Read sango Jérémie 44 Bible Online

Jérémie 44 - sango bible

Jérémie 44

¹Tënë ti Nzapa asi na Jérémie ndali ti azuife so kue aduti na sese ti Ezipte, na gbata ti Migdol, ti Tapanes, ti Manfis nga na ala so ayeke na sese ti Patros. Tongaso Jérémie atene na ala:

²“Tënë so *KOTA GBIA so ayeke na ndö ti dunia kue, Nzapa ti Israel atene ayeke so: Ala baa na le ti ala akpale so kue mbi sara si aga na ndö ti Jérusalem na ambeni gbata ti Juda. Laso, agbata ni kue ati awe si azo ayeke daa mbeni pepe.

³Ye ni asi, ngbanga ti so azo ni azia ngonzo na be ti mbi na lege ti sioni so ala sara. Biani, ala gue ti zö dukani na anzapa nde si ala voro anzapa ni, anzapa so ala hinga ala kozoni pepe. Ataa ala, azo ti Juda, ataa akotara ti ala ahinga nga anzapa ni so pepe.

⁴Mbi mu ngoi ti mbi kue ti tokua na ala na peko ti tere, na peko ti tere, azo ti kua ti mbi so ayeke awayanga-Nzapa ti tene na ala: ‘Be ti mbi ake asioni sarango ye so zo alingbi ti baa na le ti lo fani use pepe so; ala sara ni pepe!

⁵Me ala ma pepe, ala dingi mê ti ala ti ma ni pepe; ala zia pepe lege ti sioni sarango ye ti ala, ala zia pepe lege ti mungo asandaga na anzapa nde.

⁶Nilaa mbi tuku ngonzo ti mbi nga na ngonzo ti mbi ti wâ si agbi agbata ti Juda na abalabala ti Jérusalem. Agbata ni na abalabala ni aga ndo ti gba ti atêne, aga ngonda tongana ti so a yeke baa ni laso so.’ ”

⁷“Fadeso, tënë so KOTA GBIA, Nzapa so ayeke na ndö ti dunia kue, Nzapa ti Israel atene ayeke so: ‘Ala ngba ti sara sioni gbani gbani na ala wani tongaso ngbanga ti nyen? Ala ye ti hunzi azo ti mara ti Juda hunzingo: akoli, awali, amaseka na amolenge so angba ti nyon me? Ala ye titene mbeni zo oko ti ala akiri angba na fini pepe?

⁸Ala ye ti zia ngonzo na be ti mbi na lege ti asarango ye ti ala? Biani, ala mu asandaga na anzapa nde na kodro ti Ezipte so ala ga aduti daa so! Ala ye ti hunzi kue titene ala ga tapande ndali ti azo so ayeke deba amba ti ala na ye ti kamene ndali ti amara kue ti dunia?

⁹Sioni so kue ababâ ti ala, agbia ti Juda na awali ti ala asara nga na sioni so ala wani na awali ti ala asara na kodro ti Juda nga na ndö ti abalabala ti Jérusalem so, be ti ala agirisa na ni awe?

¹⁰Vundu ade agbu ala ndali ni pepe ngbii asi laso; zo oko akpe mbeto ti mbi pepe, zo oko abata lege ti aye so mbi fa na ala pepe; andia so mbi mu na ala nga na akotara ti ala, ala bata lege ni pepe.’ ”

¹¹Jérémie akiri atene: “Ndani laa, tënë so KOTA GBIA so ayeke ndö ti dunia kue, Nzapa ti Israel atene ayeke so: ‘Mbi leke na be ti mbi ti sara sioni na ala si mbi yeke hunzi azo ti Juda kue.

¹²Mbi yeke mu tanga ti azo ti Juda so angba si ala ye ti gue na Ezipte ti honde tere ti ala kâ, fade ala yeke kui kue. Na ya ti kodro so laa ala yeke kui kuâ ti bira wala ti kota nzara, ti londo na akete zo asi na akota zo. Biani, fade ala yeke kui na lege ti bira na kota nzara; ala yeke ga tapande ndali ti azo so ayeke deba amba ti ala; ala yeke ga ye ti dongo be, ye ti dengo ba na ye ti ziango kamene na le ti zo.

¹³Mbi yeke ga na tere ti azo so ayeke lango na Ezipte tongana ti so mbi ga na tere ti azo ti Jérusalem: na lege ti bira, kota nzara na sioni kobela ti bubango kodro.

¹⁴Na popo ti tanga ti azo ti Juda so angba si aga ti honde tere ti ala na Ezipte, fade mbeni oko ayeke kpe pepe, mbeni oko ayeke ngba na fini pepe. Kodro ti Juda so ala yeke sara nzara ti kiri ti duti daa, zo oko ayeke kiri kâ pepe. Biani, ala yeke kiri kâ pepe, me gi ambeni zo oko oko so akpe.’ ”

¹⁵Akoli so kue ahinga atene, awali ti ala ayeke mu *sandaga na anzapa nde, ala na awali so abongbi gbani gbani na ndo so; so ti tene azo so kue aga ti duti na Ezipte nga na Patros atene na Jérémie:

¹⁶“Ataa so mo tene tënë so na e na iri ti *KOTA GBIA, e ye ti ma mo pepe.

