Read sango Ezekiel 19 Bible Online

Ezekiel 19 - sango bible

Ezekiel 19

¹KOTA GBIA atene na mbi ti he bia ti totongo kuâ so na ndö ti amakonzi ti Israel:

²“Mama ti ala ayeke lani zo wa? Lo yeke mbeni wali-bamara so alango na sese na popo ti abamara. Lo yeke mu kobe na amolenge ti lo na popo ti akete bamara.

³Lo fa lege na mbeni molenge ti lo oko. So lo ga ngangu bamara awe, lo manda ti suru ya ti nyama si lo te azo.

⁴Amara nde ama tënë ti lo; ala sara si lo ti na ya ti kuku ti ala, ala gbu lo, ala yoro *kongi na hon ti lo si ala gue na lo na Ezipte.

⁵Mama ti bamara ni aku gbaa. So lo baa so ye titene lo kiri lo zia be ti lo ti ku ayeke daa pepe, lo mu mbeni molenge ti lo nde lo sara si lo ga ngangu bamara.

⁶Lo tambula na popo ti abamara si lo ga ngangu bamara. Lo manda ti suru ya ti nyama si lo te azo.

⁷Lo kungbi ngangu gbagba ti ala, lo buba agbata ti ala kue. Na mango toto ti go ti lo, kota mbeto agbu kodro ni na aye ti ya ni kue.

⁸Amara nde so alondo na ando nde nde aga, abongbi na tere ti lo. Ala bi gbanda ti ala na ndö ti lo, ala sara si lo ti na ya ti kuku ti ala.

⁹Ala yoro kongi na hon ti lo, ala zia lo na ya ti kota sakpa ti wen si ala gue na lo na gbia ti Babilone. Ala bi lo na da ti kanga titene azo akiri ama go ti lo pepe na ndö ti ahoto ti Israel.”

¹⁰“Mama ti ala ayeke lani tongana keke ti *vinye so a lu lo na tere ti ngu. Lo yeke le gbani si akugbe ti lo ayeke gbani, ngbanga ti so lo yeke wara ngu gbani gbani.

¹¹Amaboko ti keke ni akpengba si aga keke ti komandema ti agbia. Lo yo na nduzu, lo hon li ti akeke kue. Ndali ti yongo ti lo nga ndali ti gba ti amaboko ti lo, azo kue ayeke baa lo.

¹²Me na lege ti ngonzo, a gboto keke ti vinye ni, abi na sese. Pupu ti To asara si ale ni ahole, atuku na sese. Akpengbango maboko ni ahole si wâ agbi ni kue.

¹³Fadeso a lu keke ti vinye ni na benyama, na sese so ahole kasakasa si ngu ayeke daa pepe.

¹⁴Me mbeni wâ asigigi na gere ti vinye ni, wâ ni agbi amaboko na ale ni kue. Akpengbango maboko ni so alingbi fade ti duti keke ti komandema ti gbia, ayeke daa mbeni pepe.” Bia so, a yeke he ni tongana bia ti totongo kuâ.