Read sango Ezekiel 22 Bible Online

Ezekiel 22 - sango bible

Ezekiel 22

¹Tënë ti *KOTA GBIA asi na mbi, atene:

²“Ti mo, *molenge ti zo, mo ye biani ti fâ ngbanga na li ti Jérusalem, gbata ti fango zo so? Alingbi mo fa na lo ti hinga asioni sarango ye ti lo so zo alingbi ti baa na le ti lo fani use pepe so.

³Fade mo yeke tene: Tënë so Kota Gbia NZAPA atene ayeke so: Jérusalem, azo ti mo ayeke tuku mene ti azo ahon ndoni; tongaso ala yeke leke ngoi ti tingo ti mo, ala yeke sara ayanda so asara si kodro ni aga *sioni.

⁴Tënë ayeke na li ti mo ndali ti mene ti azo so mo tuku. Mo ga *sioni ndali ti ayanda so azo ti mo aleke. Tongaso, mo sara si lango ti tingo ti mo aga nduru, mo si na nda ti ngu ti mo awe. Ndani laa, mbi sara si kamene ahon ndö ti mo na le ti amara nde, mo ga ye ti ngia ndali ti amara kue.

⁵Ndali ti gba ti sarango ye ti kirikiri ti mo na nengo ti mo so ati na sese, azo so ayeke yongoro na mo wala ala so ayeke nduru na mo, fade ala yeke he mo.

⁶“Na ndo ti mo, makonzi oko oko ti Israel ayeke luti na ndö ti komandema so lo yeke na ni ti tuku mene.

⁷Na ndo ti mo, azo ayeke ne babâ na mama ti ala pepe, ala yeke sara ngangu na awande, ala yeke sara ngangu na awali-mua nga na anyindu.

⁸Aye so a zia nde ndali ti mbi, mo baa ni tongana mbumbuse ye; mo sara si *lango ti wungo tere so a zia nde ndali ti mbi aga sioni.

⁹Na ndo ti mo, azo ayeke du mvene na li ti amba ti ala ti pusu amba ti ala ni ti tuku mene. Azo ti mo ayeke te akobe ti ayanda na li ti ahoto; ala yeke sara aye ti potopoto na popo ti ala.

¹⁰Na ndo ti mo, azo ayeke lango na mbeni wali ti babâ ti ala, ala yeke gbu awali na ngangu ti lango na ala, ataa na ndembe so awali ni ayeke baa ya ti ala.

¹¹Ala yeke sara ye ti potopoto na awali ti amba ti ala, ala yeke lango na awali ti amolenge ti ala; na ndo ti mo, ala yeke lango na a-ita ti ala ti wali, babâ oko.

¹²Na ndo ti mo, azo ayeke mu goro titene ala tuku mene. Ala sara boon ti nginza na amba ti ala si na pekoni, ala yeke hunda gba ti nginza na ndö ni; ala yeke te aye ti amba ti ala na ngangu. Ti mbi, be ti ala agirisa na mbi biani biani; so tënë ti yanga ti Kota Gbia NZAPA laa.

¹³“Azo ti Jérusalem, mbi nga, mbi yeke pika maboko ti mbi ndali ti aye ti nzi so ala wara nga ndali ti mene ti azo so ala tuku.

¹⁴Na lango so mbi yeke londo ti ga na tere ti ala, fade ala yeke kanga be ti ala? Ala yeke gbu le ni? Mbi KOTA GBIA, mbi tene tënë awe; mbi yeke sara ye ni.

¹⁵Fade mbi yeke kangbi ala na popo ti amara nde, mbi yeke tokua ala na ndo kue na ya ti akodro wande; mbi yeke sara si asarango ye ti ala ti *sioni akai.

¹⁶Ala bi buba na tere ti ala wani na le ti amara nde. Me fade ala yeke hinga atene, mbi laa mbi yeke KOTA GBIA.”

¹⁷Tënë ti KOTA GBIA asi na mbi, atene:

¹⁸“Molenge ti zo, azo ti Israel aga tongana puru ti wen na le ti mbi. Ala yeke tongana puru ti wen, ti kuivre, ti eten, wala puru ti plon so ayeke na ya ti wâ ti zo ti pikango ndao na peko ti so wen ti nginza asigigi daa.

