Read sango Abia ti demango tere 1 Bible Online

Abia ti demango tere 1 - sango bible

Abia ti demango tere 1

¹Azo-oo, azo! Taa gbata so ando azo asi singo daa so, ni laa angba fadeso gi lo oko so-oo! Gbata so iri ni awu ando na popo ti agbata kue so, ni laa aga fadeso tongana mbeni wali-mua so-oo! Gbata so ayeke ando na ndö ti akete-kodro kue so, ni laa fadeso kua ti ngbaa ahon ndö ti lo so-oo!

²Na bi, gi toto na toto ngbii ndo ahan. Ngu ti le ayeke sua na tere ti ngbangba ti lo. Na popo ti azo so aye lo lani mingi so, mbeni zo ti de be ti lo ayeke daa pepe. Amba ti lo kue akiri aka lo awe: ala ga awato ti lo.

³Mara ti Juda laa aga taa buba mara awe so? Ala gbu lo na ngangu, ague na lo na kodro wande; sarango kua ti ngbaa ahon ngangu ti lo awe! Lo yeke lango na popo ti amara nde. Lo wara lege ti duti na siriri oko pepe. Azo so ayeke sara ngangu na lo so, ala tumba peko ti lo, ala wara lo awe; mara ti Juda ayeke na ya ti kota pasi.

⁴Alege ti guengo na *Sion ade dengo; ala kue ayeke na mua; zo ti gue na matanga ti Nzapa ayeke daa pepe. Ayanga ti gbagba ti gbata ni abuba kue; awayango-sandaga ayeke dema gi demango. Amaseka-wali ti gbata ni angba na vundu; be ti azo ti gbata ni afâ si ala duti na ya ti kota mawa.

⁵Awato ti Sion ahon ndö ti lo na bira awe; azo ti kengo gbata ti Sion aduti nzoni. Ndali ti gba ti asioni so azo ti Sion asara, *KOTA GBIA azia ala na ya ti mawa. Nilaa, awato ti lo agbu amolenge ti kodro ni si ague na ala na kodro wande.

⁶Gbata ti Sion, pendere kodro so! Aye so ayeke sara gonda ti lo so, aye ni ahon kue awe, azo! Agbenyogbia ti gbata ni aga tongana atagba, atagba so awara pere ti te pepe. Ala mu loro na le ti awato ti ala, me ngangu ahunzi na ala kue na le ti awato ti ala ni.

⁷Gbata ti Jérusalem aga buba awe, gbata ni aga tongana mbeni zo so ayeke hon kirikiri, ngbonda ti lo agbu sese pepe. Na ya ti alango ni so, lo dabe ti lo na amosoro ti lo so lo yeke na ni ando. Fadeso azo ti gbata ti Jérusalem kue ati na ya ti maboko ti awato awe, zo ti ga ti mu maboko na ala ayeke daa pepe. Awato abaa gbata ti Jérusalem ni, ala yeke he ni hengo, ngbanga ti so gbata ni akiri angba gbata pepe.

⁸Azo ti Jérusalem asara siokpari ahon ndoni. Nilaa, gbata ni aga tongana mbeni sarate ye; azo so kue ayeke gonda gbata ni ando so, fadeso ala yeke baa ni tongana mbeni buba ye, ngbanga ti so ala baa tere ti lo so ayeke senge. Lo wani, lo dema, lo kiri na peko, lo hon.

⁹Sioni ti lo avuko yanga ti bongo ti lo. Ye ni so asi fade na lo so, lo gbu li ti lo na ndö ni kozoni pepe. Gbata ti Jérusalem ati ngangu; mbeni zo ti de be ti lo ayeke daa pepe. Lo tene: “KOTA GBIA, baa mbi ga buba ahon ndoni! Mo baa, wato ayeke hon ndö ti mbi.”

¹⁰Awato anzi anzoni ye ti Jérusalem kue awe. Azo ti mara nde ali na ya ti kota da ti Nzapa; me azo ti gbata ti Jérusalem abaa ala bango. Andaa KOTA GBIA, mo mu yanga ando, mo tene: “Fade amara nde ayeke li na ya ti bongbi ti azo ti mbi pepe.”

