Read sango Jérémie 48 Bible Online

Jérémie 48 - sango bible

Jérémie 48

¹Tënë na ndö ti Moab. Tënë so *KOTA GBIA so ayeke na ndö ti dunia kue, Nzapa ti Israel atene ayeke so: “So mawa na azo ti Nebo: azo abuba gbata ni awe! So ye ti kamene na gbata ti Kiriataim: a mu gbata ni na bira awe! So ye ti kamene na gbata so ngangu gbagba ayeke na tere ni: a kungbi gbagba ni na sese awe!

²Ye so ayeke sara gonda ti Moab ahunzi awe. Azo aleke tënë ti sara sioni na gbata ti Heshebon, ala tene: ‘E gue, e zi gbata so na popo ti amara!’ Madmen, mo nga a kanga yanga ti mo awe, bira ayeke tumba peko ti mo.

³A ma dekongo ti azo na Horonaim, atene: ‘Ye kue abuba awe! So kota kpale ti bubango ndo!’

⁴Kodro ti Moab ati awe! A ma amolenge ti lo so adekongo ngangu.

⁵Azo ayeke toto si ayeke ma hoto ti Luhit. So azo alondo na Horonaim ti zu, a yeke ma dekongo ti mawa ndali ti aye so abuba.

⁶‘Ala kpe ahon, ala soo fini ti ala-oo! Ala ngba na ya ti benyama tongana lele ti ngonda.’

⁷Moab, ando mo zia be ti mo na ndö ti asarango ye ti mo nga na ndö ti amosoro ti mo. Mo nga, a gbu mo awe! Fade a yeke gbu nzapa ti mo Kemosh ti gue na lo na lo na kodro wande, lo na awayango-sandaga ti lo na amakonzi ti lo.

⁸Fade zo ti bubango ye ayeke si na ya ti agbata oko oko, gbata oko ayeke ngba pepe. Lo yeke buba ye kue na popo-hoto nga na kpangbara sese”. Tënë so KOTA GBIA atene laa.

⁹Ala mu *kpangi na Moab, lo ye ti huru ti hon! Agbata ti lo ayeke ga ngonda, zo ayeke duti daa mbeni pepe.

¹⁰Deba aga na ndö ti zo so ayeke sara kua ti KOTA GBIA na wokongo tere! Deba aga na ndö ti zo so ake titene yongoro zeme ti lo atuku mene!

¹¹“Ti londo na ngoi so Moab ade kete ngbii asi laso, lo duti nzoni: laoko a gbu lo a gue na lo na kodro wande pepe. Lo duti ando gi kpoo tongana vin so aduti na ndö ti puru ni. Laoko a tuku vin ni na ya ti mbeni ta nde pepe. Ndani laa lo bata nzerengo ti lo nga na nzoni fion ti lo.

¹²“Tënë so KOTA GBIA atene ayeke so: Ndani laa, mbeni lango ayeke ga so mbi yeke tokua azo titene ala tuku lo na ya ti mbeni ta nde. Ye so kue ayeke na ya ti ata ti lo, fade azo ni atuku na sese si ala fâ ya ti ata ni.

¹³Fade Kemosh, nzapa ti Moab ayeke bi kamene na le ti lo tongana ti so Betel, nzapa ti Israel abi kamene na le ti lo. Andaa Israel azia ando be ti lo kue na ndö ti nzapa ni so.

¹⁴“Ala, azo ti Moab, a sara tongana nyen si ala tene: ‘E yeke angangu zo ti bira, e yeke akoli so ahinga ti tiri bira mingi’?

¹⁵Ka so kodro ti Moab abuba kue awe so, azo alondo ti tiri bira na agbata ni si ala mu angangu maseka ti lo ti gue na ala na ndo ti fango azo so!” Gbia so iri ti lo ayeke KOTA GBIA so ayeke na ndö ti dunia kue, tënë so lo tene ayeke so:

¹⁶Lango ti tingo ti Moab aga nduru awe, ye ti ngangu ayeke ga na ndö ti lo fafadeso.

