Read sango Ezekiel 27 Bible Online

Ezekiel 27 - sango bible

Ezekiel 27

¹Tënë ti *KOTA GBIA asi na mbi, atene:

²“Ti mo, *molenge ti zo, he mbeni bia ti totongo kuâ na ndö ti gbata ti Tir.

³Mo tene na Tir, mo tene: Mo so mo yeke na yanga ti kota ngu-ingo si mo yeke de buze na gba ti azo so alango na ya ti azoa nde nde; tënë so Kota Gbia NZAPA atene ayeke so: Tir, mo tene lani: ‘Pendere ti mbi alingbi kue.’

⁴Kodro ti mo ague ngbii asi na be ti kota ngu-ingo. Azo so aleke mo, ala sara si pendere ti mo alingbi kue.

⁵Ala sara mo, mo kpa mangboko. Ala mu keke ti sipre ti hoto ti Senir si ala sara na atere ti mo; ala mu keke ti sedre ti Liban, ala sara ni aluti na nduzu si aga yongoro keke ti mo.

⁶Ala mu akeke ti shene ti Bashan si ala sara na akâî ti mo; ala mu akeke ti sedre ti azoa ti agreke, ala zia pembe ti doli na tere ni si ala leke na ndö ti mo.

⁷Ala mu abongo ti *len ti Ezipte, ala kpo apendere nzoroko na tere ni, ala kanga na nduzu ti sara si pupu amu mo, atambula na mo na le ti ngu. Bongo ni asara si azo ahinga mo, ataa mo ngba yongoro. Bongo so nzoroko ni akpa le ti nduzu na bongo ti ngangu ngere so alondo na Shipre si aga, ala yeke kanga na ndö ti akungba.

⁸Azo ti sarango kua na akâî ti mo ayeke azo ti gbata ti Sidon na ti Arvad. Tir, mo soro azo ti ndara ti kodro ti mo si ala yeke azo ti kpengo na mangboko ni.

⁹Akangba ti gbata ti Biblos na azo ti ndara ti gbata ni, tongana mangboko ni akoro, ala laa ayeke leke ni. Amangboko so kue ayeke tambula na le ti ngu ayeke luti na ndo ti mo si azo ti ya ni ayeke vo akungba ti mo.

¹⁰Aturugu ti Perse, ti Lud na ti Put asara kua na popo ti aturugu ti mo; ala kanga *avala na akpoto ti wen na ndo ti mo, ala sara si azo ane mo.

¹¹Azo ti Arvad na aturugu ti mo ayeke sara sanziri angoro gbagba ti mo kue; azo ti Gamad ayeke bata ada ti mo so ayo na nduzu. Ala kanga avala ti ala na tere ti gbagba ti mo so angoro mo; ala sara si pendere ti mo alingbi kue.”

¹²“Mo na azo ti Tarsis ayeke de buze ti amosoro ndenge na ndenge, gbani gbani. Ala yeke vo akungba ti mo na wen ti nginza, wen, eten nga na plon.

¹³Mo na azo ti Grese, ti Tubal na ti Meshek, ayeke de nga buze. Ala yeke ga na angbaa nga na aye so a sara na bengba wen ti vo na akungba ti mo.

¹⁴Azo ti Bet-Togarma ayeke ga na ambarata, ambarata ti bira nga na *apâkârâ ti vo na akungba ti mo.

¹⁵Mo na azo ti Dedan ayeke de buze. Azo so alango na ya ti gba ti azoa ayeke ga ti vo akungba ti mo. Ala yeke futa akungba ti mo na apembe ti doli na keke ti ebene.

¹⁶Mo na azo ti Sirii ayeke de buze ti gba ti akungba ti mo. Ala yeke ga na atêne ti ngangu ngere, apendere bengba bongo, amapia-bongo so a kpo apendere nzoroko na tere ni, bongo ti *len, korayi nga na rubis ti vo na akungba ti mo.

¹⁷Mo na azo ti Juda na ti Israel ayeke de nga buze. Ala yeke ga na *ble ti gbata ti Minit, bondo, mafuta ti wotoro, mafuta nga na yombo so afun nzoni mingi ti vo na akungba ti mo.

¹⁸Mo na azo ti Damas ayeke de buze ti akungba ti mo so mo sara ni ndenge na ndenge, gbani gbani. Ala yeke ga na vin ti Helbon nga na kua ti tere ti taba ti Sahar ti vo na akungba ti mo.

