Read sango Jérémie 30 Bible Online

Jérémie 30 - sango bible

Jérémie 30

¹Tënë ti *KOTA GBIA asi na Jérémie, atene:

²“Tënë so KOTA GBIA, Nzapa ti Israel atene ayeke so. Atënë so kue mbi tene na mo so, mo su ni na mbeti.

³So tënë ti yanga ti KOTA GBIA laa: Mbeni lango ayeke ga so mbi yeke sara titene azo ti Israel na azo ti Juda so ayeke azo ti mbi akiri na kozo ndo ti ala. Fade mbi yeke kiri na ala na ya ti kodro so mbi mu ando na akotara ti ala; ala yeke kiri ti mu ni titene aga ye ti ala; mbi KOTA GBIA laa, mbi tene.”

⁴Tënë so KOTA GBIA atene ndali ti Israel na Juda ayeke so:

⁵“Tënë so KOTA GBIA atene ayeke so: E ma dekongo ti ye ti mbeto; ye ti kota mbeto laa, me ti siriri pepe.

⁶Ala hunda ndo si ala baa ndo: Koli adu molenge laoko awe? Me ngbanga ti nyen si mbi baa akoli kue azia maboko na ndö ti ngbonda ti ala tongana wali na ndembe ti dungo ni so? Ngbanga ti nyen si le ti ala kue gi na mawa so?

⁷So ye ti vundu ti nyen! So ayeke kota lango mingi; mbeni lango ti lingbi na ni ayeke daa pepe! So ayeke lango ti kota vundu ndali ti *ahale ti Jacob! Me fade ala yeke soo kuâ.”

⁸“So tënë ti yanga ti KOTA GBIA so ayeke na ndö ti dunia kue laa: Tongana lango ni alingbi awe, fade mbi yeke fâ ya ti *zuge so ayeke ne na go ti ala, mbi yeke zi azingiri ti ala. Tongaso ala yeke kiri ti duti ngbaa ti awande pepe,

⁹me ala yeke sara na mbi, KOTA GBIA Nzapa ti ala. Ala yeke sara nga na mbeni hale ti David, gbia so mbi yeke zia lo na ndö ti ala.”

¹⁰“Ti mo Israel, zo ti kua ti mbi, sara mbeto pepe! So tënë ti yanga ti KOTA GBIA laa. Mo hale ti Jacob, mo do na mbeto pepe! Biani, mbi yeke ga ti soo mo na ya ti akodro so ayeke na yongoro ndo; mbi yeke soo nga ahale ti mo na sese so a gbu ala si a gue na ala daa so. Israel, fade mo yeke kiri si mo yeke wara lege ti duti kpoo, mbeni sioni ye ti kiri ti sara mo ayeke daa pepe, mbeni zo ti kiri ti zia mbeto na be ti mo ayeke daa pepe.

¹¹So tënë ti yanga ti KOTA GBIA laa: Mbi yeke na mo ti soo mo. Amara so kue mbi kangbi mo lani na popo ti ala, mbi yeke fâ ala kue ti hunzi ala; me ti mo, mbi yeke hunzi mara ti mo pepe. Biani, mbi pika mo, me na legeni; mbi lingbi fade ti zia mo senge tongaso pepe!”

¹²So tënë ti yanga ti KOTA GBIA laa: “Ka ti mo ayeke so mingi, ka ni ayeke mu oko pepe!

¹³Zo oko ti gbu koko ti mo ayeke daa pepe, mbeni ngangu yoro ti kanga na ka ti mo ayeke daa pepe.

¹⁴Andeko ti mo kue, be ti ala agirisa na mo awe, ngbanga ti ala ayeke na mo mbeni pepe. Biani, mbi pika mo, mo baa mo tene, mbi yeke fade wato ti mo. Mbi pika mo ngangu, ngbanga ti so sioni ti mo ahon ndoni, siokpari ti mo awu mingi.

¹⁵Ngbanga ti nyen si mo yeke toto ndali ti kpale so asi na mo? Ndali ti ka ti mo so aso mingi so? Mbi sara si aye ni so asi na mo, ngbanga ti so sioni ti mo ahon ndoni, siokpari ti mo awu mingi.

¹⁶Me azo so kue ate mo, fade a yeke te ala; azo so kue be ti ala ake mo, fade a yeke gbu ala ti gue na ala na kodro wande; azo so anzi aye ti mo, fade a yeke nzi aye ti ala; azo so kue agbu aye ti mo, fade a yeke gbu aye ti ala.

¹⁷Ala di iri ti mo: ‘Lo so a ke lo awe’, wala ‘*Sion so azo aye tënë ti lo pepe’. Me so tënë ti yanga ti KOTA GBIA laa: Fade mbi yeke sara si ka ti mo amu; mbi yeke sara si aka ti mo ahunzi.”

¹⁸Tënë so KOTA GBIA atene ayeke so: “Fade mbi yeke sara si azo ti da ti Jacob akiri na kozo ndo ti ala; mbi yeke baa mawa ti da ti ala. Gbata so lani abuba, a yeke kiri ti leke ni na ndö ti angbene da so atuku na sese; a yeke kiri ti sara apendere da gi na oko ndo so lani ada ni ayeke daa so.

¹⁹Na popo ti ala, fade a yeke ma go ti azo so ayeke he bia ti mungo singila si ala yeke dekongo na ngia. Ala *ahale ti Jacob, fade mbi yeke sara si ala kiri awu mingi, wungo ti ala ayeke kiri na peko pepe; mbi yeke sara si azo ane ala, zo ayeke kiri ti baa ala tongana abuba zo pepe.

²⁰Ala yeke kiri ti ga tongana ti giriri; bongbi ti ala ayeke kiri ti luti mbirimbiri na dawa ti mbi. Mbi yeke ga na tere ti azo so kue ayeke sara ngangu na ala, ahale ti Jacob.

²¹Mbeni oko ti ala ayeke duti makonzi ti ala; zo so ayeke sara komandema na ndö ti ala ayeke baa gigi na popo ti ala; fade mbi yeke sara si lo ga nduru na mbi. Biani, zo wa laa alingbi ti sara ye ti koli si lo ga nduru na mbi, zo wa? So tënë ti yanga ti KOTA GBIA laa.

²²Fade ala yeke duti azo ti mbi si mbi yeke duti Nzapa ti ala.”

²³Baa ngangu pupu ti KOTA GBIA ayeke ga, sioni ngonzo ti lo alondo awe. Sioni pupu ti ngu-Nzapa ayeke ya si ayeke turne wirrr ti ti na li ti azo ti sioni.

²⁴Ngonzo ti wâ ti KOTA GBIA ayeke kai ande pepe, ngbii ye so lo leke na be ti lo ti sara, lo sara ni kue si. Gbanda si ala yeke ma ya ti tënë so nzoni.