¹⁷Ala kue, ala so alango nduru na lo, ala hinga lo nzoni so, ala dema lo. Ala tene: “Azo-oo, azo! Mara ti ngangu tongaso, mara ti gonda na komandema tongaso, ya ni alingbi ti fâ?”

¹⁸Mo, zo ti gbata ti Dibon, londo na ndö ti mbata ti mo ti gbia, mo zu, mo duti na ndö ti kuru sese. Biani, zo so abuba kodro ti Moab so, lo yeke ga ti tiri bira na mo; lo yeke kungbi na sese gbagba ti mo ti bira.

¹⁹Mo, zo ti gbata ti Aroer, luti na tere ti lege, mo *bembe ndo. Hunda na azo so ayeke kpe nga na azo so ayeke gi lege ti soo kuâ so, mo tene: “Nyen laa asi, nyen?”

²⁰Fade azo ni ayeke kiri tënë: “A nika Moab awe! Kamene ahon ndö ti kodro ni awe!” Ala dekongo, ala dekongo ngangu! Ala to mbela na tënë ni na tere ti ngu ti Arnon, ala tene: Moab ati awe!

²¹Ngbanga ti KOTA GBIA ati na ndö ti kpangbara sese na agbata ti Holon, ti Yahas, ti Mefaat,

²²ti Dibon, ti Nebo, ti Bet-Diblataim,

²³ti Kiriataim, ti Bet-Gamul, ti Bet-Meon,

²⁴ti Keriot nga na ti Bosra. Ngbanga ni ati na ndö ti agbata kue ti kodro ti Moab, ala so ayeke nduru na ala so ayeke na yongoro ndo.

²⁵“A fâ ya ti ngangu ti Moab awe, komandema ti lo akungbi awe”; so tënë ti yanga ti KOTA GBIA laa.

²⁶Moab abaa tere ti lo kota ahon KOTA GBIA. Ayeke nzoni a mu na lo samba, lo nyon ngbii lo de samba ni na sese. Tongaso si lo nga lo ga ye so azo ayeke he ni na ngia.

²⁷Moab, mo nga, mo he ando Israel na ngia-aa? Mo ye ti baa lo tongana zo ti nzi. Ndani laa, tongana mo yeke tene tënë ti lo, mo yeke yingi li ti mo.

²⁸Ala, azo ti Moab, ala zia agbata, ala gue, asara kodro na popo ti atêne. Ala sara ye tongana *ambipa so asara da ti ala na mbeni mbage ti kota du kâ.

²⁹E ma tënë ti pikango kate ti Moab awe, pikango kate ti lo so ahon ndoni; e ma tënë ti baba ti lo, tënë ti pikango kate ti lo, tënë ti kuru baba ti lo, tënë ti sioni yanga ti lo; lo baa tere ti lo kota lo hon azo kue.

³⁰“So tënë ti yanga ti KOTA GBIA laa: Mbi hinga atënë ti baba ti lo. Me atënë ti baba ti lo ni na asarango ye ti lo ayeke senge senge.”

³¹Ndani laa, mbi yeke he bia ti totongo kuâ ndali ti Moab, mbi yeke dekongo ti iri ndo ndali ti azo ti Moab kue, mbi yeke dema ndali ti azo ti Kir-Heres.

³²Mbi yeke toto ndali ti mo, *vinye ti Sibma, ahon ti so mbi yeke toto ndali ti azo ti Yazer. Amaboko ti keke ti mo ague ngbii asi na mbage ti kota ngu-ingo kâ, ague ngbii asi na kota ngu-ingo ti Yazer. Me zo ti bubango ye aga si abuba ale ti keke ti mo nga na ale ni so mo ko ni awe so.

