Read sango Abia ti demango tere 3 Bible Online

Abia ti demango tere 3 - sango bible

Abia ti demango tere 3

¹So *KOTA GBIA apika mbi na lege ti ngonzo ti lo, mbi yeke zo so mbi hinga ye so iri ni pasi.

²Lo pusu mbi na dawa ti lo, na ndo so avuko pitipiti, lo gue na mbi na ndo so lumiere ayeke daa pepe.

³Biani, ndade, ndade, ti londo na ndaperere ngbii asi na lakui, maboko ti lo ayeke na ndö ti mbi gi na pika.

⁴Lo sara si poro ti tere ti mbi abuba kue si kasa ti tere ti mbi abuba nga kue, lo fâ ya ti abio ti mbi kue.

⁵Lo leke ngangu gbagba angoro mbi, lo sara si be ti mbi asee sengo, lo sara si pasi ti mbi ahon ndoni.

⁶Lo zia mbi, mbi lango na ya ti vukongo ndo tongana akuâ so akui ando aninga awe.

⁷Lo kanga mbi na ya ti ngangu gbagba si mbi lingbi ti sigigi pepe, lo gbe mbi gbengo na ngbongboro zingiri.

⁸Mbi dekongo na lo ti mu maboko na mbi gbaa, mbi iri lo ti mu maboko na mbi gbaa, lo kanga lege si sambela ti mbi asi na lo pepe.

⁹Lo kanga alege ti mbi na akota têne so a de tere ni dengo, lege ti mbi so mbi yeke hon daa, lo buba ni kue.

¹⁰Lo ga tongana *urse so ahonde tere ti lo ti ku ti gbu mbi, lo ga tongana bamara so ahonde tere ti lo ti ku ti gbu mbi.

¹¹Lo kanga lege na mbi na ya ti aye kue, lo nika mbi nikango; lo sara si mbi ga tongana zo so mbeni ye ti lo oko ayeke daa pepe.

¹²Lo gboto ya ti kokora ti lo, lo yoro le ti kokora ni na tere ti mbi.

¹³Lo tokua ale ti kokora ti ya ti bozo ti lo kue si ali ya ti tere ti mbi.

¹⁴Azo ti kodro ti mbi kue ayeke he mbi; lakue azo ayeke he bia gi na iri ti mbi.

¹⁵Lo mu na mbi asengo pere si mbi te ahon ndö ti mbi; lo mu na mbi ye so asee sioni si mbi nyon ahon ndö ti mbi.

¹⁶Lo sara si mbi kungbi apembe ti mbi na tengo akerenze, lo yoro mbi na ya ti mburu ti wâ.

¹⁷Lo sara si siriri akpe mbi biani; mbi girisa anzerengo ye ti dunia kue awe.

¹⁸Mbi tene na be ti mbi, mbi tene: “Ae azo, gigi ti mbi abuba awe. KOTA GBIA, nyen laa mbi yeke ku na mbage ti mo, nyen?”

¹⁹Dabe ti mo na pasi ti mbi nga na mawa so mbi yeke na ya ni; ye ni aga sengo ye na sioni yoro ti fango zo.

²⁰Be ti mbi angba na ndö ni lakue, ye ni ahon ngangu ti mbi kue awe.

²¹Me ye so mbi lingbi ti zia na ya ti li ti mbi ayeke so, ye so mbi zia be ti mbi ti ku ni ayeke so:

²²Anzoni be ti KOTA GBIA angba lakue, ndoye ti lo ayeke hunzi laoko pepe.

²³Lakue na ndaperere, nzoni be ti lo akiri aga tongana fini ye. KOTA GBIA, mo yeke sara ye alingbi na tënë ti yanga ti mo lakue!

²⁴Mbi tene na be ti mbi, mbi tene: “Ti mbi, mosoro ni ayeke gi KOTA GBIA”, nilaa mbi zia be ti mbi ti ku lo.

²⁵KOTA GBIA ayeke sara nzoni na zo so azia be ti lo na ndö ti lo, KOTA GBIA ayeke sara nzoni na zo so agi lo.

²⁶Ayeke nzoni zo akai kpoo, lo ku titene KOTA GBIA azi lo na ya ti ye ti ngangu.

²⁷Ayeke nzoni zo ayeda ti sara ye so a hunda na lo na ngangu ti sara na ngoi so lo de maseka.

²⁸Tongana KOTA GBIA azia lo na ya ti ye ti ngangu, ayeke nzoni lo duti nde gi lo oko, lo tene tënë pepe.

²⁹Ayeke nzoni lo yoro yanga ti lo na ya ti fuku sese. E hinga pepe, fade lo lingbi ti wara nzoni ye so lo yeke ku.

³⁰Ayeke nzoni lo yoro ngbangba ti lo na zo so aye ti pika ni, lo yeda na gba ti zonga ti azo.

³¹Biani, KOTA GBIA ayeke ke zo biani biani pepe.

³²Tongana lo zia vundu na be ti zo, fade lo yeke baa mawa ti zo ni, ngbanga ti so ndoye ti lo ayeke kota.

