoni, mo yeke tokua ni na gbia ti Edom, ti Moab, ti Amon, ti Tir na ti Sidon; mo yeke mu ni na alembe ti agbia ni so aga na Jérusalem ti baa gbia Sedesias titene ala gue na ni.

⁴Fade mo yeke mu yanga na alembe ni ti gue ti tene na akota zo ti ala gi tënë so mbi tene na ala; alembe ni ayeke tene: Tënë so KOTA GBIA so ayeke na ndö ti dunia kue, Nzapa ti Israel atene ayeke so:

⁵Mbi laa mbi sara sese, azo na anyama so kue ayeke na ndö ti sese na lege ti kota ngangu ti mbi, na lege ti maboko ti mbi so mbi yoro. Mbi mu ala na zo so be ti mbi aye.

⁶Fadeso, mbi zia akodro so kue na maboko ti zo ti kua ti mbi Nabukodonosor, gbia ti Babilone. Ataa anyama ti ngonda, mbi mu ala na lo titene ala sara kua na lo.

⁷Fade amara kue ayeke sara kua na lo; ala yeke sara kua na molenge ti lo nga na ata ti lo ngbii asi na ngoi so kodro ti lo wani ayeke ti na gbe ti ambeni mara nga na agbia so ayeke ngangu ahon lo.

⁸“Tongana mbeni mara wala mbeni kodro-gbia ake ti sara kua na Nabukodonosor, gbia ti Babilone, tongana mara ni wala kodro ni ake ti yoro go ti lo na gbe ti zuge ti gbia ti Babilone, mbi yeke ga na tere ti mara ni na lege ti bira, kota nzara na sioni kobela ti bubango kodro. Na lege ti lo, mbi yeke sara si kodro ni abuba biani biani.

⁹“Ti ala, ala ma awayanga-Nzapa ti ala pepe, ala ma azo ti bango nda ti aye ti ala pepe, ala ma azo ti fango nda ti abango-li pepe, wala azo so ayeke fa nda ti ambinda wala azo so ayeke sara aye ti mazi. Azo ni kue ayeke tene na ala atene, fade ala yeke ti na gbe ti gbia ti Babilone pepe.

¹⁰Me ye so azo ni ayeke tene na ala na peko ti yanga ti mbi so ayeke mvene. Tongana ala ma azo ni, fade a yeke gue na ala yongoro na sese ti ala. Biani, fade mbi yeke kangbi ala kirikiri si ala yeke kui.

¹¹“Me mara so ayeke yeda ti yo zuge so gbia ti Babilone ayeke zia na ndö ti go ti lo, tongana mara ni ayeda ti sara kua na gbia ti Babilone, mbi yeke zia mara ni kpoo na ndö ti sese ti lo, lo lingbi ti fâ yaka si lo lango na sese ni; so tënë ti yanga ti KOTA GBIA laa.”

¹²Mbi Jérémie, mbi tene na Sedesias, gbia ti Juda, gi oko tënë so, mbi tene: “Ayeke nzoni ala yeda ti yo zuge so gbia ti Babilone azia na ndö ti go ti ala, ala sara kua na lo nga na azo ti kodro ti lo, tongaso si fade ala, azo ti Juda, ala yeke ngba na fini.

¹³Ngbanga ti nyen si mo ye ti kui, mo na azo ti kodro ti mo na lege ti bira, kota nzara na sioni kobela ti bubango kodro? Tongana ti so KOTA GBIA atene, ye so ayeke si ande na mara so kue ayeke ke ti sara kua na gbia ti Babilone laa.

¹⁴Ambeni wayanga-Nzapa ayeke tene na ala, atene: ‘Ala azo ti Juda, fade ala yeke sara kua na gbia ti Babilone pepe!’ Ala ma awayanga-Nzapa ni so pepe, ngbanga ti so atënë ti mvene laa ala yeke tene na ala na peko ti yanga ti mbi so.

¹⁵So tënë ti yanga ti KOTA GBIA laa: ‘Mbi tokua ala pepe. Gi tënë ti mvene laa ala yeke tene na iri ti mbi so. Fade mbi yeke tumba ala, azo ti Juda ge si ala yeke kui, ala na awayanga-Nzapa so ayeke tene na ala peko ti tënë ti yanga ti mbi so.’ ”

¹⁶Mbi Jérémie, mbi tene na awayango-sandaga nga na azo so kue ayeke lani kâ, mbi tene: “Tënë so KOTA GBIA atene ayeke so: ‘Ambeni wayanga-Nzapa ayeke tene na ala atene, fade a yeke mu akungba ti ya ti kota da ti Nzapa so ayeke na Babilone ti kiri na ni gi fafadeso; ala ma awayanga-Nzapa ni pepe, ngbanga ti so gi atënë ti mvene laa ala yeke tene na peko ti yanga ti mbi so.

¹⁷Ala ma awayanga-Nzapa ni pepe! Ala sara kua na gbia ti Babilone si fade ala yeke ngba na fini! Ala ye titene gbata so aga ndo ti gba ti atêne ngbanga ti nyen?’

¹⁸“Tongana azo ni so ayeke taa awayanga-Nzapa, tongana biani KOTA GBIA laa azia tënë ti lo na yanga ti ala, ayeke nzoni ala voro tere ti ala na KOTA GBIA so ayeke na ndö ti dunia kue titene akungba so angba na ya ti kota da ti Nzapa ge, akungba so angba na yangbo ti gbia ti Juda na ti so angba na Jérusalem, azo amu ahon na ni na Babilone pepe.

¹⁹Biani, tënë so KOTA GBIA so ayeke na ndö ti dunia kue atene ndali ti angbongboro yongoro gere ti da, kota sembe, apusu nga ndali ti tanga ti akungba so angba na Jérusalem laa.

²⁰— Aye ni kue laa Nabukodonosor agbu na Jérusalem si ague na ni na Babilone pepe, na ndembe so lo gbu Yekonia, molenge ti Yoakim, gbia ti Juda, lo na akota zo kue ti Juda na ti Jérusalem. —

²¹Tënë so KOTA GBIA so ayeke na ndö ti dunia kue, Nzapa ti Israel, atene ndali ti akungba so angba na ya ti kota da ti Nzapa, wala akungba so angba na yangbo ti gbia ti Juda wala ti so angba na Jérusalem; tënë ni ayeke so:

²²‘Fade a yeke gue na akungba ni kue na Babilone, ayeke ngba kâ ngbii asi na ndembe so mbi yeke baa lege titene a kiri na ni ge.’ ” So tënë ti yanga ti KOTA GBIA laa.