Read sango Jérémie 46 Bible Online

Jérémie 46 - sango bible

Jérémie 46

¹So ayeke tënë ti *KOTA GBIA so asi na wayanga-Nzapa Jérémie ndali ti amara nde.

²Tënë ndali ti Ezipte na aturugu ti Faraon Neko, gbia ti Ezipte. Na ngoi ni so, Faraon Neko ayeke na yanga ti *bale ti Efrate, na gbata ti Karkemish. Na ngu osio ni so Yoakim, molenge ti Yosias ayeke gbia ti Juda, Nabukodonosor, gbia ti Babilone aga si akinda lo na ya ti bira.

³“Ala leke *avala, akete ni na akota ni! Ala londo asara bira!

⁴Ala kanga aye ti bira na ndö ti ambarata! Ala azo ti kpengo na mbarata, ala londo! Ala yu kpoto ti bira, ala luti na molongo! Ala leke yanga ti alikongo, aza! Ala yu kazaka ti wen!”

⁵Me nyen laa asi, nyen? Nyen laa mbi yeke baa so, nyen? Be ti azo ni afun kue awe, ala yeke kiri na peko! A kinda angangu zo ti bira ti ala awe; ala yeke kpe kirikiri, ala baa ndo na peko pepe; mbeto ayeke mbage na mbage kue; so tënë ti yanga ti KOTA GBIA laa.

⁶Zo so ahinga ti kpe loro mingi, lo lingbi ti kpe pepe ti hon! Zo so ayeke ngangu zo ti bira, lo lingbi ti soo fini ti lo pepe! Kâ na Banga, na yanga ti bale ti Efrate, ala pika gere ti ala, ala ti.

⁷Zo wa laa asuku tongana ngu ti Nil, tongana bale so ngu ni asuku ahon ndoni so?

⁸Ezipte laa; lo suku tongana Nil. Lani lo tene: “Tongana ti so Nil asuku, tongana ti so ngu ni asuku ahon ndoni tongana ti bale, mbi yeke suku ti mu ndö ti sese kue; mbi yeke sara si agbata abuba, ala na azo ti ya ni kue.

⁹Ala ambarata, ala londo asara bira! Ala apusu ti mbarata, ala mu loro ngangu! Ala angangu zo ti bira, ala mu li ni! Ala azo ti Etiopii na ti Put, ala so ahinga ti gbu avala, ala azo ti Lud so ahinga ti tiri na kokora, ala nga, ala mu li ni!”

¹⁰Me ti Kota Gbia NZAPA so ayeke na ndö ti dunia kue, lango ni so ayeke lango ti kiringo peko ti sioni na azo; lango so lo yeke kiri peko ti sioni na awato ti lo. Yongoro zeme aga tongana mbeni sioni nyama; lo yeke fâ azo ngbii nzara ni ahunzi, lo yeke nyon mene ti ala ngbii asara lo tongana samba. Na kodro ti Banga, na tere ti bale ti Efrate, so *sandaga na Kota Gbia NZAPA so ayeke na ndö ti dunia kue!

¹¹So mawa na mo, maseka-wali Ezipte! Gue na sese ti Galaad, mo gi mafuta ti zia na le ti ka ti mo. Mo so li ti mo ti gi ayoro gbani gbani pepe: ka ti mo ni ayeke mu pepe.

¹²Amara nde ama tënë ti ye ti kamene so asi na mo, ngbanga ti so demango tere ti mo amu ndo kue. Ngangu zo ti bira ati na ndö ti mbeni ngangu zo ti bira; ala use kue ati legeoko gburrr.

¹³Tënë ti *KOTA GBIA asi na wayanga-Nzapa Jérémie ndali ti Nabukodonosor, gbia ti Babilone na ndembe so lo ga ti tiri bira na Ezipte:

¹⁴“Ala azo, ala fa tënë ni na Ezipte; ala sara si azo ama tënë ni na Migdol, na Manfis nga na Tapanes. Ala tene na ala, atene: ‘Ala londo! Ala leke tere ti ala!’ Biani, azo so ayeke nduru na tere ti ala, bira ahunzi ala awe!

¹⁵Nyen? Kota babâ ti bagara ti mo ati awe! Lo gbu le ni pepe, KOTA GBIA apusu lo awe.

