Read sango Ezekiel 1 Bible Online

Ezekiel 1 - sango bible

Ezekiel 1

¹Na lango oku ti nze osio ti ngu baleota ni, mbi yeke na tere ti *bale ti Kebar na popo ti azuife so a gbu ala si a gue na ala na kodro wande. Yayu azi si na ya ti ambeni ye tongana bango-li, Nzapa afa na mbi ambeni ye.

²Ye ni asi na ngu oku ni so a mu gbia Yoakin na ngangu a gue na lo na kodro wande.

³Na kodro ti azo ti Babilone, na tere ti bale ti Kebar, tënë ti KOTA GBIA asi na mbi Ezekiel, molenge ti wayango-sandaga Buzi. Kâ, maboko ti KOTA GBIA agbu mbi.

⁴Ye so mbi baa ayeke so: mbeni ngangu pupu alondo na mbage ti Banga si ayeke ga. Pupu ni ayeke ga na mbeni ngbongboro mbinda; mbeni ngangu lumiere ti vukongo le ti zo angoro mbinda ni si awâ ti bekpa ayeke kpe na ya ni nzerrr nzerrr. Taa na be ti mbinda ni, ale ti wâ ayeke za daa lawu lawu si mbeni ye ayeke za daa tongana lôro so a yoro ni na ya ti wâ.

⁵Mbi baa ambeni ye osio so ayeke na fini; aye ni akpa zo.

⁶Ye ni oko oko ayeke na ndö ti le osio nga na *kpangi osio.

⁷Angbongo ti ala aluti mbirimbiri, agere ti ala akpa sokoto ti bagara si ayeke za zango tongana bengba wen so a kpaka ni.

⁸Na gbe ti akpangi ti ala oko oko, maboko ti zo ayeke daa. Amaboko ti aye osio so kue ayeke na fini, akpangi ti ala na ndö ti le ti ala kue ayeke baa ndo na mbage osio ti sese.

⁹Ayanga ti akpangi ti ala kue andu tere. Tongana ala yeke tambula, ala yeke turne tere ti ala pepe; me ye oko oko ayeke tambula mbirimbiri na dawa ti lo wani.

¹⁰Ala osio kue ayeke na ndö ti le osio: ndö ti le ti ala ti mbage ti dawa akpa ti zo; ti mbage ti maboko ti koli akpa ti bamara; ti mbage ti maboko ti wali akpa ti koli-bagara, tanga ti ndö ti le ni akpa ti *ngoalo.

¹¹So ayeke ndö ti le ti ala laa. Ti akpangi ti ala, use azi ya ti tere na mbage ti nduzu si ayanga ni andu tere. Tanga ti akpangi use ni akanga tere ti ala.

¹²Ye oko oko ayeke tambula mbirimbiri na dawa ti lo wani; ala yeke gue na mbage so ala ye ti gue daa, me ala turne tere ti ala pepe.

¹³Aye ni akpa awâ ti *tanda. Na popo ti aye so ayeke na fini so, ambeni ye ayeke tongana ale ti wâ so ahon kâ, ahon ge, ahon kâ, ahon ge. Wâ ni aza ngangu mingi ti vuko le ti zo, wâ ti bekpa ayeke sigigi na ya ni.

¹⁴Aye so ayeke na fini so ague na loro asi na li ni, akiri na peko tongana wâ ti bekpa.

¹⁵Le ti mbi angba na ndö ti aye so ayeke na fini so: mbi baa ruu oko ayeke na tere ti ala oko oko si andu sese.

¹⁶Aruu ni osio kue akpa tere si tere ti ala ayeke za tongana têne ti krizolite. Na bango aruu ni, mo baa mo tene, ala li na ya ti amba ti ala si ala gbu tere.

¹⁷Tongana aruu ni ayeke tambula ti gue na mbage osio ti sese, ala yeke turne tere ti ala pepe.

¹⁸Ya ti aruu ni akono ngangu mingi si ayeke zia mbeto na be ti zo. Ambeni kete kete wâ amu tere ni kue si ayeke za ngrengre.

¹⁹Tongana aye so ayeke na fini ayeke tambula, aruu ni ayeke tambula na tere ti ala. Tongana aye ni alondo na ndö ti sese ti gue na le ti nduzu, aruu ni alondo nga ti gue na le ti nduzu.

²⁰Aye so ayeke na fini so amu lege ti gue na ndo so yingo aye titene ala gue daa; aruu ni ayeke londo legeoko na ala, ngbanga ti so yingo ti aye so ayeke na fini laa ayeke na ya ti aruu ni.

²¹Nilaa, tongana aye ni ayeke gue na li ni, aruu ni ayeke gue nga; tongana aye ni aluti, aruu ni aluti nga; tongana ala londo na ndö ti sese ti gue na le ti nduzu, aruu ni ayeke londo na ala legeoko, ngbanga ti so yingo ti aye so ayeke na fini laa ayeke na ya ti aruu ni.

²²Mbeni ye so akpa le ti nduzu ayeke na ndö ti li ti aye so ayeke na fini, ye ni akono si ayeke za ngangu tongana têne ti kristal.

²³Na gbe ti ye so akpa le ti nduzu so, aye so ayeke na fini oko oko agbara ya ti akpangi use ti ala, yanga ti akpangi ni atengbi tere na ti amba ti ala oko oko. Tanga ti akpangi use ti aye ni akanga tere ti ala.

²⁴Tongana aye ni ayeke tambula, mbi yeke ma toto ti akpangi ti ala. Toto ni ayeke tongana toto ti kota ngu-ingo; akpa go ti KOTA GBIA so ngangu ti lo ahon angangu kue; akpa wuluwulu ti gba ti aturugu. Tongana aye so ayeke na fini aluti, ala yeke kiri na akpangi ti ala na tere ti ala.

²⁵Na ndö ti ye so ayeke na ndö ti li ti ala si akpa le ti nduzu so, mbeni go alondo kâ si ayeke ga.

²⁶Na ndö ti ye ni so kâ, mbi kiri mbi baa mbeni ye so ayeke tongana têne ti safir; ye ni akpa mbata ti gbia. Na ndö ti mbata ni, taa na mbage ti li ni, mbeni ye ayeke daa so akpa zo.

²⁷Tere ti lo so akpa zo so ayeke za ngrengre tongana wen so akpaka tere ni kue si ayeke za zango. Mbeni ye angoro lo kue si akpa wâ, avuru ndo na tere ti lo kue, ti londo na mbage ti ya ti lo ti si na nduzu nga na gbeni.

²⁸Lumiere so angoro lo akpa *kongö so ayeke za na ya ti mbinda na lango so ngu-Nzapa aye ti pika; andaa ye ni akpa gonda ti KOTA GBIA. Na bango ni, mbi ti, mbi kpo li ti mbi na sese. Na pekoni, mbi ma mbeni go so ayeke tene tënë na mbi.