¹⁹Ndani laa, tënë so mbi Kota Gbia NZAPA, mbi tene ayeke so: So ala kue aga tongana puru ti wen, fade mbi yeke bongbi ala taa na be ti gbata ti Jérusalem.

²⁰A yeke bongbi wen ti nginza, bengba wen, wen, plon na eten na ya ti tawa. Na pekoni, a yeke tingo wâ na gbe ni ti sara si aga ngu. Gi tongana ti so a sara na wen so, na lege ti ngonzo ti mbi, na lege ti ngonzo ti mbi ti wâ, fade mbi yeke bongbi ala ti zia ala na ya ti wâ si mbi yeke sara titene ala ga ngu.

²¹Taa na be ti Jérusalem, mbi yeke bongbi ala, mbi huru wâ ti ngonzo ti mbi na ndö ti ala si mbi yeke sara titene ala ga ngu.

²²Tongana ti so wen ayeke ga ngu na le ti wâ, fade ala yeke ga ngu taa na be ti Jérusalem. Tongaso, fade ala yeke hinga atene, mbi laa mbi yeke KOTA GBIA so mbi tuku ngonzo ti mbi ti wâ na ndö ti ala.”

²³Tënë ti KOTA GBIA asi na mbi, atene:

²⁴“Molenge ti zo, mo tene na azo ti Jérusalem, mo tene, kodro ti ala ayeke tongana sese so a zi *sioni daa pepe; na lango ti ngonzo ti mbi, sese ni awara ngu pepe.

²⁵Awayanga-Nzapa ti gbata ti ala ayeke ma tere na hondengo ni. Ala yeke tongana bamara so atoto si ayeke suru ya ti nyama so lo gbu. Awayanga-Nzapa ni ayeke fâ azo, ala yeke nzi amosoro na anzoni ye ti azo; ala sara si awali mingi aga awali-mua na ya ti gbata ni.

²⁶Awayango-sandaga ti ala asara ye alingbi na ndia ti mbi pepe; ndo so a zia nde ndali ti mbi, ala sara si aga sioni. Ye so a zia nde ndali ti mbi na ye so a zia nde pepe, ala kangbi popo ni pepe; ye so ayeke *nzoni na ye so ayeke *sioni, ala fa na azo ti hinga kangbi so ayeke na popo ni pepe. Ala baa *lango ti wungo tere tongana buba ye na le ti ala; ala sara si mbi ga mbumbuse ye na popo ti ala.

²⁷Amakonzi ti ala ayeke tongana ambo ti ngonda so ayeke suru ya ti nyama so ala gbu; ala yeke tuku mene ti azo, ala yeke fâ azo titene ala nzi aye ti ala.

²⁸Awayanga-Nzapa ti ala ayeke kanga ndö ti aye so kue tongana ti so a yeke leke potopoto na tere ti dere. Aye so ala baa na ya ti mbeni ye tongana bango-li ayeke mvene si bango nda ti aye ti ala ayeke ti handa na azo. Ala yeke tene: ‘Tënë so Kota Gbia NZAPA atene ayeke so’; andaa mbi laa mbi tene tënë ni pepe.

²⁹Na ya ti kodro ni, a yeke sara ngangu na azo, a yeke nzi ye ti azo, a yeke sara ngangu na azo ti mawa nga na awayere; a yeke sara ngangu na awande na ndö ti ye ti ala wani.

³⁰Mbi gi mbeni zo na popo ti ala titene lo leke gbagba ti bata na kodro ni, ti luti na dawa ti mbi na ndo so du akoro daa na tere ti gbagba ni; tongaso si mbi buba kodro ni pepe; me mbi wara zo oko pepe.

³¹Tongaso, mbi tuku ngonzo ti mbi na ndö ti ala; mbi hunzi ala kue na lege ti ngonzo ti mbi ti wâ; mbi sara si sioni sarango ye ti ala akiri na li ti ala. So tënë ti yanga ti Kota Gbia NZAPA laa.”