¹⁷Me e yeke sara ye alingbi gi na tënë so kue asigigi na yanga ti e: e yeke ngba ti zö dukani na gbia-wali ti yayu si e yeke tuku samba ti mu na sandaga na lo tongana ti so e sara ni ngbii asi laso. Ababâ ti e, agbia ti e na akota zo ti kodro ti e asara nga legeoko tongaso na ya ti agbata ti Juda nga na ndö ti abalabala ti Jérusalem. Lani so e yeke sara tongaso, e yeke na kobe gbani gbani ti tengo ni, e yeke duti nzoni si e hinga ye so iri ni sioni pepe.

¹⁸Me ngbene ye so e zia lege ti mu sandaga ti dukani si e zia ti tuku samba ti mu na sandaga na gbia-wali ti yayu, ye kue atia e si e yeke kui na lege ti bira nga na kota nzara.”

¹⁹Awali ni akiri atene: “So e yeke zö dukani si e yeke tuku samba ti mu na sandaga na gbia-wali ti yayu so, akoli ti e ayeda na ni na e pepe? So e yeke sara agatoo so akpa gbia-wali ni si e yeke mu sandaga ti samba na lo so, akoli ti e ahinga ni pepe?”

²⁰Tongaso Jérémie atene na azo ni kue, akoli na awali so akiri tënë tongaso na lo so, lo tene:

²¹“Na ya ti agbata ti Juda nga na ndö ti abalabala ti Jérusalem, ala mu ando asandaga so awe, ala na ababâ ti ala, agbia ti ala, akota zo ti ala na azo ti kodro ni kue; so mvene laa? Ala baa ti ala atene, KOTA GBIA ahinga tënë ni pepe? Be ti lo ati daa pepe?

²²KOTA GBIA akanga be ti lo gbaa na asioni sarango ye ti ala nga na asioni sarango ye ti ala so zo alingbi ti baa na le ti lo fani use pepe so. Ndani laa kodro ti ala aga ndo ti gba ti atêne, aga ngonda si zo ayeke daa mbeni pepe, aga tapande ndali ti azo so ayeke deba amba ti ala; ye ni laa a yeke baa ni laso so.

²³Ndani so kpale ni asi na ala ayeke so: ala zö dukani na anzapa nde, ala sara siokpari ti ke KOTA GBIA, ala ma yanga ti lo pepe, ala ke ti sara ye alingbi na aye so lo fa, andia ti lo nga na awango ti lo; ye ni laa a yeke baa ni laso so.”

²⁴Jérémie akiri atene na azo ni kue, akoli na awali, lo tene: “Ala azo ti Juda kue, ala so ayeke na kodro ti Ezipte so, ala ma tënë ti KOTA GBIA!

²⁵Tënë so KOTA GBIA so ayeke na ndö ti dunia kue, Nzapa ti Israel atene ayeke so: Ala, na awali ti ala, tënë so asigigi na yanga ti ala, ni laa ala sara so: ala zö dukani na gbia-wali ti yayu si ala tuku samba ti mu na sandaga na lo. Ala mu zendo awe, ala ngba daa, ala sara ye ti peko ni ma!

²⁶Ala azo ti Juda kue, ala so ayeke na kodro ti Ezipte so, ala ma tënë ti KOTA GBIA! Mbi deba na iri ti mbi so ayeke kota: na ya ti Ezipte kue, mbeni zo ti Juda ayeke kiri ti mu iri ti KOTA GBIA ti deba na ni pepe, atene: ‘Kota Gbia NZAPA ayeke na fini!’

²⁷Fade le ti mbi ayeke kpengba na ndö ti ala ti sara sioni na ala, me ti sara nzoni pepe. Azo ti Juda so kue ayeke na kodro ti Ezipte, fade ala yeke kui na lege ti bira na kota nzara ngbii, ala hunzi kue.

²⁸Gi ambeni kete laa ayeke wara lege ti kpe bira ni si ala londo na Ezipte ti kiri na Juda. Ndo so laa, azo ti Juda so angba na fini, ala so aga lani ti honde tere ti ala na Ezipte ayeke hinga atene, tënë ti mbi laa aga taa-tënë, wala ti ala.

²⁹Baa, tënë so mbi, KOTA GBIA, mbi tene ayeke so: Mbi yeke ga na tere ti ala na Ezipte; mbi yeke fa na ala ye so ala yeke hinga na ni. Tongaso fade ala yeke hinga atene, sioni ye so mbi tene tënë ni ayeke ga taa-tënë ndali ti ala. Ye so ala yeke hinga na ni ayeke so:

³⁰Tënë so KOTA GBIA atene ayeke so: Mbi yeke zia Faraon Hofra, gbia ti Ezipte na maboko ti azo so aye gi kuâ ti lo tongana ti so mbi zia lani Sedesias, gbia ti Juda, na maboko ti wato ti lo Nabukodonosor, gbia ti Babilone, lo so aye lani gi kuâ ti Sedesias so.”