¹⁶KOTA GBIA asara si gba ti aturugu apika gere ti ala si ala ti. Ala yeke tene na popo ti ala: ‘E londo, e kiri na ndo ti e, na kodro so a du e daa si e kpe bira so ayeke sara sana na azo so.’

¹⁷Ti Faraon, gbia ti Ezipte, a zia iri ti ngia na ndö ti lo, atene: ‘Gba ti sokporo, me lo zia ngoi ahon senge senge!’

¹⁸Fini ti mbi! So tënë ti yanga ti Gbia, lo so iri ti lo ayeke ‘KOTA GBIA so ayeke na ndö ti dunia kue’: fade wato ayeke ga; lo yeke ga biani tongana ti so Tabor aluti nganganga na popo ti ahoto, tongana ti so Karmel ayeke na ndö ti kota ngu-ingo!

¹⁹Azo ti kodro ti Ezipte, ngoi titene ala ro akungba ti ala ti gue na kodro wande alingbi awe. Biani, fade gbata ti Manfis ayeke ga ngonda, wâ ayeke gbi ni, zo ayeke kiri ti duti daa pepe.

²⁰Ezipte ayeke ando mbeni pendere mama ti bagara! Me mbeni sioni vuma alondo na mbage ti Banga, aga ati na ndö ti lo.

²¹Aturugu ti kodro wande so Ezipte afuta ala, ala yeke tongana abagara ti mafuta. Ala nga, ala zia peko ti ala na amba ti ala awe, ala kue, ala kpe legeoko. Ala gbu le ni pepe na lango so ye ti vundu ayeke ga na ndö ti ala, na ndembe so mbi yeke ga na tere ti ala.

²²Awato ayeke ga gbani gbani ti tuku na ndö ti Ezipte; ala yeke tongana azo ti dengo keke: ala mu do na maboko ti ala si ala yeke ga. Tongaso, aturugu ti Ezipte kue akpe ahon tongana ngbo so zo ayeke ma toto ti kpengo ti lo pepe.

²³So tënë ti yanga ti KOTA GBIA laa: Ala yeke fâ gbako ti lo na sese; gbako ni akanga lani mingi, zo alingbi ti hon na ya ni pepe. Biani, awato ni awu mingi ahon agbadola, zo alingbi ti diko ala pepe.

²⁴Kamene agbu le ti maseka-wali Ezipte: a zia lo na maboko ti mbeni mara so alondo na Banga si aga.”

²⁵KOTA GBIA so ayeke na ndö ti dunia kue, Nzapa ti Israel atene: “Mbi yeke ga na tere ti Amon, nzapa ti Tebes, lo na Ezipte na anzapa ti lo nga na agbia ti lo; mbi yeke ga na tere ti Faraon na azo so kue azia be ti ala na ndö ti lo.

²⁶Mbi yeke zia ala na maboko ti azo so aye gi kuâ ti ala: Nabukodonosor, gbia ti Babilone, lo na aturugu ti lo. “Gbanda na pekoni, fade azo ayeke kiri ti lango na sese ti Ezipte tongana ti ando.” So tënë ti yanga ti KOTA GBIA laa.

²⁷“Ti mo Israel, zo ti kua ti mbi, sara mbeto pepe! Mo *hale ti Jacob, mo do na mbeto pepe! Biani, mbi yeke ga ti soo mo na ya ti akodro so ayeke na yongoro ndo; mbi yeke soo nga ahale ti mo na sese so a gbu ala si a gue na ala daa so. Israel, fade mo yeke kiri si mo yeke wara lege ti duti kpoo, mbeni ye sioni ti kiri ti sara mo ayeke daa pepe, mbeni zo ti kiri ti zia mbeto na be ti mo ayeke daa pepe.

²⁸Mo Israel, zo ti kua ti mbi, sara mbeto pepe! So tënë ti yanga ti KOTA GBIA laa. Biani, mbi yeke na mo. Amara so kue mbi kangbi mo lani na popo ti ala, mbi yeke fâ ala kue ti hunzi ala; me ti mo, mbi yeke hunzi mara ti mo pepe. Biani, mbi pika mo, me na legeni; mbi lingbi fade ti zia mo senge tongaso pepe!”