³³Ngia na nzerengo tere ahunzi awe na yaka ti Moab so a lu na ya ni akeke so a yeke te alengo ni. Vin ayeke na ya ti ata mbeni pepe, akoli ti petengo ale ti vinye ayeke daa mbeni pepe; dekongo tongana ti azo so ayeke ko ale ti *vinye ti sara na vin ahunzi awe.

³⁴Azo ti Heshebon adekongo; dekongo ni asi na Elale. A ma go ti ala na Yahas; a ma nga go ti ala, ti londo na Soar ngbii asi na Horonaim nga na Eglat-Selisia. Ataa angu ti Nimrim ahole kue si aga kuru sese.

³⁵“Azo so kue ayeke na Moab si ayeke gue na ndö ti ahoto ti ya asandaga so a yeke gbi ni kue na wâ na anzapa ti ala, fade mbi yeke hunzi ala kue”; so tënë ti yanga ti KOTA GBIA laa.

³⁶Ndani laa mbi yeke toto na be ti mbi kue ndali ti Moab nga ndali ti azo ti Kir-Heres tongana ti so *ngoli ayeke toto. Amosoro so kue ala wara ni ando agirisa awe.

³⁷Akoli kue akio kua ti li ti ala, ala fâ kua ti yanga ti ala, ala suru tere ti amaboko ti ala na ka si ala yu bongo ti mua.

³⁸Na li ti ada so ayeke na Moab nga na ndo so gba ti azo ayeke bongbi daa, gi abia ti totongo kuâ si a yeke ma. “Mbi fâ ya ti Moab awe tongana ti so zo a fâ ya ti ta so lo ke ni awe”; so tënë ti yanga ti KOTA GBIA laa.

³⁹“Azo-oo! Azo! A nika Moab awe! Ala dema maa! Azo-oo! Azo! So ye ti kamene ti nyen! Moab azia peko ti lo na amba ti lo awe!” Fade Moab ayeke ga ye ti hengo na ngia na ye ti ziango mbeto na be ti azo so kue ayeke nduru na lo.

⁴⁰Baa, tënë so KOTA GBIA atene ayeke so: “Wato azi ya ti kpangi ti lo, lo yeke huru na ndö ti Moab tongana *ngoalo.”

⁴¹A mu agbata na bira awe, ando so ngangu gbagba ayeke na tere ni, a mu ni awe. Tongaso, be ti angangu turugu ti Moab afun kue tongana ti wali na ndembe ti dungo ni.

⁴²A buba ye kue na Moab awe, lo kiri lo ngba mara pepe. Lo baa fade tere ti lo kota ahon KOTA GBIA.

⁴³“Kota mbeto, kota du na gbanda, ye so ayeke ndali ti ala, azo ti Moab laa; so tënë ti yanga ti KOTA GBIA laa.

⁴⁴Zo so ayeke kpe na dawa ti kota mbeto, lo yeke ti na ya ti kota du; zo so ayeke londo na ya ti du ni ti sigigi, lo yeke ti na ya ti gbanda. Biani, mbi yeke sara si ye so aga na ndö ti Moab na ngu so mbi yeke ga na tere ti lo; so tënë ti yanga ti KOTA GBIA laa.

⁴⁵Azo so akpe, ngangu ti ala ahunzi awe, nilaa ala luti ti wu tere ti ala na Heshebon. Me mbeni wâ asigigi na ya ti gbata ni; na yangbo ti gbia Sihon, mbeni menga ti wâ ague, agbi kodro ti azo ti sarango wusuwusu ni so, ti londo na katikati ti Moab ngbii asi na be ti kodro ni.

⁴⁶So mawa na mo, Moab! Ala, azo ti nzapa Kemosh, ti ala ahunzi awe! A gbu amolenge ti ala ti koli na ti wali, a gue na ala na kodro wande.

⁴⁷Me mbeni lâ, fade mbi yeke sara titene Moab akiri na kozo ndo ti lo; so tënë ti yanga ti KOTA GBIA laa.” Ngbanga so KOTA GBIA afâ na li ti Moab, tënë ni ahunzi na ndo so.