Read sango Jérémie 31 Bible Online

Jérémie 31 - sango bible

Jérémie 31

¹So tënë ti yanga ti *KOTA GBIA laa: “Na ngoi ni so, mbi yeke duti Nzapa ti asewa ti Israel kue; ala yeke duti azo ti mbi.”

²Tënë so *KOTA GBIA atene ayeke so: “Na benyama, mbi sara nzoni be na azo so asigigi lani na ya ti kuâ. Israel ayeke gue ti duti kpoo.

³Yongoro kâ, KOTA GBIA asi na mbi, lo tene: ‘Mbi ye mo na ndoye so angba lakue lakue, ndani laa mbi ngba ti sara nzoni be na mo.

⁴Maseka-wali Israel, mbi yeke kiri ti leke mo na nduzu, a yeke kiri ti leke mo na nduzu. Mo yeke kiri ti mu akete ngo ti mo na tere ti mo tongana aye ti pendere si mo yeke gue ti dodo na popo ti azo so ayeke sara ngia.

⁵Mo yeke kiri ti lu *avinye na ndö ti ahoto ti Samarii; azo so alu ni, fade ala yeke baa nzoni daa.

⁶Biani, mbeni lango ayeke ga so asanziri ayeke dekongo na li ti ahoto ti Efraim, atene: Ala londo! E gue na *Sion, e gue na mbage ti KOTA GBIA Nzapa ti e!’ ”

⁷Tënë so KOTA GBIA atene ayeke so: “Ala dekongo na ngia ndali ti Israel, ala pika maboko na li ti makonzi so ayeke na li ti amara! Ala huru yanga ti ala! Ala sepela lo, ala tene: ‘KOTA GBIA, mo soo azo ti mo, soo azo ti Israel so angba na fini!’

⁸Mbi yeke mu ala na kodro ti mbage ti Banga ti kiri na ala; mbi yeke sara titene ala londo na nda ti sese kue ti bongbi na ndo oko. Na popo ti ala, awaziba ayeke daa, azo ti bubango gere, awali so ayeke na ngo na ala so ya ti ala ayeke so ti du. Gba ti azo laa ayeke kiri na ndo so.

⁹Azo ni ayeke kiri na toto na yanga ti ala. So mbi yeke ga na ala, ala yeke dema tere ti ala; mbi yeke gue na ala na ndo so gba ti ngu ayeke sua daa, mbi yeke sara titene ala hon na lege so ayeke mbirimbiri, ndo so ala lingbi pepe ti pika gere ti ala ti ti. Biani, mbi yeke tongana babâ ti Israel, Efraim ayeke kozo molenge ti mbi.”

¹⁰Ala amara nde, ala ma tënë ti KOTA GBIA, ala bi tënë ni na mê ti azo so ayeke na ya ti azoa yongoro kâ. Ala tene: “KOTA GBIA akangbi lani azo ti Israel kirikiri, fadeso lo bongbi ala si lo bata ala tongana wabatango-taba so abata ataba ti lo.”

¹¹Biani, KOTA GBIA azi azo ti Israel awe, lo zi ala na maboko ti mbeni zo so ayeke ngangu ahon ala.

¹²Fade ala yeke ga, ala yeke dekongo na ngia na ndö ti hoto ti *Sion; yanga ti ala ayeke na ngia ti wara anzoni ye so KOTA GBIA ayeke mu na ala: ble, fini vin, mafuta, ataba, angasa na abagara. Fini ti ala ayeke duti tongana yaka so a tuku ngu daa; ala yeke kiri ti woko pepe.

¹³Tongaso, fade amaseka-wali ayeke dodo na ngia, amaseka-koli na ambakoro ayeke sara legeoko tongaso. Mbi yeke sara si mawa ti ala aga ngia, mbi yeke de be ti ala. Na peko ti vundu ti ala, mbi yeke sara si ala duti na ngia.

¹⁴Mbi yeke mu na awayango-sandaga gba ti kasa ti mafuta, mbi yeke sara si aye ti nzoni asi singo na azo ti mbi; so tënë ti yanga ti KOTA GBIA laa.

