Read sango Jérémie 29 Bible Online

Jérémie 29 - sango bible

Jérémie 29

¹Tënë ti ya ti mbeti ni laa, mbeti so Jérémie asu na Jérusalem si atokua na *akangba, awayango-sandaga, awayanga-Nzapa na tanga ti azo so kue Nabukodonosor agbu ala na Jérusalem si ague na ala na Babilone.

²Lo tokua mbeti ni na peko ti so gbia Yekonia, na gbia-wali, na akota zo ti yangbo ti gbia, akota zo ti sese ti Juda na ti Jérusalem, azo ti pikango ndao nga na azo ti sarango ye na kode alondo na Jérusalem awe.

³Jérémie amu mbeti ni na Elasa, molenge ti Shafan nga na Gemaria, molenge ti Hilkia titene ala gue na ni. Biani, Sedesias, gbia ti Juda atokua fade ala na Babilone na gbia Nabukodonosor. Tënë ti ya ti mbeti ni ayeke tongaso:

⁴“Tënë so *KOTA GBIA so ayeke na ndö ti dunia kue, Nzapa ti Israel atene ndali ti azo so kue lo sara si a gbu ala na Jérusalem si a gue na ala na Babilone ayeke so:

⁵‘Ala sara ada titene ala lango daa; ala fâ ayaka titene ala te ale ti kobe ni.

⁶Ala mu awali wala akoli, ala du amolenge-koli nga na amolenge-wali. Ala mu awali na amolenge ti ala ti koli; ala zia amolenge ti ala ti wali titene akoli amu ala si ala nga adu amolenge. Ayeke nzoni ala, azo ti Juda, ala wu mingi mingi na ndo ni kâ, wungo ti ala akiri na peko pepe!

⁷Ala gi lege ngangu ti sara si gbata so KOTA GBIA ague na ala daa so amai. Ala sambela KOTA GBIA ndali ti gbata ni, ngbanga ti so maingo ti ala wani alondo gi na maingo ti gbata ni.’

⁸“Biani, tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Awayanga-Nzapa so ayeke lango na popo ti ala, azo ti Jérusalem, ala zia lege na ala pepe ti handa ala; ala zia nga lege pepe na azo ti bango nda ti aye. Azo so ayeke fa nda ti abango-li ti ala, ala dingi mê ti ala ti ma tënë ti azo ni pepe.

⁹Peko ti tënë ti yanga ti mbi so azo ni ayeke tene na ala na iri ti mbi so, ayeke mvene. Mbi tokua ala pepe’; so tënë ti yanga ti KOTA GBIA laa.

¹⁰“Tënë so KOTA GBIA akiri atene ayeke so: ‘Tongana ngu balembarambara so a diko ndali ti Babilone so ahon awe, mbi yeke ga ti baa lege ti ala; nzoni ye so mbi mu zendo ti sarango ni na ala, fade mbi yeke sara ni: mbi yeke kiri na ala ge na Jérusalem.

¹¹Biani, mbi KOTA GBIA, mbi hinga apialo so mbi leke ndali ti ala, apialo titene ala baa sioni daa pepe, me apialo titene ala baa nzoni daa; so tënë ti yanga ti KOTA GBIA laa. Mbi ye ti mu na ala ye so ala lingbi ti zia be ti ala ti ku ni ndali ti gigi ti ala ti gbanda.

¹²Tongaso, tongana ala di iri ti mbi si ala gue ti sambela mbi, fade mbi yeke ma ala.

¹³Fade ala yeke gi mbi si ala yeke wara mbi. Tongana ala gi mbi na be ti ala kue,

¹⁴fade mbi yeke zia lege titene ala wara mbi; so tënë ti yanga ti KOTA GBIA laa. Mbi yeke sara titene ala kiri na kozo ndo ti ala; mbi yeke zi ala na ya ti kodro so kue nga na ando so kue mbi kangbi ala ando daa ti bongbi ala na ndo oko; mbi yeke kiri na ala na ndo so a gbu ala ando daa si a gue na ala na kodro wande so’; so tënë ti yanga ti KOTA GBIA laa.

¹⁵“KOTA GBIA atene atënë so kue na ala, ngbanga ti so ala tene: ‘KOTA GBIA amu na e awayanga-Nzapa na Babilone.’

¹⁶“Fadeso, tënë so KOTA GBIA atene ndali ti gbia so aduti na ndö ti mbata ti gbia na peko ti David laa; tënë so KOTA GBIA atene nga ndali ti azo so angba ti lango na ya ti gbata ti Jérusalem laa; so ti tene a-ita ti ala so a gue na ala na kodro wande legeoko na ala pepe so.

¹⁷Tënë so KOTA GBIA so ayeke na ndö ti dunia kue atene ayeke so: ‘Mbi yeke tokua na ndö ti ala bira, nzara na sioni kobela ti bubango kodro. Mbi yeke sara titene ala kpa afige so afun awe, so ayeke sioni ahon ndoni si akpa titene zo ate ni pepe so.