³³Ti zia zo na ya ti pasi wala ti zia vundu na be ti zo, so laa anzere na be ti lo pepe.

³⁴So azo amu azo ti kanga kue ti kodro si asara na ala taa kua ti mbana so,

³⁵so azo ayeke buba zo na ndö ti ye ti lo na le ti Nzapa so ayeke na yayu kâ na ndö ti aye kue so,

³⁶so na le ti ngbanga, azo afâ ngbanga ti mbeni zo nzoni pepe so, KOTA GBIA ayeke baa ye so pepe?

³⁷Zo wa laa atene gi tënë si mbeni ye abaa gigi, zo wa? KOTA GBIA laa ayeke mu yanga pepe?

³⁸Na lege ti tënë ti yanga ti Nzapa so ayeke na yayu kâ na ndö ti aye kue si sioni ye na nzoni ye aga pepe?

³⁹Tongana zo ade na fini le ti lo, ndani nyen ti toto tere ti lo so? Ayeke nzoni lo toto tere ti lo ndali ti asiokpari ti lo wani.

⁴⁰E baa lege ti sarango ye ti e mbirimbiri, e gi ti hinga nda ni nzoni, na pekoni e kiri na mbage ti KOTA GBIA.

⁴¹E sambela na be ti e kue, e yoro maboko ti e na nduzu na Nzapa so ayeke na yayu kâ.

⁴²E yeke azo so ake lege ti mo, e yeke azo ti sarango ngangu li, nilaa mo zi tënë ni na li ti e pepe.

⁴³Mo bata ngonzo ni na be ti mo, mo tumba peko ti e, mo fâ e kue, mo sara mawa ti zo oko pepe.

⁴⁴Mo honde tere ti mo na ya ti mbinda si sambela ti e alingbi ti si na mo pepe.

⁴⁵Na popo ti amara nde, mo sara si e ga tongana zende, ye so zo aye ti baa na le ti lo pepe.

⁴⁶Awato ti e kue azi yanga ti ala ti gi e na tënë.

⁴⁷Ti e, kota mbeto laa ayeke fâ e, kota du ti kuâ laa ayeke ku e. E kiri e ngba zo pepe, e yeke ti e ye mbeni pepe.

⁴⁸Ngu ti le ti mbi ayeke yuru gbani gbani ndali ti kpale so asi na azo ti mbi.

⁴⁹Ngu ti le ni angba ti yuru lakue, lege ti kai ni ayeke daa pepe.

⁵⁰Mbi kai toto ni pepe, ngbii asi na ndembe so KOTA GBIA so ayeke na yayu abi le ti lo na ndö ti mbi.

⁵¹Akpale so ayeke si na amaseka-wali kue ti gbata ti mbi, tongana mbi baa ni, be ti mbi aye ti fâ.

⁵²Awato ti mbi so ake mbi senge senge so, ala yeke tumba mbi tongana ti so zo ayeke tumba peko ti ndeke.

⁵³Ala mu mbi na fini le ti mbi, ala bi mbi na ya ti kota du; ala mu têne, abi na ndö ti mbi.

⁵⁴Ngu asuku si amene mbi kue, mbi tene: “Azo, mbi kui awe!”

⁵⁵So mbi yeke na ngbonda ti du ni kâ, KOTA GBIA, mbi dekongo na mo

⁵⁶si mo ma go ti mbi: “Mbi yeke dema, mbi yeke dekongo na mo ti mu na mbi maboko, mo kanga mê ti mo ti ma mbi pepe!”

⁵⁷Na lango so mbi dekongo na mo, mo ga nduru na mbi si mo tene: “Sara mbeto pepe!”

⁵⁸KOTA GBIA, mo gbu koko ti mbi awe; mo soo fini ti mbi awe.

⁵⁹Kua ti mbana so azo asara na mbi, KOTA GBIA, mo baa ni na le ti mo awe. Mo fâ ngbanga ti mbi na legeni si!

⁶⁰Ala kiri peko ti sioni na mbi, asioni so ala leke ti sara na mbi so, mo baa ni kue na le ti mo.

⁶¹Mo ma azonga so ala zonga na mbi awe, mo hinga asioni so ala leke ndali ti mbi awe.

⁶²Ala so aye ti sara sioni na mbi, yanga ti ala ayeke gi na ndö ti mbi. Ti londo na ndaperere ngbii asi na lakui, ala yeke kasa mbi na gbe ti go ti ala.

⁶³Mo baa ala: ataa ala duti dutingo, ataa ala luti lutingo, ala yeke he bia gi na iri ti mbi.

⁶⁴Aye so ala yeke sara na mbi so, KOTA GBIA, mo kiri peko ni na ala!

⁶⁵Sara si ala kiri ahinga ndo pepe! Ayeke nzoni deba ti mo aga na ndö ti ala.

⁶⁶Na lege ti ngonzo ti mo ti wâ, KOTA GBIA, mo tumba peko ti ala, mo fâ ala kue, mo zi ala biani na ndö ti sese so!