Read sango Jérémie 36 Bible Online

Jérémie 36 - sango bible

Jérémie 36

¹Na ngu osio ni so Yoakim, molenge ti Yosias, ayeke gbia ti Juda, tënë ti *KOTA GBIA asi na Jérémie, atene:

²“Mu mbeni *rulo so a sara na poro ti nyama, mo su na le ni atënë so kue mbi tene na mo na tere ti akodro ti Israel, ti Juda nga na ti amara kue, ti londo na ngoi ti Yosias ngbii asi laso.

³E hinga pepe, fade azo ti Juda ayeke ma nda ti asioni ye so mbi ye ti tokua na ndö ti ala si zo oko oko alingbi ti zia sioni lege ti sarango ye ti lo. Tongaso, fade mbi yeke zi sioni ti ala nga na siokpari ti ala na li ti ala.”

⁴Jérémie airi Baruk, molenge ti Neria. Jérémie atene na Baruk peko ti atënë kue ti KOTA GBIA si Baruk asu na le ti rulo ni.

⁵Na pekoni, Jérémie amu yanga na Baruk, atene: “A kanga lege na mbi awe; mbi lingbi ti gue na ya ti kota da ti Nzapa pepe.

⁶Me ti mo, mo yeke gue ande kâ na mbeni lango ti kengo kobe. Fade mo yeke diko na mê ti azo so kue ayeke na ya ti kota da ti Nzapa, atënë ti KOTA GBIA so asigigi na yanga ti mbi si mo su na le ti rulo so. Mo yeke diko nga ni na mê ti azo ti Juda so kue alondo na ya ti agbata ti Juda si aga.

⁷Tongaso, e hinga pepe, vorongo tere ti ala ayeke si na KOTA GBIA si zo oko oko ayeke zia sioni lege ti sarango ye ti lo. Biani, KOTA GBIA asara ngonzo mingi si ngonzo ti lo ti wâ alondo na tere ti mara so.”

⁸Baruk, molenge ti Neria, asara ye so kue wayanga-Nzapa Jérémie amu yanga na lo ti sarango ni. Lo gue na ya ti kota da ti Nzapa ti diko atënë ti KOTA GBIA so a su na le ti rulo so.

⁹Biani, na nze gumbaya ni, na ngu oku ni so Yoakim, molenge ti Yosias, ayeke gbia ti Juda, a to mbela na azo ti Jérusalem kue nga na azo so kue alondo na ya ti agbata ti Juda si aga na Jérusalem ti ke kobe na dawa ti KOTA GBIA.

¹⁰Na ya ti kota da ti Nzapa, Baruk adiko na mê ti azo so kue ayeke kâ, atënë ti Jérémie so a su na le ti rulo so. Baruk aluti na ya ti kota kubu so a mu na Gemaria, molenge ti Shafan, ngbene kota wakuasu ti letaa. Kota kubu ni ayeke na ya ti gbagba ti mbage ti nduzu ti kota da ti Nzapa, nduru na Fini yanga-da.

¹¹Mika, molenge ti Gemaria, molenge ti Shafan, ama atënë ti KOTA GBIA so kue a su na le ti rulo si Baruk adiko ni so.

¹²Lo zu na yangbo ti gbia si lo li na ya ti kota ya ti kubu ti wakuasu ni. Andaa akota zo ti kodro kue ayeke na bongbi ti kua kâ. Azo so ayeke kâ ayeke Elishama, wakuasu ti letaa, Delaya, molenge ti Shemaya, Elnatan, molenge ti Akbor, Gemaria, molenge ti Shafan, Sidekia, molenge ti Hanania na tanga ti akota zo ti kodro kue.

¹³Mika atene na ala peko ti atënë so kue lo ma na ndembe so Baruk adiko na mê ti azo kue, atënë so a su na le ti rulo ni.

¹⁴Tongaso akota zo ni kue atokua Yehudi, molenge ti Netania, molenge ti Shelemia, molenge ti Kushi, ti tene na Baruk, atene: “Rulo so mo diko na dawa ti gba ti azo so, mu mo ga na ni.” Baruk, molenge ti Neria, amu rulo ni si lo ga, lo wara ala.

¹⁵Ala tene na lo: “Duti, mo diko na e rulo ni!” Baruk adiko ni na ala.

¹⁶So akota zo ti kodro ni ama atënë so kue, kota mbeto agbu ala, ala baa le ti tere si ala tene na Baruk: “Biani, fade e yeke fa peko ti atënë so kue na gbia.”

