Read sango Jérémie 33 Bible Online

Jérémie 33 - sango bible

Jérémie 33

¹So Jérémie ade na ya ti gbagba ti aturugu ti batango gbia, na ndo so a kanga lo daa, tënë ti *KOTA GBIA akiri asi na lo, atene:

²“Lo so lo sara ye, lo so lo leke ye si ye ni aluti mbirimbiri, lo so iri ti lo ayeke KOTA GBIA, tënë so lo tene ayeke so:

³Mo iri mbi, fade mbi yeke yeda; mbi yeke fa na mo akota ye, aye so angba na hondengo ni so mo hinga pepe.

⁴Biani, tënë so KOTA GBIA, Nzapa ti Israel atene ndali ti ada ti gbata so nga ndali ti ada ti agbia ti Juda so azo akungbi na sese ti kanga lege na sese so awato abongbi si aga *koto, ndali ti bira ayeke so:

⁵Ambeni zo ayeke baa pasi senge ti gue ti tiri bira na azo ti Babilone; ala yeke sara gi titene ya ti ada so ayeke si singo na kuâ ti azo so mbi yeke fâ ala na lege ti ngonzo ti mbi nga na ngonzo ti mbi ti wâ. Mbi yeke honde le ti mbi na azo ti gbata so ndali ti sioni so kue ala sara.

⁶“Me fade mbi yeke sara si gbata ni aga nzoni; mbi yeke kai kobela ti azo ni, mbi yeke mu na ala gba ti siriri si mbeni sioni ye ti si na ala ayeke daa pepe.

⁷Mbi yeke sara titene azo ti Juda na azo ti Israel akiri na kozo ndo ti ala, mbi yeke kiri ti leke ala na nduzu tongana ti kozoni.

⁸Mbi yeke *sukula ala ndali ti sioni so kue ala sara ti ke mbi; mbi yeke zi sioni na li ti ala, sioni so ala sara ti tomboka na tere ti mbi.

⁹Tongaso, fade ye ni ayeke sara si be ti mbi anzere, ayeke sara si azo agonda mbi si aga ye ti pendere ti mbi na le ti amara kue ti sese. Tongana amara ni ama tënë ti anzoni ye so kue mbi yeke sara ndali ti gbata ni, fade ala yeke do na mbeto si tere ti ala ayeke do ndali ti gba ti nzoni ye na siriri so mbi yeke mu na gbata ni.”

¹⁰Tënë so KOTA GBIA atene ayeke so: “Ala azo ti Juda, ala yeke tene: ‘Hoo, ndo so abuba kue awe! Azo na anyama ayeke daa mbeni pepe!’ Taa-tënë, agbata ti Juda nga na ndö ti abalabala ti Jérusalem ade dengo; zo ayeke lango na ya ti gbata ni oko pepe, azo na anyama ayeke daa pepe. Biani, na ya ti kodro so, a yeke kiri ti ma

¹¹bia ti azo so tere ti ala anzere, bia ti azo so ayeke na ngia, bia ti akoli na awali so amu tere fini ni. A yeke ma nga bia ti azo so ayeke ga na *sandaga ti mungo singila na ya ti kota da ti KOTA GBIA, atene: ‘Ala mu singila na KOTA GBIA so ayeke na ndö ti dunia kue, ngbanga ti so lo yeke nzoni, nzoni be ti lo angba kpu na kpu!’ Biani, fade mbi yeke sara titene kodro so akiri na kozo ndo ti lo”; tënë so KOTA GBIA atene laa.

¹²Tënë so KOTA GBIA so ayeke na ndö ti dunia kue atene ayeke so: “Na ya ti kodro so abuba kue awe so, so azo na anyama ayeke daa pepe so, na ya ti agbata ni kue, ndo ayeke kiri ti duti daa ndali ti awabatango-taba, ndo titene ala zia ataba na angasa ti ala daa ti wu tere.