¹¹Azo ti Jérusalem kue ayeke dema; ala yeke gi kobe ti tengo ni; ala ka anzoni ye ti ala ti gi na kobe; ala sara tongaso ti wara na ngangu. “Ae! KOTA GBIA, mo wani, mo baa: azo abaa mbi tongana mbeni mbumbuse ye.”

¹²Ala ga abaa, ala azo so kue ayeke hon na lege so, ayeke nzoni amara ti ye tongaso asi na ala pepe! Pasi ti mbi alingbi na pasi ti mbeni zo-oo? Pasi so KOTA GBIA azia mbi na ya ni so ayeke ngangu mingi; KOTA GBIA azia pasi ni na tere ti mbi na lango so ngonzo ti lo alondo tongana wâ.

¹³Kâ na nduzu, KOTA GBIA atokua mbeni wâ; wâ ni ali na ya ti abio ti mbi. KOTA GBIA aleke mbeni gbanda ti gbu na gere ti mbi; gbanda ni agbu mbi, agboto mbi na peko. Mbi ga tongana wali so ye ahunzi na lo awe; lakue, tere ti mbi ayeke so gi songo.

¹⁴Le ti KOTA GBIA abaa asioni so mbi sara; lo kanga asioni ti mbi na ndö ti mbi tongana *zuge so lo zia na ndö ti mbi; asioni ti mbi ni akono agbu mbi na go. Kota Gbia awoko ngangu ti mbi kue awe. Lo zia mbi na maboko ti awato ti mbi; mbi lingbi ti gbu le ni na ala pepe.

¹⁵Kota Gbia atumba ala kue awe, angangu turugu so ayeke na tere ti mbi so; Kota Gbia airi gba ti aturugu ti tiri bira, lo iri ala ti ga ti nika aturugu ti mbi, ala so ade maseka so. Ae azo! Kota Gbia ado mbi na sese awe; mbi, maseka-wali ti mara ti Juda. Lo pete mbi tongana ale ti *vinye so ayeke na ya ti du ti sarango na vin.

¹⁶Ndali ti aye ti kpale so, mbi yeke toto. Ngu ti le ti mbi ayeke yuru, ayeke yuru. Zo ti de be ti mbi, zo so ayeke kiri ngangu na mbi so, lo hon yongoro na tere ti mbi awe. Amolenge ti mbi ti koli akiri angba zo pepe, awato ahon ndö ti e na ngangu awe!

¹⁷Sion ayoro maboko ti lo na demango tere; me mbeni zo ti de be ti lo ayeke daa pepe. Amara so alango nduru na azo ti Israel so, KOTA GBIA amu yanga titene ala ga awato ti Israel ni; Jérusalem aga mbeni sarate ye na popo ti ala.

¹⁸KOTA GBIA ayeke mbirimbiri; mbi laa mbi ke yanga ti lo. Ala azo ti mara kue, ala ma mbi si: ala baa nga pasi so mbi yeke na ni laa? Azo agbu amaseka-koli na amaseka-wali ti mbi, ahon na ala na kodro wande awe!

¹⁹Mbi iri azo so aye mbi lani so, andaa ala ke mbi awe. Awayango-sandaga na *akangba ti mbi akui kue; ala kui kue na ya ti gbata ti Jérusalem, na ndembe so ala yeke gi kobe ti wara na ngangu.

²⁰KOTA GBIA, mo baa, pasi ti mbi ahon ndoni; akamba ti ya ti mbi kue ayeke do dongo; be ti mbi kue ayeke yingi yingingo, ngbanga ti so mbi sara ngangu li ahon ndoni. Kâ na gigi amolenge ti mbi akui; ge na ya ti da, gi kuâ na kuâ.

²¹KOTA GBIA, so mbi ngba ti dema, azo ama mbi; me mbeni zo ti de be ti mbi ayeke daa pepe. Ye ti mawa so asi na mbi azia ngia na be ti awato ti mbi. Andaa mo laa mo sara ye ni. Lango so mo tene tënë ni ando so, KOTA GBIA, mo sara si lango ni so alingbi si. Ayeke nzoni awato ti mbi aga nga tongana mbi!

²²Asioni ye so ala sara so, ayeke nzoni asi na le ti mo, mo baa! Ye so mo sara na mbi ndali ti sioni ti mbi so, ayeke nzoni mo sara nga na ala tongaso. Baa, mbi yeke dema, mbi yeke dema; aye so kue asara mbi kobela.