Read sango Ezekiel 14 Bible Online

Ezekiel 14 - sango bible

Ezekiel 14

¹Mbeni lâ, ambeni *kangba ti azo ti Israel aga ti baa mbi si ala duti na dawa ti mbi.

²Tongaso, tënë ti *KOTA GBIA asi na mbi, atene:

³“*Molenge ti zo, azo so aleke ndo na be ti ala ndali ti ayanda ti ala; le ti ala angba gi na ndö ti ye so ayeke sara si ala ti na ya ti siokpari. Fade mbi yeke zia lege na ala titene ala hunda mbi na mbeni tënë?

⁴Mo tene na ala, mo tene: Tënë so mbi Kota Gbia NZAPA, mbi tene ayeke so: Tongana mbeni zo ti Israel aleke ndo na be ti lo ndali ti ayanda ti lo si le ti lo angba gi na ndö ti ye so ayeke sara si lo ti si lo sara sioni, zo tongaso, tongana lo ga ti baa wayanga-Nzapa na tënë ti lo, mbi KOTA GBIA wani laa, mbi yeke kiri tënë na lo. Tongana zo ni aga, mbi yeke kiri tënë na lo alingbi na wungo ti ayanda ti lo ni.

⁵Tongaso, fade tënë ti mbi ayeke ndu be ti azo ti Israel, ala so kue ague yongoro na mbi ndali ti ayanda ti ala so.

⁶Ndani laa, alingbi mo tene na azo ti Israel, mo tene: ‘Tënë so Kota Gbia NZAPA atene ayeke so: ala zia ngbene lege ti sarango ye ti ala, ala zia lege ti ayanda ti ala, ala zia peko ti ala na asioni sarango ye ti ala so zo alingbi ti baa na le ti lo fani use pepe so!’

⁷“Tongana mbeni zo ti Israel wala mbeni wande so asara kodro na Israel ague yongoro na mbi, tongana lo leke ndo na be ti lo ndali ti ayanda ti lo, tongana le ti lo angba gi na ndö ti ye so ayeke sara si lo ti si lo sara sioni, zo tongaso, tongana lo ga ti baa wayanga-Nzapa na tënë ti lo, taa mbi wani, KOTA GBIA laa, mbi yeke kiri tënë na lo.

⁸Mbi yeke be le na zo ni, mbi yeke sara si lo ga tapande nga na tënë ti mato. Mbi yeke zi lo na popo ti azo ti mbi. Tongaso, fade ala yeke hinga atene, mbi laa mbi yeke KOTA GBIA.

⁹“Tongana mbeni wayanga-Nzapa azia lege si azo ahanda lo si lo kiri tënë lo wani, mbi KOTA GBIA laa, mbi handa wayanga-Nzapa so. Mbi yeke yoro maboko ti mbi ti pika lo si mbi yeke zi lo na popo ti azo ti Israel, azo ti mbi.

¹⁰Wayanga-Nzapa so na zo so aga ti hunda lo na tënë, ala use kue ayeke yo ngbanga ti oko sioni so.

¹¹Tongaso si azo ti Israel ayeke kiri ti gue yongoro na mbi pepe; ala yeke kiri ti ga *sioni ndali ti asioni ye ti ala pepe. Fade ala yeke duti azo ti mbi si mbi yeke duti Nzapa ti ala.” So tënë ti yanga ti Kota Gbia NZAPA laa.

¹²Tënë ti *KOTA GBIA asi na mbi, atene:

¹³“*Molenge ti zo, tongana azo ti mbeni kodro asara siokpari so ake mbi si ala sara ye so ayeke sioni mingi, fade mbi yeke yoro maboko ti mbi ti pika ala, mbi yeke buba akobe ti ala so ala bata, mbi yeke tokua kota nzara na tere ti ala, mbi yeke fâ azo na anyama kue ti kodro ni ti hunzi ala.

¹⁴Ataa akoli ota so, Noe, Daniel na Job ayeke fade na popo ti azo ti kodro ni, mbirimbiri ti ala ayeke soo gi fini ti ala wani. So tënë ti yanga ti Kota Gbia NZAPA laa.

¹⁵“Tongana mbi tokua asioni nyama na tere ti azo ti kodro ni, ala yeke fâ azo ni kue si kodro ni ayeke ga benyama. Zo ayeke kiri ti fâ ya ti kodro ni pepe ndali ti asioni nyama ni.

¹⁶Ataa akoli ota so ayeke fade na ya ti kodro ni, fini ti mbi, ala lingbi ti soo amolenge ti ala wani pepe. Gi ala oko laa ayeke soo kuâ, tongaso kodro ni ayeke ga benyama. So tënë ti yanga ti Kota Gbia NZAPA laa.

¹⁷“Wala tongana mbi sara si bira aga na ya ti kodro ni, mbi yeke mu yanga na aturugu ti buba kodro ni nga ti fâ azo na anyama kue ti hunzi ala.

¹⁸Ataa akoli ota so ayeke fade na ya ti kodro ni, fini ti mbi, ala lingbi ti soo amolenge ti ala wani pepe. Gi ala oko laa ayeke soo kuâ. So tënë ti yanga ti Kota Gbia NZAPA laa.

¹⁹“Wala tongana mbi tokua sioni kobela ti bubango kodro na tere ti azo ni, tongana mbi tuku ngonzo ti mbi ti wâ na ndö ti ala na lege ti sioni kobela ni so ayeke fâ azo na anyama ahunzi ala,

²⁰ataa Noe, Daniel na Job ayeke fade na ya ti kodro ni, fini ti mbi, ala lingbi ti soo amolenge ti ala wani pepe. Gi ala oko laa ayeke soo fini ti ala na lege ti mbirimbiri ti ala. So tënë ti yanga ti Kota Gbia NZAPA laa.”

²¹Biani, tënë so Kota Gbia NZAPA atene ayeke so: “Mbi tokua asioni kpale ti mbi osio na ndö ti Jérusalem: bira, kota nzara, asioni nyama na sioni kobela ti bubango kodro. Mbi tokua ni ti fâ azo na anyama kue ti hunzi ala.

²²Me tanga ti azo so angba na fini, akoli na awali. A mu ala, a sigigi na ala na ya ti gbata ni; fade ala yeke gue ti wara ala, azo ti Israel, na kodro so a gbu ala a gue na ala daa. Ala yeke baa dutingo ti azo ni nga na sarango ye ti ala si fade be ti ala, azo ti Israel, ayeke de na peko ti akota kpale so kue mbi tokua na ndö ti Jérusalem.

²³Na bango dutingo ti azo ni nga na sarango ye ti ala, fade be ti ala, azo ti Israel, ayeke de. Tongaso, fade ala yeke hinga atene, aye so kue mbi sara na Jérusalem so, mbi sara ni senge pepe, nda ni ayeke daa. So tënë ti yanga ti Kota Gbia NZAPA laa.”