¹⁹Ti londo na gbata ti Uzal, azo ti mara ti Dan na ti Yavan ayeke ga na wen so a pika tere ni pikango, kanele nga na sosongo so a yeke sara na yombo ti vo na akungba ti mo.

²⁰Mo na azo ti Dedan ayeke de buze ti abongo so a yeke bi na ndö ti mbata ti ndö ti ambarata.

²¹Mo na azo ti Arabii na amakonzi kue ti sese ti Kedar ayeke de nga buze. Ala yeke ga na akete taba, ataba nga na angasa ti vo na akungba ti mo.

²²Mo na azo ti dengo buze ti Saba na ti Ragma nga ayeke de buze. Ala yeke ga na apendere yombo, atêne ti ngangu ngere ndenge na ndenge nga na lôro ti vo na akungba ti mo.

²³Mo na agbata ti Haran, ti Kane na ti Eden ayeke de buze; mo na azo ti dengo buze ti Saba na agbata ti Asur na ti Kilmad ayeke de nga buze.

²⁴Ala yeke ga na aye tongaso ti vo na akungba ti mo: abongo ti ngangu ngere, apendere bengba bongo, abongo so a kpo apendere nzoroko na tere ni, abongo so anzoroko ni ayeke nde nde nga na angangu kamba so a sara na pete.

²⁵Akota mangboko ti Tarsis ayeke yo akungba ti mo.” “Mo Tir, akungba asi singo na ya ti mo, mo yo akungba ni ahon ndö ti mo tongana mangboko so ayeke taa na le ti kota ngu-ingo.

²⁶Azo ti sarango kua na kâî ti mo ague na mo na ndo so ngu ali daa mingi, pupu ti To akungbi ya ti mo taa na be ti kota ngu-ingo.

²⁷Amosoro ti mo, akungba ti mo, akungba ti mo ti ngere, azo ti mo so ayeke tambula na mangboko na le ti ngu, azo ti mo so ayeke sara kua na ya ti mangboko, azo so ayeke leke mangboko ti mo tongana akoro, azo ti dengo buze ti mo, aturugu so kue ayeke sara kua na mo, gba ti azo so abongbi na ndo ti mo, aye so kue alinda taa na gbe ti kota ngu-ingo, na lango ti tingo ti mo.

²⁸Azo so ayeke lango na yanga ti ngu ayeke do na mbeto na mango dekongo ti azo ti mo so ayeke sara kua na ya ti mangboko ni.

²⁹Tongaso, azo so kue agbu kâî ayeke zia amangboko ti ala; azo so ayeke tambula na mangboko na le ti ngu, azo so kue ayeke sara kua na ya ti mangboko, ala yeke zu na sese.

³⁰Ala yeke dema tere na ndö ti mo, ala yeke dekongo na mawa. Ala yeke tuku fuku ti sese na ya ti li ti ala si ala yeke rule na ya ti mburu ti wâ.

³¹Ndali ti mo, azo ni ayeke kio kua ti li ti ala si ala yeke yu bongo ti mua. Ala yeke toto na ndö ti mo na vundu na be ti ala; ala yeke dema tere na mawa.

³²Na ya ti vundu ti be ti ala, ala yeke he bia ti totongo kuâ na ndö ti mo, na ya ti bia ni, ala yeke dema tere ti ala, atene: ‘Gbata wa laa alingbi lani na Tir? Fadeso a buba ni biani biani na be ti kota ngu-ingo!’

³³Akungba ti mo so mo ka so, tongana a sigigi na ni na ya ti mangboko ni, gba ti amara ayeke wara ye alingbi na ala. Na lege ti gba ti mosoro ti mo, na gba ti kungba ti mo, mo sara si agbia ti sese awara mosoro mingi.

³⁴Fadeso kota ngu-ingo asara si mo buba awe, mo hon na gbe ti ngu so alinda; akungba ti mo na azo so kue abongbi na ndo ti mo, alinda na gbe ti kota ngu-ingo.

³⁵Azo so kue ayeke lango na ya ti azoa, li ti ala kue ayeke kpe ndali ti mo. Agbia ti ala ayeke do na mbeto, le ti ala gi na vundu.

³⁶Azo ti dengo buze na popo ti awande ayeke huru yanga ti ala ndali ti mo; mo ga ye ti ziango kota mbeto na be ti zo. Ti mo ahunzi biani biani awe.”