Read sango Jérémie 41 Bible Online

Jérémie 41 - sango bible

Jérémie 41

¹Na nze mbarambara ni, Ismael, molenge ti Netania, molenge ti Elishama amu azo baleoko na peko ti lo si ala ga na tere ti Gedalia na gbata ti Mispa. Ismael ayeke mbeni zo ti sewa ti gbia, lo yeke oko ti akota zo so ayeke na yangbo ti gbia. Na ndembe so ala ngba ti te kobe na ndo oko na Mispa,

²Ismael, molenge ti Netania, lo na azo baleoko so amu peko ti lo alondo, ala kpo Gedalia, molenge ti Netania na yongoro zeme. Lege so ala fâ lo so gbia ti Babilone azia lo na li ti kodro ni laa.

³Na pekoni, Ismael afâ nga azo ti Juda so kue ayeke na Mispa, na tere ti Gedalia; lo fâ nga aturugu ti Babilone so ayeke lani kâ.

⁴Lango use na peko ti so a fâ Gedalia, zo oko ade ti hinga tënë ti kuâ ti lo pepe.

⁵Tongaso, ambeni zo balemiombe alondo na Sishem, Silo nga na Samarii si aga. Azo ni akio kua ti yanga ti ala kiongo, ala suru bongo surungo na tere ti ala si ala suru tere ti ala na ka. Ala ga na asandaga ti ble na ti dukani ti ya ni na Nzapa na ya ti kota da ti lo na Jérusalem.

⁶Ismael, molenge ti Netania, alondo na Mispa ti gue ti wara ala; na guengo ti lo, lo yeke toto. So lo si na tere ti ala, lo tene na ala: “Ala ga, e gue na ndo ti Gedalia, molenge ti Ahikam.”

⁷So ala si na ya ti gbata ni awe, Ismael, molenge ti Netania na azo ti lo afâ ala si abi kuâ ti ala na ya ti du ti ngu.

⁸Me azo baleoko na popo ti ala atene na Ismael: “Mo fâ e pepe. E yeke na kobe so e honde na yaka: ble, orze, mafuta na mafuta ti wotoro.” Nilaa Ismael azia ti fâ ala, ala na a-ita ti ala ni.

⁹Du ti ngu so Ismael abi kuâ ti azo so kue lo fâ ala daa so, ayeke kota du ti ngu so gbia Asa azi ni na ndembe so Basha, gbia ti Israel aga ti tiri bira na lo. Ismael abi kuâ ti azo ni daa asi.

¹⁰Na pekoni, lo gbu azo so kue angba na Mispa si ala ga azo ti kanga; lo gbu nga amolenge-wali ti gbia ni nga na azo so kue Nebuzaradan, makonzi ti aturugu ti batango gbia amu ala na Gedalia, molenge ti Ahikam si ala ga azo ti kanga. Ismael amu azo ti kanga ni si lo gue na ndo ti azo ti mara ti Amon.

¹¹Yohanan, molenge ti Karea, lo na amakonzi ti aturugu so kue ayeke na lo, ama tënë ti sioni so kue Ismael, molenge ti Netania asara.

¹²Ala mu azo ti ala si ala gue ti tiri bira na Ismael, molenge ti Netania. Ala gue ngbii, ala wara lo na tere ti *lende ti Gabaon.

¹³So azo ti kanga ti Ismael abaa Yohanan, lo na amakonzi ti aturugu so kue amu peko ti lo, tere ti ala anzere.

¹⁴Tongaso, azo so kue Ismael agbu ala na Mispa si ague na ala so, azo ni angba na ndo so akiri ti wara Yohanan, molenge ti Karea.

¹⁵Me Ismael, molenge ti Netania akpe, lo na azo ti lo miombe na dawa ti Yohanan; Ismael amu lege ague na ndo ti azo ti mara ti Amon.

¹⁶Na pekoni Yohanan, molenge ti Karea, lo na amakonzi ti aturugu so amu peko ti lo amu azo so angba na fini ahon na ala; so ti tene azo so Ismael agbu ala lani na Mispa na peko ti fango Gedalia, molenge ti Ahikam so. Azo ni ayeke akoli, so ti tene aturugu; awali, amolenge, *ambaiwa, so ti tene azo so kue Yohanan amu ala na Gabaon si akiri na ala.

¹⁷Azo ni ague ngbii, ala duti na ndo ti lango ti Kimeham, nduru na Betlehem. Ala ye fade ti gue ti si na Ezipte

¹⁸titene ala kpe azo ti Babilone so ala sara mbeto ti ala. Biani, Ismael afâ lani Gedalia, molenge ti Ahikam, lo so gbia ti Babilone azia lo na li ti kodro ni.