¹⁸Mbi yeke tumba peko ti ala na lege ti bira, nzara na sioni kobela ti bubango kodro. Mbi yeke sara tongaso si akodro-gbia ti sese kue ado na kota mbeto na bango ala. Na ya ti akodro so kue mbi yeke kangbi ala daa, ala yeke ga tapande ndali ti azo so ayeke deba amba ti ala; ala yeke ga ye ti dongo be nga na ye so azo ayeke huru yanga ti ala na bango ni.

¹⁹Biani, ala ma tënë ti mbi pepe, ataa so mbi mu ngoi ti mbi kue ti tokua na ala awayanga-Nzapa so ayeke azo ti kua ti mbi; so tënë ti yanga ti KOTA GBIA laa. Me ala ma awayanga-Nzapa ni pepe; so tënë ti yanga ti KOTA GBIA laa.’

²⁰“Ala, azo so a gbu ala si a gue na ala na kodro wande, ala so KOTA GBIA amu ala na Jérusalem si atokua ala na Babilone so, ala ma tënë ti KOTA GBIA si!

²¹“Tënë so KOTA GBIA so ayeke na ndö ti dunia kue, Nzapa ti Israel atene na ndö ti Ahab, molenge ti Kolaya na Sidekia, molenge ti Maaseya ayeke so: ala use kue ayeke awayanga-Nzapa ti mvene, ataa so ala yeke tene peko ti atënë ti yanga ti Nzapa na azo, atene: ‘Mbi yeke zia awayanga-Nzapa ni na maboko ti Nabukodonosor, gbia ti Babilone si lo yeke fâ ala na gbe ti le ti ala, azo ti Jérusalem.

²²Azo ti Juda so kue a gbu ala si a gue na ala na Babilone, fade ala yeke mu iri ti akoli use ti deba na amba ti ala. Biani, fade azo ti Juda ni ayeke tene: Ayeke nzoni KOTA GBIA asara na mo gi mara ti ye so lo sara na Sidekia nga na Ahab so gbia ti Babilone azö ala na le ti wâ so!’

²³Ye so ayeke si na ala, ngbanga ti so ala sara kota ye ti kamene na sese ti Israel. Biani, ala lango na awali ti amba ti ala si ala tene, ani yeke tene peko ti atënë ti yanga ti mbi, ataa so mbi mu yanga na ala oko pepe. Mbi hinga ye so kue si mbi baa ye so kue.” So tënë ti yanga ti KOTA GBIA laa.

²⁴Fade mo yeke tene na Shemaya, zo ti Nehelam, mo tene:

²⁵Tënë so *KOTA GBIA so ayeke na ndö ti dunia kue, Nzapa ti Israel atene ayeke so: Mo su mbeti na iri ti mo, mo tokua na azo so kue ayeke na Jérusalem, na wayango-sandaga Sefania, molenge ti Maaseya nga na tanga ti awayango-sandaga kue. Tënë so mo yeke tene na ya ti mbeti ni ayeke so:

²⁶“KOTA GBIA amu mo ti ga wayango-sandaga na peko ti Yoyada awe. Alingbi mo baa ndo na ndö ti azo ti gbogbolinda so atene, ala yeke awayanga-Nzapa si ala yeke sara kua na ya ti kota da ti Nzapa so. Alingbi mo kanga ala na ya ti olongbo, mo zia zingiri na go ti ala.

²⁷Jérémie, zo ti gbata ti Anatot atene, ni yeke wayanga-Nzapa na popo ti ala; mo suku na lo pepe ngbanga ti nyen?

²⁸Lo tokua mbeti gi fafadeso na e ge na Babilone. Tënë so lo tene na ya ti mbeti ni laa: ‘Ala yeke ninga ande kâ mingi! Tongaso, alingbi ala sara ada titene ala lango daa, ala fâ ayaka titene ala te ale ti kobe ni.’ ”

²⁹Wayango-sandaga Sefania adiko mbeti ni na wayanga-Nzapa Jérémie.

³⁰Tongaso, tënë ti KOTA GBIA asi na Jérémie, atene:

³¹“Tokua tënë so na azo so a gbu ala si a gue na ala na kodro wande, mo tene: ‘Tënë so KOTA GBIA atene na ndö ti Shemaya, zo ti Nehelam ayeke so: Shemaya atene, ni yeke tene peko ti tënë ti yanga ti mbi na ala, me mbi tokua lo pepe. Lo pusu ala ti zia be ti ala gi na ndö ti atënë ti mvene.

³²Nilaa, tënë so mbi KOTA GBIA, mbi tene ayeke so: mbi yeke ga na tere ti Shemaya, lo na *ahale ti lo; mbeni zo ti sewa ti lo ayeke kiri ti ngba na popo ti ala, azo ti Juda pepe. Nzoni ye so mbi yeke sara na azo ti mbi, zo oko na popo ti asewa ti lo ayeke baa ni pepe, ngbanga ti so lo pusu azo ti mbi ti tomboka na tere ti mbi; so tënë ti yanga ti KOTA GBIA laa.’ ”