¹³Na ya ti agbata ti Kodro-ti-nduzu na ti agbata ti *Kodro-ti-gbeni na ti Negev, na sese ti Benjamin, na ya ti akodro so angoro Jérusalem nga na ya ti agbata ti Juda, fade ataba na angasa ayeke kiri na gbe ti maboko ti wabatango ala so ayeke diko ala”; tënë so KOTA GBIA atene laa.

¹⁴“So tënë ti yanga ti *KOTA GBIA laa: Mbeni lango ayeke ga so mbi yeke sara ye alingbi na zendo so mbi mu na azo ti Israel nga na azo ti Juda.

¹⁵Na lango ni so, gi na ngoi ni so, mbi yeke sara titene taa *hale ti David abaa gigi. Lo yeke sigigi tongana kete keke so asigigi na ya ti sese, lo yeke fâ ngbanga mbirimbiri si lo yeke sara ye ti mbirimbiri na ya ti kodro ni.

¹⁶Na lango ni so, fade a yeke soo kodro-gbia ti Juda si mbeni ye ti sioni ti si na Jérusalem ayeke duti daa pepe. Iri so fade azo ayeke iri na lo laa: ‘KOTA GBIA ayeke mbirimbiri ti e.’ ”

¹⁷Tënë so KOTA GBIA atene ayeke so: “Fade mbeni hale ti David ayeke duti daa lakue ti le-gbia na ndö ti azo ti Israel.

¹⁸Na popo ti awayango-sandaga ti mara ti Lévi, mbeni zo ayeke duti daa lakue ti luti na le ti mbi ti ya asandaga so a yeke gbi ni kue na wâ, lo yeke gbi asandaga na wâ ndali ti mbi si lo yeke mu asandaga ti beoko lakue na mbi.”

¹⁹Tënë ti KOTA GBIA akiri asi na Jérémie, atene:

²⁰“So tënë ti yanga ti KOTA GBIA laa: Ala lingbi ti fâ ya ti mbuki so mbi na kota lâ nga na bi e sara? Ala lingbi ti kanga lege titene kota lâ na bi aga na ndembe ni? — Oko pepe!

²¹Tongana ye ni ayeke tongaso, mbuki so mbi na David, zo ti kua ti mbi, e sara ni, fade ya ni alingbi ti fâ nga pepe. Mbeni hale ti lo ti le-gbia na peko ti lo ayeke duti daa lakue; mbeni zo ti mara ti Lévi so ayeke sara kua ti wayango-sandaga ayeke duti nga daa lakue.

²²Fade mbi yeke sara titene ahale ti zo ti kua ti mbi, David, na ahale ti Lévi so ayeke sara kua na mbi, ala wu tongana atongoro ti le ti nduzu so zo alingbi ti diko wungo ni pepe, wala tongana mbutu ti yanga ti kota ngu-ingo so zo alingbi ti diko ni pepe.”

²³Tënë ti KOTA GBIA akiri asi na Jérémie, atene:

²⁴“Mo ma tënë so azo ayeke tene so pepe? Azo ni atene: ‘Israel na Juda, asewa use so KOTA GBIA asoro ala lani so, fadeso lo ke ala awe!’ Na tenengo mara ti tënë tongaso, azo ni abaa azo ti mbi tongana mara mbeni pepe; ala baa azo ni tongana ambumbuse zo.

²⁵Me tënë so mbi KOTA GBIA, mbi tene ayeke so: Mbi na kota lâ nga na bi, e sara mbuki awe; mbi lu ndia ndali ti yayu na sese awe.

²⁶Tongaso, mbi lingbi ti ke ahale ti Jacob na ti David, zo ti kua ti mbi? Mbi lingbi ti ke ti soro na popo ti ahale ti ala azo so ayeke le-gbia na ndö ti ahale ti Abraham, ti Isaac na ti Jacob? “Oko pepe! Fade mbi yeke sara titene ala kiri na kozo ndo ti ala, ngbanga ti so mbi baa mawa ti ala.”