Read sango Ezekiel 24 Bible Online

Ezekiel 24 - sango bible

Ezekiel 24

¹Na lango baleoko ti nze baleoko ti ngu gumbaya ni so a gbu azo, a gue na ala na kodro wande, tënë ti *KOTA GBIA asi na mbi, atene:

²“*Molenge ti zo, su lango ti laso na mbeti. Biani, taa gi laso laso, gbia ti Babilone ayeke londo ti sara bira na Jérusalem.

³Mo tene mbeni *mato ndali ti azo ti mara ti ngangu li so; mo tene na ala, mo tene: Tënë so Kota Gbia NZAPA atene ayeke so: ‘Mo leke mbeni tawa, mo leke ni nzoni, mo tuku ngu daa asi.

⁴Mo zia na ya ni akasa, anzoni kasa: gere ni na maboko ni. Mo zia anzoni bio daa, asi.

⁵Mo mu apendere kasa ti taba, mo zia abio ni na gbe ni, na ngbonda ti tawa ni kâ; mo to ni, akporo kpoto kpoto kpoto. Ataa abio ni, alingbi akporo nzoni.

⁶Ndani laa, tënë so mbi Kota Gbia NZAPA, mbi tene ayeke so: Mawa na gbata ti fango zo! Lo yeke tongana tawa so *soko ate tere ni, tawa so soko ti tere ni alingbi ti londo pepe. Mo zi akasa ni oko na oko na ya ni; mo bi mbeni ye pepe ti hinga kasa wa laa mo yeke zi.

⁷Biani, mene so Jérusalem atuku angba taa na ya ti gbata ni. Lo tuku ni na ndö ti têne so ndö ni ayeke senge; lo tuku ni na ndö ti sese pepe, wala lo tuku fuku ti sese na ndö ni pepe.

⁸Mbi, mbi zia mene ni angba na ndö ti têne so ndö ni ayeke senge, na ndo so a lingbi ti kanga ndö ni pepe. Tongaso si ngonzo ti mbi ti wâ alondo si mbi kiri peko ti sioni na ala.

⁹Ndani laa, tënë so mbi Kota Gbia NZAPA, mbi tene ayeke so: Mawa na gbata so azo ti ya ni atuku mene so! Fade mbi yeke leke ngbongboro keke ti wâ.

¹⁰Mo bongbi akeke ti wâ, mo zia wâ daa, mo to kasa ni, mo kiri mo to ni, mo zia aye ti tere ni daa, mo sara si abio ni agbi kue.

¹¹Mo zia tawa ni, ya ni senge, na ndö ti ale ti wâ ni titene tawa ni amu wâ si bengba wen ni abe. Tongaso, fade azende so ayeke na ya ni aga ngu si soko ni agbi.’

¹²Me angangu so kue ayeke senge senge. Ataa so a zia na wâ, gba ti soko ni ahon pepe.

¹³Jérusalem, mo ga *sioni ndali ti sarango ye ti potopoto ti mo. Mbi sukula mo titene mo ga *nzoni, me mbi sara gbaa. Tongaso, kozo titene mo ga *nzoni, fade ngonzo ti mbi ti wâ ayeke londo na tere ti mo ngbii be ti mbi ade si.

¹⁴Mbi KOTA GBIA, mbi tene tënë awe. Ye so kue ayeke si; mbi yeke sara ye ni. Mbi yeke zia ni ahon senge pepe; mbi yeke baa mawa ti ye oko pepe, be ti mbi ayeke so oko pepe. A yeke fâ ngbanga na li ti mo alingbi na lege ti dutingo ti mo nga na asarango ye ti mo. So tënë ti yanga ti Kota Gbia NZAPA laa.”

¹⁵Tënë ti *KOTA GBIA asi na mbi, atene:

¹⁶“*Molenge ti zo, wali so anzere na le ti mo so, mbi yeke zi fini ti lo gi biaku tongaso. Me fade mo yeke toto kuâ ti lo pepe, mo yeke dema tere ti mo pepe, ngu ti le ti mo ayeke yuru pepe.

¹⁷Mo dema gi na be ti mo, mo sara mua pepe; me mo kanga na li ti mo bongo so a yeke kanga na li tongana kpoto, mo yu poro ti mo. Mo mu bongo, mo kanga na kua ti yanga ti mo pepe, mo te kobe so a to ndali ti totongo na kuâ pepe.”

¹⁸Mbi tene tënë ni na azo na ndaperere si na lakui, wali ti mbi akui. Na ndade ni, na ndaperere, mbi sara ye alingbi na yanga so KOTA GBIA amu na mbi.

¹⁹Azo ahunda mbi, atene: “Tene na e, ye so mo sara so, mo ye ti fa na e nyen?”

²⁰Tongaso mbi kiri tënë na ala, mbi tene: “Tënë ti KOTA GBIA asi na mbi, atene:

²¹Tene na azo ti Israel, mo tene: Tënë so Kota Gbia NZAPA atene ayeke so: Mbi yeke sara si ndo so a zia ni nde ndali ti mbi aga sioni. Andaa da ti mbi ni ayeke ye so ala yeke pika kate ti ala ndali ni, ye so apendere na le ti ala, ye so ala zia be ti ala daa ndali ti fini ti ala. Amolenge ti ala ti koli na ti wali so ala zia ala na Jérusalem, fade a yeke fâ ala na yongoro zeme.

²²Fade ala yeke sara ye gi tongana ti so mbi sara so. Ala yeke mu bongo ti kanga na kua ti yanga ti ala pepe; kobe so a to ndali ti totongo na kuâ, ala te ni pepe.

²³Fade ala yeke bata na li ti ala bongo so a yeke kanga na li tongana kpoto, ala yeke bata poro ti ala na gere ti ala. Ala yeke dema tere ti ala pepe, ala yeke toto kuâ pepe; me fade ala yeke nge ngengo na ya ti asioni ti ala si ala yeke dema na popo ti ala.

²⁴Ezekiel asara ye so ti fa na ala kozoni, ye so ayeke si ande. Fade ala yeke sara ye gi tongana ti so lo sara so. Tongana ye ni asi, fade ala yeke hinga atene, mbi laa mbi yeke Kota Gbia NZAPA.”

²⁵Na pekoni, KOTA GBIA atene na mbi: “Ti mo, molenge ti zo, mo ma! Fade mbi yeke zi na maboko ti ala ye so ayeke mu ngangu na ala, ye so ayeke zia ngia na be ti ala, ye so apendere na le ti ala, ye so ala yeke pika kate ti ala ndali ni, ye so ala baa ane na le ti ala ndali ti fini ti ala. Mbi yeke zi nga na maboko ti ala amolenge ti ala ti koli na ti wali.

²⁶Na lango ni so, zo so angba na fini ayeke ga ti tene tënë ni na mo.

²⁷Na lango ni so, tongana zo so angba na fini asi, fade yanga ti mo ayeke zi, mo yeke tene tënë, mo yeke kiri ti duti buburu pepe. Mo yeke duti zo so ayeke fa na azo ti Israel ye so ayeke si. Tongaso, fade ala yeke hinga atene, mbi laa mbi yeke KOTA GBIA.”