¹⁵Tënë so KOTA GBIA atene ayeke so: “A yeke ma dekongo na toto ti kota vundu na kodro ti Rama. Rachel laa ayeke toto ndali ti amolenge ti lo; lo ke ti ma awango so alingbi ti de be ti lo, ngbanga ti so amolenge ni ayeke daa mbeni pepe.”

¹⁶Me tënë so KOTA GBIA atene ayeke so: “Awe-oo! Kiri mo dema tere ti mo pepe! Kiri mo toto pepe! Fade mo yeke wara futa ti kua ti mo; so tënë ti yanga ti KOTA GBIA laa. Amolenge ti mo ayeke londo na ndo ti awato ti ala ti kiri.

¹⁷Mo lingbi ti zia be ti mo ti ku anzoni ye ndali ti gigi ti mo ti gbanda; so tënë ti yanga ti KOTA GBIA laa: Fade amolenge ti mo ayeke kiri na sese ti ala.

¹⁸Biani, mbi ma azo ti Efraim so ayeke dema tere ti ala, atene: ‘KOTA GBIA, mo pika e ngangu mingi tongana ti so zo ayeke pika bagara so ama ndo pepe. Me ayeke nzoni mo sara si e kiri na mbage ti mo titene e kiri biani na mbage ti mo, ngbanga ti so mo laa mo yeke Nzapa ti e.

¹⁹Taa-tënë, e hon lani yongoro na tere ti mo, me fadeso e zia lege ni awe. E hinga sioni ti e awe, fadeso e zia maboko na go ti e, kamene ahon ndö ti e si e ga buba ndali ti ye so e sara na ndembe so e de maseka; ye ti peko ni laa e wara awe so.’ ”

²⁰Efraim ayeke molenge ti mbi ti koli so mbi ye lo ahon ndoni; lo yeke molenge so mbi voro lo mingi. Ndani laa, lakue so mbi yeke tene tënë na tere ti lo, lakue mbi yeke dabe ti mbi na lo. Be ti mbi ayeke na ndö ti lo mingi. Biani, mbi baa mawa ti lo ahon ndoni; so tënë ti yanga ti KOTA GBIA laa.

²¹Mo lu atêne na tere ti lege so mo yeke hon daa; mo kpo aye na nduzu na tere ti lege so mo yeke hon daa. Sara hange na lege so mo mu nga na lege so mo tambula daa. Maseka-wali Israel, mo kiri! Kiri na ya ti agbata so ayeke ti mo!

²²Molenge-wali ti ngangu li, mo yeke ngba ti duti yamba tongaso ngbii asi lawa? Biani, KOTA GBIA asara mbeni fini ye na ndö ti sese awe: fadeso wali laa ayeke gi lege ti mu koli.

²³Tënë so *KOTA GBIA so ayeke na ndö ti dunia kue, Nzapa ti Israel atene ayeke so: “Tongana mbi sara titene kodro ti Juda na agbata ti Juda akiri na kozo ndo ti ala, tënë so azo ayeke kiri ti tene laa: ‘Ayeke nzoni KOTA GBIA asara tufa na ndö ti mo, hoto ti *Sion so mo yeke nde si mo yeke nzoni kue; mo yeke ndo ti mbirimbiri!’

²⁴“Tongaso, azo ti kete kodro na azo ti agbata ti Juda kue, ala na azo ti fango yaka na azo so ayeke fono na anyama ti ala ayeke sara kodro legeoko na ndo so.

²⁵Biani, azo so awoko na nzara ti ngu, fade mbi yeke mu na ala ngu ti nyon; azo so ngangu atia ala, mbi yeke mu na ala kota ngangu.

²⁶— Ndani laa, so mbi zingo na lango, mbi baa so lango ti mbi ni asara nzoni na mbi mingi. —

²⁷“So tënë ti yanga ti KOTA GBIA laa: Mbeni lango ayeke ga so mbi yeke tuku azo na anyama gbani gbani na ya ti akodro-gbia ti Israel na ti Juda tongana ti so zo ayeke tuku ale ti kobe na le ti yaka.

