Read sango Jérémie 51 Bible Online

Jérémie 51 - sango bible

Jérémie 51

¹Tënë so *KOTA GBIA atene ayeke so: “Mbi yeke tokua mbeni pupu ti bubango ye na ndö ti Babilone nga na ndö ti azo ti kodro ni.

²Mbi yeke tokua awande so fade ayeke ga ti kangbi azo ti kodro ni kirikiri tongana poro ti ale ti kobe so zo ape ya ni. Awande ni ayeke buba ye kue ti kodro ni. Na lango ti aye ti ngangu ni so, ala yeke londo mbage na mbage kue ti ga ti ngoro kodro ni.”

³Ayeke nzoni a agboto ya ti kokora na tere ti zo so agboto ya ti kokora ti lo, na tere ti zo so ayu bongo ti wen si lo yeke pika kate ti lo ndali ni. Ala baa mawa ti angangu zo ti bira ti ala pepe! Ala fâ aturugu ni kue kue kue!

⁴Azo so awara ka, fade ala yeke lango na ndö ti sese ti Babilone; azo so akui na ya ti bira, fade kuâ ti ala ayeke ngba na ndö ti alege kirikiri.

⁵Biani, kodro ti ala asi singo na sioni so ala sara ti ke Nzapa ti Israel, lo so lo yeke nde si lo yeke nzoni kue. — Me Nzapa, KOTA GBIA so ayeke na ndö ti dunia kue, ado Israel na Juda azia ala pepe titene ala ga tongana wali-mua. —

⁶Ala azo, ala sigigi na ya ti Babilone, ala kpe ahon! Ayeke nzoni zo oko oko asoo fini ti lo; tongaso si ala kui ndali ti sioni ti lo pepe. Biani, ndembe titene KOTA GBIA akiri na kodro ni peko ti sioni ti lo alingbi awe. Lo futa kodro ni alingbi na ye so lo sara.

⁷Babilone ayeke ando mbeni kopo ti lôro na maboko ti KOTA GBIA! Ye ti ya ti kopo ni asara azo ti dunia kue tongana samba. Azo ti amara nde anyon vin ti lo ngbii li ti ala aga kirikiri.

⁸Me gi hio tongaso, Babilone ati, ya ti lo afâ kue. “Ayeke nzoni ala he bia ti totongo kuâ ndali ti lo. Ala zia mafuta na le ti aka ti lo; e hinga pepe, fade tere ti lo ayeke ga nzoni!”

⁹— “E ye ti kai kobela na tere ti Babilone, me tere ti lo aga nzoni pepe. Ayeke nzoni e zia lo, zo oko oko akiri na kodro ti lo. Biani, ngbanga so ati na ndö ti lo ayeke ngangu mingi; ague ngbii asi na le ti nduzu, ague ngbii asi na ambinda.

¹⁰KOTA GBIA afa mbirimbiri ti e polele. E gue na *Sion, e fa peko ti ye so KOTA GBIA Nzapa ti e asara!”

¹¹KOTA GBIA aleke na be ti lo ti buba kodro ti Babilone. Ndani laa lo zia nzara ni na be ti agbia ti Medii. Biani, KOTA GBIA akiri na awato ti e peko ti sioni ti ala awe; lo kiri na ala peko ti sioni so ala sara na kota da ti lo. Ala leke yanga ti ale ti kokora, aza! Ala mu ni asi ya ti abozo ni!

¹²Ala yo na nduzu mbeni bendere so afa atene, ala yeke nduru ti tiri bira. Ala zia bendere ni na tere ti agbagba ti Babilone! Ala sara si wungo ti aturugu so ayeke bata ndo ni aga mingi ahon ti kozoni! Ala zia asanziri na tere ti agbagba ni; ala honde azo na ya ti ngonda! Biani, ye so KOTA GBIA aleke na be ti lo ti sara na azo ti Babilone so, lo yeke sara ye alingbi na ni.

¹³Babilone, mo so mo yeke lango na tere ti kota *bale so, mo so gba ti amosoro asi singo na mo so, ti mo ahunzi awe. Mo nzi amba ti mo alingbi awe.

¹⁴KOTA GBIA so ayeke na ndö ti dunia kue adeba na iri ti lo wani na Babilone, atene: “Mbi yeke sara si azo asi singo na ndo ti mo; ala duti gbani gbani tongana agbadola. Azo ni ayeke dekongo tongana azo so ayeke ko ale ti *vinye ti sara na vin.”

¹⁵KOTA GBIA asara sese na lege ti ngangu ti lo, lo sara si dunia abaa gigi na lege ti ndara ti lo, lo gbara le ti nduzu na lege ti hingango ye ti lo.