¹⁷Na pekoni, ala hunda Baruk: “Fa na e, mo su atënë so kue tongana nyen?”

¹⁸Baruk akiri tënë na ala: “Jérémie laa atene atënë ni na mbi si mbi yeke su ni na peko ti yanga ti lo. Mbi mu ngu ti sungo na mbeti si mbi su atënë ni oko na oko na le ti rulo ni.”

¹⁹Tongaso akota zo ti kodro atene na Baruk: “Gue, mo honde tere ti mo, mo na Jérémie. Alingbi zo oko ahinga pepe ndo so ala yeke daa.”

²⁰Akota zo ti kodro ni azia rulo ni na ya ti kota kubu ti Elishama, kota wakuasu ti letaa. Na pekoni, ala gue na yangbo ti gbia si ala tene na lo peko ti aye so kue asi.

²¹Gbia atokua Yehudi ti gue ti mu rulo ni. Lo gue, lo mu rulo ni na ya ti kota kubu ti Elishama, kota wakuasu ti letaa. Yehudi aga na rulo ni si lo to nda ti diko ni na mê ti gbia nga na akota zo ti kodro so aluti na tere ti lo.

²²Ye ni so asi na nze gumbaya ti ngu ni so. Andaa gbia aduti na ya ti da so a sara ndali ti ngoi ti de, na tere ti wâ so a sara na ya ti mbeni yongoro duke na nduzu; wâ ni ayeke za na dawa ti lo.

²³Tongana Yehudi adiko kamba ota wala osio ti mbeti ni, gbia ayeke fâ ni na zeme ti fango na mbeti, lo bi na le ti wâ ti ya ti duke ni. Lo sara tongaso ngbii rulo ni kue agbi.

²⁴Gbia na akota zo ti yangbo ti lo kue ama atënë so kue nzoni; me atënë ni azia mbeto na be ti ala oko pepe, ala suru bongo ti ala pepe.

²⁵Andaa Elnatan, Delaya na Gemaria avoro tere ti ala fade na gbia titene lo gbi rulo ni pepe; me lo ma ala pepe.

²⁶Lo mu yanga na Yerameel, molenge ti gbia, na Seraya, molenge ti Azriel nga na Shelemia, molenge ti Abdeel ti gbu wakuasu Baruk, lo na wayanga-Nzapa Jérémie; me Nzapa ahonde ala awe.

²⁷Na peko ti so gbia agbi rulo so Baruk asu atënë ti yanga ti Jérémie na le ni so, tënë ti KOTA GBIA asi na Jérémie, atene:

²⁸“Mu mbeni rulo nde, mo su na le ni atënë so kue mo su na le ti kozo rulo ni so; so ti tene rulo so Yoakim, gbia ti Juda, agbi ni so.

²⁹Fade mo yeke tene tënë so na ndö ti Yoakim, gbia ti Juda, mo tene: ‘Tënë so KOTA GBIA atene ayeke so: Jérémie asu lani na mbeti, atene, fade gbia ti Babilone ayeke ga biani si lo yeke buba kodro so; lo yeke fâ azo na anyama ti hunzi ala. Me Yoakim asuku na Jérémie si lo gbi rulo ni.

³⁰Tongaso, tënë so KOTA GBIA atene na tere ti Yoakim, gbia ti Juda ayeke so: Fade mbeni zo oko ti sewa ti lo ayeke duti pepe na ndö ti mbata ti gbia David. Kuâ ti lo ayeke lango na gigi na gbe ti sungo ti lâ nga na ya ti de ti bi.

³¹Mbi yeke ga na tere ti lo, *ahale ti lo nga na akota zo ti yangbo ti lo ndali ti sioni ti ala. Akpale so kue mbi tene tënë ni si ala ke ti ma mbi so, mbi yeke sara si aga na ndö ti ala, na ndö ti azo so alango na Jérusalem nga na ndö ti azo ti Juda.’ ”

³²Tongaso Jérémie amu mbeni rulo nde si lo mu na wakuasu Baruk, molenge ti Neria. Baruk asu na le ni atënë ti yanga ti Jérémie; so ti tene, atënë so kue ayeke na le ti rulo so Yoakim, gbia ti Juda agbi ni so. Lo su nga na le ti rulo ni ambeni tënë mingi so akpa tere na ti kozo rulo ni.