Read sango Jérémie 35 Bible Online

Jérémie 35 - sango bible

Jérémie 35

¹Na ngoi ti Yoakim, molenge ti Yosias, gbia ti Juda, tënë ti *KOTA GBIA asi na Jérémie, atene:

²“Gue mo wara tere na azo ti kete mara ti Rekab; mo tene tënë na ala si mo gue na ala na ya ti kota da ti Nzapa, na ya ti mbeni kota kubu. Kâ, fade mo yeke mu na ala vin ti nyongo ni.”

³Tongaso, mbi gue ti gi Yazania, molenge ti Irmeya, molenge ti Habasinia, lo na a-ita ti lo nga na amolenge ti Yazania kue; so ti tene azo ti kete mara ti Rekab kue.

⁴Mbi ga na ala na ya ti kota da ti KOTA GBIA, na ya ti kota kubu ni so adisiple ti Hanan ayeke duti daa; Hanan ayeke taa zo ti Nzapa, lo yeke molenge ti Igdalia. Kota kubu ni ayeke nduru na tere ti kota ya ti da ti amakonzi si ayeke na nduzu, na ndo so kota kubu ti Maaseya ayeke daa; Maaseya ayeke molenge ti Shalum, wayango-sandaga so ayeke bata yanga ti kota da ti Nzapa.

⁵Mbi zia na dawa ti azo ti kete mara ti Rekab ata so vin asi singo na ya ni, mbi zia nga na tere ni akopo ti nyongo na ni. Na pekoni, mbi tene na ala: “Ala nyon vin!”

⁶Me ala kiri tënë: “E yeke nyon vin pepe, ngbanga ti so kotara ti e Yonadab, molenge ti Rekab amu yanga na e, atene: ‘Fade ala yeke nyon vin oko pepe, ataa ala, ataa amolenge ti ala.

⁷Ala yeke sara ada pepe, ala yeke lu ale ti kobe pepe, ala yeke fâ yaka ti *vinye pepe, ala yeke mu yaka ti vinye pepe ti ga ti ala. Me fade ala yeke lango na ya ti ada ti bongo na lango ti fini ti ala kue; tongaso si fade ala yeke lango aninga na ndö ti sese so ala yeke duti daa.’

⁸E sara ye so kue kotara ti e Yonadab, molenge ti Rekab, amu ando yanga na e ti sarango ni. Nilaa e yeke nyon ka vin pepe, ataa e, ataa awali ti e, amolenge ti e ti koli na ti wali.

⁹E yeke sara ada pepe ti lango daa, e yeke mu yaka ti vinye pepe, wala mbeni yaka so a lu ale ti kobe daa ti ga ti e.

¹⁰Me e yeke lango na ya ti ada ti bongo. Tongaso, e ma yanga ti kotara ti e Yonadab si e yeke sara ye kue alingbi na yanga so lo mu na e.

¹¹Na ndembe so Nabukodonosor, gbia ti Babilone, aga si asara bira na kodro ni, e tene na be ti e, e tene: ayeke nzoni e gue na Jérusalem si e kpe aturugu ti Babilone na ala ti Sirii. Ndani laa e duti laso na Jérusalem so.”

¹²Tongaso tënë ti KOTA GBIA asi na Jérémie, atene:

¹³“Tënë so KOTA GBIA so ayeke na ndö ti dunia kue, Nzapa ti Israel atene ayeke so: Gue mo tene na azo ti Juda nga na azo ti Jérusalem, mo tene: Fade ala yeke ma wango ti mbi pepe? Ala yeke ma tënë ti mbi pepe? So tënë ti yanga ti KOTA GBIA laa.

¹⁴Ando Yonadab, molenge ti Rekab, amu yanga na amolenge ti lo titene ala nyon vin pepe. Nilaa amolenge ni ama yanga ti kotara ti ala si ala ke ti nyon vin ngbii asi laso. Me ti mbi KOTA GBIA, mbi mu ngoi ti mbi kue ti tene tënë na ala, azo ti Juda, me ala ma mbi pepe.

¹⁵Mbi mu ngoi ti mbi kue ti tokua na ala azo ti kua ti mbi, awayanga-Nzapa ti tene na ala, azo ti Juda, atene: ‘Ayeke nzoni zo oko oko azia sioni lege ti sarango ye ti lo; ala sara si sarango ye ti ala akiri aga nzoni; ala mu peko ti anzapa nde pepe ti voro ala. Tongaso, fade ala yeke ngba ti duti na ya ti kodro so mbi mu na ala, ala na akotara ti ala.’ Me ala dingi mê ti ala kete pepe, ala ma mbi pepe.

¹⁶Ti azo ti Rekab, ala sara ye alingbi na yanga so kotara ti ala Yonadab amu na ala; me ala, azo ti Juda, ala ma mbi pepe!”

¹⁷Jérémie akiri atene: “Ndani laa, tënë so KOTA GBIA so ayeke na ndö ti dunia kue, Nzapa ti Israel atene ayeke so: Ala azo ti Juda na ala, azo ti Jérusalem, akpale so kue mbi tene tënë ni so, mbi yeke sara titene aga na ndö ti ala. Biani, mbi tene tënë na ala, me ala ma mbi pepe; mbi iri ala, me ala ke ti yeda.”

¹⁸Na pekoni, Jérémie atene na azo ti kete mara ti Rekab, atene: “Tënë so KOTA GBIA so ayeke na ndö ti dunia kue, Nzapa ti Israel atene ayeke so: Ala ma yanga ti kotara ti ala Yonadab, ala sara ye alingbi na ni; ala sara ye so kue lo mu yanga na ala ti sarango ni.

¹⁹Ndani laa, tënë so KOTA GBIA so ayeke na ndö ti dunia kue, Nzapa ti Israel atene ayeke so: Na ya ti sewa ti Yonadab, molenge ti Rekab, fade mbeni zo ayeke duti daa lakue ti luti na dawa ti mbi.”