¹⁶So lo dekongo awe, gba ti angu abongbi tere na yayu, lo sara si angbongboro mbinda alondo na nda ti sese kue si ayeke ma na nduzu, lo sara si wâ ti bekpa amu lege na ngu-Nzapa ti pika; lo sara si pupu alondo na ndo so lo bata ala daa ti sigigi.

¹⁷Azo kue ayeke azo so li ti ala ayeke daa pepe, ala hinga ndo pepe; awakode-kua kue ti lôro, kamene agbu le ti ala ndali ti ayanda ti ala, ayanda ti ala ni ayeke ye ti mvene, pupu ayeke na ya ti ala pepe.

¹⁸Ala yeke asenge senge ye, ala yeke aye so azo ayeke he na ngia. Na lango so KOTA GBIA ayeke ga na tere ti ala, ala kue ayeke hunzi.

¹⁹Ti Nzapa, lo yeke tongana ala pepe, lo so lo yeke mosoro ti Israel; lo laa lo sara si dunia abaa gigi, mara ti Israel ayeke ye ti lo; iri ti lo ayeke KOTA GBIA so ayeke na ndö ti dunia kue.

²⁰“Babilone, lani mo yeke martoo, mo yeke ye ti bira ti mbi. Mbi mu mo ti nika amara nde nga ti buba akodro-gbia.

²¹Mbi mu mo ti nika ambarata na azo ti kpengo na ambarata ni, apusu ti mbarata na azo ti kpengo na apusu ni.

²²Mbi mu mo ti nika akoli na awali, amaseka na akangba, amolenge-koli na amolenge-wali.

²³Mbi mu mo ti nika awabatango-taba na ataba ti ala, azo ti fango yaka na abagara so ayeke gboto amasini ti fango na yaka ti ala, agovoronere na akota komanda.”

²⁴“Me ye so ala yeke baa na le ti ala fadeso ayeke so: sioni so kue Babilone na azo ti Babilone ni asara na gbata ti *Sion, mbi yeke futa azo ni alingbi na ye so ala sara; so tënë ti yanga ti KOTA GBIA laa.

²⁵Biani, Babilone, mbi na mo, e yeke baa ya ni; so tënë ti yanga ti KOTA GBIA laa. Titene mo buba ye, mo yeke na ngangu tongana mbeni kota hoto; mo yeke buba aye ti ndö ti sese kue! Mbi yeke yoro maboko na le ti mo; mbi yeke sara si mo londo kâ na li ti kota têne, mo ti na sese. Mbi yeke sara si mo ga tongana hoto so wâ agbi ni kue.

²⁶Zo wa laa ayeke kiri ti wara na ndo ti mo ngangu têne ti gere ti da wala têne ti sarango na gere ti da? Biani, fade mo ga ngonda kpu na kpu”; so tënë ti yanga ti KOTA GBIA laa.

²⁷Ala azo, ala yo mbeni bendere na nduzu na ya ti kodro ni, ala huru didi na popo ti amara nde! Ala bongbi amara ti ga na tere ti Babilone; ala iri azo ti akodro-gbia ti Arara, ti Mini na ti Ashekenaz ti ga na tere ti lo. Ala mu ambeni turugu ti kota kamba azia ala titene ala mu aturugu na kua, tongaso si ala tiri bira na Babilone. Ala tokua ambarata gbani gbani tongana agbadola ti gue ti tiri bira na lo.

²⁸Ala bongbi amara ti tiri bira na lo; so ti tene agbia ti Medii, ala na agovoronere ti ala, na akota komanda ti ala nga na kodro so kue ala yeke sara komandema na ndö ni.

²⁹Sese ayingi; sese ni ado na mbeto na ndembe so ye so KOTA GBIA aleke na be ti lo ti sara na Babilone, ye ni asi alingbi na ni: lo sara si kodro ni aga ngonda, zo ayeke daa mbeni pepe.

³⁰Angangu zo ti bira ti Babilone azia lege ti bira awe, ala honde tere ti ala na ya ti ngangu gbagba ti bira ti ala kâ. Ngangu ti ala kue ahunzi awe, ala ga tongana awali. A zi ayanga ti gbata ni polele awe; a gbi ada ti lango ti azo ti Babilone kue awe.

³¹Azo ti tokua akpe ague, awara ambeni zo ti tokua, azo ti mungo sango akpe ague awara ambeni zo ti mungo sango; ala gue ti tene na gbia ti Babilone, atene: “A mu gbata ni kue awe;

³²a mu ndo so azo ayeke fâ ngu daa na gere, a gbi asosongo awe, be ti aturugu afun kue awe.”