²⁸Lani, le ti mbi akpengba na ndö ti ala titene mbi gboto aye, mbi de aye na sese, mbi kungbi aye na sese, mbi buba aye si mbi sara sioni. Me fadeso, le ti mbi akpengba na ndö ti ala titene mbi leke aye na nduzu si mbi lu aye; so tënë ti yanga ti KOTA GBIA laa.

²⁹Nilaa, fade azo ayeke kiri ti tene *mato so mbeni pepe: ‘Ababâ ate akpi-kpi le ti *vinye, me pembe ti amolenge laa akui.’

³⁰Biani, tongana zo ate akpi-kpi le ti vinye, pembe ti lo wani laa ayeke kui; fade zo oko oko ayeke kui ndali ti sioni ti lo wani.

³¹“Mbeni lango ayeke ga so mbi na azo ti Israel nga na azo ti Juda, e yeke sara fini *mbuki; so tënë ti yanga ti KOTA GBIA laa.

³²Mbuki ni ayeke duti nde na ti so lani mbi na akotara ti ala e sara na ngoi so mbi gbu maboko ti ala ti sigigi na ala na Ezipte. Akotara ti ala abuba tënë ti ya ti mbuki ni, ataa so mbi laa mbi yeke lani wa ti ala; so tënë ti yanga ti KOTA GBIA laa.

³³So tënë ti yanga ti KOTA GBIA laa: Na peko ti alango ni so, mbuki so mbi na azo ti Israel e yeke sara ni ayeke so: mbi yeke su andia ti mbi taa na ya ti be ti ala, mbi yeke su ni na ndö ti be ti ala; mbi yeke duti Nzapa ti ala si ala yeke duti azo ti mbi.

³⁴Zo oko na popo ti ala ayeke kiri ti fa ye na mba ti lo wala na ita ti lo pepe, atene: ‘Ala hinga KOTA GBIA!’ Biani, ti londo na kete zo asi na kota zo, fade ala kue ayeke hinga mbi; so tënë ti yanga ti KOTA GBIA laa. Mbi yeke zi sioni ti ala, mbi yeke kiri ti dabe ti mbi na siokpari ti ala pepe.”

³⁵Tënë so KOTA GBIA atene ayeke so: Zo wa laa azia lâ titene lo su na kota lâ? Zo wa laa amu yanga na nze na atongoro ti su na bi na lege ti ndia ti ala? Zo wa laa ayingi kota ngu-ingo titene *amapo atoto? Ayeke KOTA GBIA so ayeke na ndö ti dunia kue; so iri ti lo laa.

³⁶So tënë ti yanga ti KOTA GBIA laa: “Mbeni lâ, tongana mbi lingbi ti yeda titene ngangu ti andia ti dunia so amingo, andaa mbi lingbi nga ti yeda titene azo ti Israel kue akiri abongbi mbeni pepe ti ga mara oko!

³⁷Tënë so KOTA GBIA atene ayeke so: Tongana zo alingbi ti gboto kamba, ti londo na sese asi na yayu ti hinga yongo ni, wala tongana zo ni alingbi ti hinga yongo ti sese na ngbonda ni kâ, tongaso fade mbi lingbi nga ti ke *ahale ti Israel kue ndali ti sioni so ala sara.”

³⁸“So tënë ti yanga ti KOTA GBIA laa: Mbeni lango ayeke ga so a yeke kiri ti leke gbata ti Jérusalem ndali ti KOTA GBIA, ti londo na kota da ti Hananeel so ayo na nduzu, ngbii asi na yanga ti gbagba so iri ni Ti-Ndangoro.

³⁹Fade a yeke suru afini katikati ti gbata ni ti gue na ni na mbage ti Do, na mbage ti hoto ti Gareb; akatikati ni ayeke londo na ndo so, angoro ngbii asi na mbage ti Goa.

⁴⁰Popo-hoto so kue a yeke bi akuâ daa si a yeke tuku amburu ti wâ ti mafuta ti anyama daa, na asenge sese so ague ngbii asi na tere ti ngu ti Sedron, akiri ague ngbii asi na ndangoro ti yanga ti gbagba so iri ni Ambarata, na mbage ti To; asese so kue, fade a yeke zia ni nde ndali ti KOTA GBIA; zo ayeke kiri ti gboto ye daa wala ti kungbi ye daa pepe.”