Read sango Jérémie 34 Bible Online

Jérémie 34 - sango bible

Jérémie 34

¹Nabukodonosor, gbia ti Babilone, lo na aturugu ti lo kue, na azo ti akodro-gbia ti sese so kue ayeke na gbe ti komandema ti lo nga na amara kue alondo ti tiri bira na Jérusalem nga na agbata so angoro Jérusalem. Na ngoi ni so, tënë ti *KOTA GBIA asi na Jérémie, atene:

²“Tënë so KOTA GBIA, Nzapa ti Israel atene ayeke so: Gue mo baa Sedesias, gbia ti Juda; mo tene na lo, mo tene: Tënë so KOTA GBIA atene ayeke so: Mbi yeke zia gbata so na maboko ti gbia ti Babilone, fade lo yeke bi wâ daa.

³Ti mo, fade mo yeke kpe na maboko ti lo pepe; a yeke gbu mo si a zia mo na maboko ti lo. Mo na gbia ti Babilone ayeke baa tere le na le si lo wani, lo yeke tene tënë na mo. Na pekoni, mo yeke gue na Babilone.

⁴“Ye oko, Sedesias, gbia ti Juda, alingbi mo ma tënë ti KOTA GBIA si! Tënë so KOTA GBIA atene na ndö ti mo ayeke so: Fade a yeke fâ mo na ya ti bira pepe.

⁵Me mo yeke kui na siriri. Azo ayeke leke kuâ ti mo tongana ti so ala leke ti akotara ti mo so ayeke agbia kozo na mo. Azo ni ayeke zö dukani ndali ti mo si ala yeke he bia ti totongo kuâ so na ndö ti mo: ‘So ye ti mawa ti nyen-oo! Gbia akui awe.’ ” So tënë ti yanga ti KOTA GBIA laa.

⁶Wayanga-Nzapa Jérémie atene atënë so kue na Sedesias, gbia ti Juda; lo tene atënë ni na Jérusalem.

⁷Na ngoi ni so, aturugu ti gbia ti Babilone ayeke tiri bira na Jérusalem nga na agbata use ti Juda, Lakish na Azeka, so ngangu gbagba ayeke na tere ni si ade aturugu awara lege ti mu ni pepe so.

⁸Tënë ti *KOTA GBIA akiri asi na Jérémie na peko ti so gbia Sedesias asara *mbuki na azo ti Jérusalem kue ti to mbela titene a zi azo na gbe ti ngbaa.

⁹Zo oko oko alingbi fade ti zi na gbe ti ngbaa azo so ayeke ahebro, akoli ni na awali ni. Alingbi fade titene zo akiri asara ita ti lo zuife na ngbaa pepe.

¹⁰Akota zo ti kodro na azo ti Jérusalem so kue ama tere na lege ti mbuki ni, ayeda ti zi angbaa ti ala, akoli ni na awali ni. Ala yeda nga si zo akiri amu mba ti lo na ngbaa pepe. Zo oko oko asara fade ye alingbi na tënë ti mbuki so, nilaa ala zi angbaa ti ala.

¹¹Me na pekoni, tënë ti be ti ala akiri ague nde na ti kozoni: akoli na awali so lani azo azi ala na gbe ti ngbaa, azo ni akiri na ala kue na kua ti ngbaa ni.

¹²Tongaso tënë ti KOTA GBIA asi na Jérémie, atene:

¹³“Tënë so KOTA GBIA, Nzapa ti Israel atene ayeke so: Mbi nga, mbi na akotara ti ala, e sara mbuki na ndembe so mbi sara si ala sigigi na sese ti Ezipte, ndo so ala yeke lani angbaa daa. Mbi tene na akotara ti ala ni, mbi tene:

¹⁴‘Na peko ti ngu mbarambara, alingbi ala oko oko kue azi na gbe ti ngbaa ita ti ala hebro so aka tere ti lo na ala. Zo ni ayeke duti ngbaa ti mo na ya ti ngu omene, na pekoni, fade mo yeke zi lo yamba.’ Me akotara ti ala ni ama mbi pepe, ala dingi mê ti ala ti ma tënë ti mbi pepe.

¹⁵Me ti ala, ala zia ngbene lege ti sarango ye ti ala laso awe, ala sara ye so anzere na le ti mbi, ngbanga ti so ala to mbela titene zo oko oko azi mba ti lo na gbe ti ngbaa. Ala sara nga mbuki na dawa ti mbi, na ya ti kota da so a zia nde ndali ti mbi.

¹⁶Me tënë ti be ti ala akiri ague nde na ti kozoni, ala buba iri ti mbi. Angbaa so lani zo oko oko azi ala, akoli ni na awali ni titene ala gue na ndo so be ti ala aye, ala azo ti Juda, ala kiri agbu azo ni na ngangu ti ga angbaa ti ala.”

¹⁷“Baa, tënë so KOTA GBIA atene ayeke so: Ala oko oko kue alingbi fade ti to mbela titene a zi a-ita ti ala na amba ti ala na gbe ti ngbaa; me ala ma yanga ti mbi pepe. Ndani laa, mbi KOTA GBIA, mbi to mbela titene a zi lege na bira, na sioni kobela ti bubango kodro nga na nzara ti ga na tere ti ala; so tënë ti yanga ti KOTA GBIA laa. Fade akodro-gbia kue ti sese ayeke do na kota mbeto na bango ala.

¹⁸“Azo so abuba ya ti mbuki ti mbi na ala awe, mbuki so lani ala sara na dawa ti mbi, na lege ti kete bagara so ala suru ya ti lo use si ala hon na popo ti nyama ni so. Azo ni ake ti sara ye alingbi na atënë ti ya ti mbuki ni awe. Nilaa fade mbi yeke sara na ala gi mara ti ye so ala sara na kete bagara ni so.

¹⁹Akota zo ti Juda na ti Jérusalem, azo ti kua ti yangbo ti gbia, awayango-sandaga na asenge zo ti kodro, ala so kue ahon na popo ti kete bagara so a suru ya ni use so,

²⁰fade mbi yeke zia ala na maboko ti awato ti ala, azo so aye gi kuâ ti ala. Kuâ ti ala ayeke ga kobe ti andeke ti nduzu na ti anyama ti sese.

²¹Ti Sedesias, gbia ti Juda, fade mbi yeke zia lo legeoko tongaso, lo na akota zo ti kodro ti lo na maboko ti awato ti ala nga na azo so aye gi kuâ ti ala. Mbi yeke zia ala na maboko ti aturugu ti gbia ti Babilone, ataa so aturugu ni agboto tere ti ala fadeso ahon yongoro na tere ti ala.

²²Mbi yeke mu yanga titene aturugu ni akiri aga ti li na ya ti gbata ni, ala tiri bira na gbata ni, ala mu ni si ala gbi ni na wâ. Fade mbi yeke sara si agbata ti Juda aga ndo so ye kue abuba daa si zo ayeke daa mbeni pepe.” So tënë ti yanga ti KOTA GBIA laa.