³³Tënë so KOTA GBIA so ayeke na ndö ti dunia kue, Nzapa ti Israel atene ayeke so: “So mawa na lo, maseka-wali Babilone! Lo ga tongana lakere so azo ayeke leke ni titene a pika ale ti kobe daa. Angba gi kete titene ngoi ti kongo ale ti kobe ndali ti lo ayeke lingbi.”

³⁴“Nabukodonosor, gbia ti Babilone ate mbi awe, lo pete ya ti mbi kue, lo do mbi, lo zia tongana sembe so ya ni angba senge. Lo mene mbi tongana kota ngbo so amene ye; lo sara si ya ti lo asi na anzerengo ye ti tere ti mbi; na pekoni lo bi tanga ni na ngonda.

³⁵Azo ti gbata ti *Sion atene: Ayeke nzoni aye ti ngangu so Babilone asara na e akiri na ndö ti lo! Azo ti Jérusalem atene: Ayeke nzoni ngbanga ti mene ti e akiri na ndö ti azo ti Kalde!”

³⁶Tënë so *KOTA GBIA atene ndali ti Jérusalem ayeke so: “Mbi yeke mu tënë ti mo na maboko si azo so asara sioni na mo so, mbi yeke kiri na peko ti sioni ni na ala. Mbi yeke sara titene kota *bale ti lo ahole si ali ti ngu ti lo ahole kue.

³⁷Fade Babilone ayeke ga ndo ti gba ti atêne, ndo ti lango ti *anzagua; ndo so aga ngonda na ye so azo ayeke huru yanga ti ala na bango ni, zo ayeke kiri ti duti daa mbeni pepe.

³⁸Ti ndembe so, azo ti Babilone ayeke tongana akete bamara so atoto, ala yeke toto tongana abamara.

³⁹Na ndembe so nzara ti aye ayeke gbi be ti ala tongana wâ, mbi yeke leke matanga ti tengo kobe ndali ti ala. Mbi yeke mu na ala samba, ala nyon ngbii ahon ndö ti ala. Fade ala yeke lango kpu na kpu, ala yeke kiri ti zingo pepe; so tënë ti yanga ti KOTA GBIA laa.

⁴⁰Mbi yeke gue na ala na ndo ti fango ala tongana ti so zo ague na akete taba, akoli-taba na akoli-ngasa na ndo ti fango ala.”

⁴¹Mara ti ye tongaso alingbi ti si? Gbata ti Sheshak so ando iri ti lo awu na ndö ti dunia kue so, fadeso azo asara bira na ni si ala mu ni awe! Mara ti ye tongaso alingbi ti si? Na popo ti amara kue, Babilone aga fadeso ngonda!

⁴²Kota ngu-ingo asuku amu Babilone awe; *amapo ti kota ngu-ingo ni atoto ngangu si akanga ndö ti Babilone kue.

⁴³Agbata ti Babilone aga ngonda; kodro ni ahole kue, lando so ahole kasakasa, zo ayeke lango daa mbeni pepe, zo ayeke hon daa pepe.

⁴⁴KOTA GBIA atene: “Mbi yeke ga na tere ti Bel, nzapa ti Babilone. Ye so Bel angba ti mene, mbi yeke zi ni na yanga ti lo. Amara nde ayeke kiri ti gue gbani gbani na mbage ti lo pepe. Gbagba ti Babilone ati awe.

⁴⁵Ala azo ti mbi, ala sigigi na ya ti gbata ni! Ayeke nzoni zo oko oko asoo fini ti lo si lo kpe ngonzo ti mbi ti wâ!

⁴⁶“Be ti ala awoko pepe! Asango so ayeke hon na ya ti kodro ni so, ala sara mbeto ni pepe. Na mbeni ngu, azo ayeke tene mbeni tënë nde, na mbeni ngu, ala yeke tene mbeni tënë nde. Azo ni ayeke tene: na ya ti kodro ni, gi sarango ngangu na azo, mbeni sioni gbia ayeke ga ti tumba mba ti lo na ndö ti mbata…

⁴⁷Ambeni lango ayeke ga so mbi yeke ga na tere ti ayanda ti Babilone. Kodro ni kue ayeke duti na ya ti kamene. Azo so akui kuâ ti bira, ala yeke ngba ti lango na sese na ya ti gbata ni.

⁴⁸Fade azo ti bubango kodro ti Babilone ayeke londo na mbage ti Banga ti ga. Tongaso yayu na sese ayeke he bia ti songo benda na ndö ti Babilone.” So tënë ti yanga ti KOTA GBIA laa.

⁴⁹Na dunia kue, azo mingi akui ndali ti Babilone. Legeoko nga, alingbi Babilone ati ndali ti azo ti Israel so akui ndali ti lo so.

⁵⁰Ala, azo so lo fâ ala pepe so, ala kpe, ague, aluti na lege pepe! Yongoro kâ, ayeke nzoni ala gbu li ti ala na ndö ti KOTA GBIA, ala dabe ti ala na Jérusalem.

⁵¹“Kamene ahon ndö ti e na ndembe so e ma zonga so azo azonga na e. Li ti e kue aba na kamene na ndembe so awande ali na da ti KOTA GBIA so ayeke nde si ayeke nzoni kue.”

⁵²“Ndani laa, ambeni lango ayeke ga so mbi yeke ga na tere ti ayanda ti Babilone; so tënë ti yanga ti KOTA GBIA laa. Na ya ti kodro ni kue, azo so awara akota ka ayeke dema.

⁵³Ataa Babilone ama na nduzu ngbii lo si na le ti nduzu, ataa lo honde tere ti lo na peko ti mbeni ngangu gbagba so zo alingbi ti si daa pepe, mbi yeke mu yanga na azo so kua ti ala ayeke ti bubango aye titene ala gue ngbii asi na tere ti lo kâ”; so tënë ti yanga ti KOTA GBIA laa.

⁵⁴Ala ma si: A ma dekongo so alondo na Babilone; wuluwulu ti mbeni ye so abuba ahon ndoni alondo na kodro ti Kalde.

⁵⁵Biani, KOTA GBIA laa ayeke buba Babilone; lo yeke sara si gba ti dekongo ni so akai. Awato adekongo ngangu, dekongo ti ala ayeke tongana toto ti *amapo ti kota ngu-ingo. Dekongo ti ala ayeke tongana toto ti bekpa.

⁵⁶Biani, zo ti bubango aye ayeke ga nduru na Babilone, lo yeke ga ti tiri bira na lo. Lo yeke gbu angangu zo ti bira ti lo, lo yeke fâ ya ti kokora ti ala. Biani, KOTA GBIA ayeke Nzapa, lo hinga ti kiri na zo peko ti ye so zo ni asara; lo hinga ti futa zo alingbi na kua so zo ni asara.

⁵⁷“Mbi yeke mu samba na akota zo ti lo nga na azo ti ndara ti lo, agovoronere ti lo, akota komanda nga na angangu turugu ti lo. Fade azo ni ayeke lango kpu na kpu, ala yeke kiri ti zingo pepe; so tënë ti yanga ti Gbia laa, lo so iri ti lo ayeke KOTA GBIA so ayeke na ndö ti dunia kue.”

⁵⁸Tënë so KOTA GBIA so ayeke na ndö ti dunia kue atene ayeke so: “Akota gbagba ti Babilone akungbi kue awe, a gbi akota yanga ti gbagba ti kodro ni awe. Amara ayeke baa pasi na kua senge senge, kua so azo asara ayeke hunzi na le ti wâ!”

⁵⁹Tongaso Wayanga-Nzapa Jérémie amu yanga na Seraya, molenge ti Neria, molenge ti Maaseya, na ndembe so Seraya na gbia Sedesias ague na Babilone, na ngu osio ni so Sedesias ayeke le-gbia. Seraya ayeke mbeni turugu ti batango gbia Sedesias, gbia ti Juda.

⁶⁰Jérémie asu na le ti mbeni *rulo tënë ti asioni ye so kue ayeke si ande na Babilone, atënë so kue a tene na ndö ti Babilone.

⁶¹Jérémie atene na Seraya: “Tongana mo si na Babilone, fade mo yeke sara ngangu kue ti diko atënë so kue na mê ti azo.

⁶²Fade mo yeke tene: ‘KOTA GBIA, mo wani laa mo tene, fade gbata so ayeke ti biani biani, zo na nyama ayeke kiri ti ngba na ya ni pepe; fade gbata ni ayeke ga ngonda kpu na kpu.’

⁶³Tongana mo hunzi ti diko rulo ni awe, fade mo yeke kanga têne daa, mo bi ni na be ti *bale ti Efrate.

⁶⁴Na pekoni, fade mo yeke tene: ‘Babilone ayeke linda ngu biani biani legeoko tongaso; lo yeke kiri ti sigigi pepe, ngbanga ti aye ti ngangu so KOTA GBIA asara si aga na ndö ti lo.’ ” “Amara awoko kue na kua.” Atënë ti Jérémie ahunzi na ndo so.