Read sango Ezekiel 33 Bible Online

Ezekiel 33 - sango bible

Ezekiel 33

¹Tënë ti *KOTA GBIA asi na mbi, atene:

²“*Molenge ti zo, tene na azo ti mara ti mo, mo tene: Tongana mbi ga na bira na ndö ti mbeni kodro, azo ti kodro ni ayeke soro na popo ti ala mbeni zo ti zia lo sanziri.

³Tongana sanziri ni abaa bira ayeke ga na ndö ti kodro ni, lo huru tatalita ti tene tënë ni na azo ti kodro ni.

⁴Tongana mbeni zo ama toto ti tatalita ni, me lo baa tënë ni tongana senge ye si awato aga afâ lo, mene ti lo ayeke na li ti lo wani.

⁵Lo ma toto ti tatalita ni, me lo baa tënë ni tongana senge ye. Tongaso mene ti lo ayeke na li ti lo wani. Me zo so abaa tënë ni tongana senge ye pepe, fade lo yeke soo fini ti lo.

⁶Me tongana sanziri ni abaa bira ayeke ga si lo huru tatalita pepe, lo tene tënë ni na azo ti kodro pepe, tongana wato aga si afâ mbeni zo, sanziri ni laa asara sioni. Fade mbi yeke hunda mene ti zo ni na maboko ti sanziri ni.

⁷“Molenge ti zo, mo laa mbi zia mo sanziri ndali ti azo ti Israel. Fade mo yeke ma tënë ti yanga ti mbi si mo yeke gboto mê ti ala na mbi.

⁸Tongana mbi tene na zo ti sioni, mbi tene: ‘Mo zo ti sioni, fade mo yeke kui biani!’ Tongana mo gboto mê ti lo titene lo zia lege ti sarango ye ti lo pepe si zo ti sioni ni akui ndali ti siokpari ti lo, mo laa mbi yeke hunda mene ti lo na maboko ti mo.

⁹Me tongana mo gboto mê ti zo ti sioni titene lo zia lege ti sarango ye ti lo, me lo zia ni pepe, fade lo yeke kui ndali ti siokpari ti lo; ti mo, mo yeke soo fini ti mo.”

¹⁰“Ti mo, *molenge ti zo, tene na azo ti Israel, mo tene: Tënë so ala tene ayeke so: ‘Ngangu li ti e na siokpari ti e ane na ndö ti e; ndali ni, e yeke kui kuingo. E lingbi ti duti na fini tongana nyen?’

¹¹Tene na ala, mo tene: Fini ti mbi! So tënë ti yanga ti Kota Gbia NZAPA laa. Mbi yeke wara ngia ndali ti kuâ ti zo ti sioni? Ye so anzere na be ti mbi ayeke titene zo ti sioni azia sioni lege ti sarango ye ti lo si lo duti na fini. Ala azo ti Israel, ala zia sioni lege ti sarango ye ti ala, ala zia ni! Ala ye ti kui ngbanga ti nyen?

¹²“Ti mo, molenge ti zo, kiri mo tene na azo ti mara ti mo, mo tene: ‘Tongana zo ti mbirimbiri ato nda ti sara sioni ye, mbirimbiri so lo sara kozo so alingbi ti soo lo pepe. Tongana zo ti sioni azia lege ti sioni sarango ye ti lo, sioni so lo sara kozo so, lo yeke kui ndali ni pepe. Me zo ti mbirimbiri alingbi ti duti na fini pepe ndali ti sarango ye ti mbirimbiri ti lo, na lango so lo sara siokpari.

¹³Tongana mbi tene na zo ti mbirimbiri, mbi tene: Fade mo yeke duti na fini biani! Me tongana lo baa ti lo, lo tene, sarango ye ti mbirimbiri so lo sara so alingbi awe si lo to nda ti sara sioni ye, a yeke kiri ti dabe na nzoni sarango ye ti lo ti kozo so pepe. Fade lo yeke kui ndali ti sioni so lo sara.

¹⁴Tongana mbi tene na zo ti sioni, mbi tene: Fade mo yeke kui biani! Me tongana lo zia siokpari si lo sara ye so ayeke na legeni nga na ye so ayeke mbirimbiri,

¹⁵tongana lo kiri na ye so azo amu na lo titene lo bata ndali ti yongo ti lo so ayeke na li ti ala, tongana lo kiri na ye so lo nzi, tongana lo sara ye alingbi na ndia so ayeke mu fini na zo si lo kiri ti sara sioni ye pepe, fade lo yeke duti na fini biani, lo yeke kui pepe.

¹⁶Asioni so kue lo sara, a yeke kiri ti dabe na ni pepe; fade lo yeke duti na fini, ngbanga ti so lo sara ye na legeni nga na ye so ayeke mbirimbiri.’

¹⁷“Azo ti mara ti mo, atene: ‘Sarango ye ti KOTA GBIA ayeke na legeni pepe.’ Me ala laa sarango ye ti ala ayeke na legeni pepe!

¹⁸Tongana zo ti mbirimbiri azia lege ti mbirimbiri ti lo si lo sara sioni ye, fade lo yeke kui ndali ni.

¹⁹Tongana zo ti sioni azia lege ti sioni sarango ye ti lo si lo sara ye na legeni nga na ye so ayeke mbirimbiri, lo yeke duti na fini ndali ni.

²⁰“Ala azo ti Israel, ala tene: ‘Sarango ye ti KOTA GBIA ayeke na legeni pepe!’ Ayeke nzoni ala hinga atene, mbi yeke fâ ngbanga na li ti ala, alingbi na sarango ye ti zo oko oko.”

²¹Na lango oku ti nze baleoko ni, na ngu baleoko na use ni, na peko ti so a gbu e, a gue na e na kodro wande, mbeni zo so angba na fini na peko ti so a mu gbata ti Jérusalem, aga si atene na mbi: “Gbata ni ati awe!”

²²Na lakui, kozoni si zo so asi, maboko ti KOTA GBIA ayeke na ndö ti mbi. Na ndade ni, na ndaperere, tongana zo ni asi, andaa Nzapa azi yanga ti mbi awe, mbi yeke buburu mbeni pepe.

²³Tongaso tënë ti KOTA GBIA asi na mbi, atene:

²⁴“*Molenge ti zo, azo so angba na Israel si ayeke lango na ya ti gbata so abuba awe so, atene: ‘Abraham ayeke ando gi lo oko si lo mu sese so ti ga ye ti lo. Me ti e, e yeke gbani, e lingbi fadeso ti mu sese so ti ga ye ti e senge.’

²⁵Tongaso, mo tene na ala: Tënë so Kota Gbia NZAPA atene ayeke so: Ala yeke te kasa so mene angba na ya ni, ala yeke yo le ti ala na mbage ti ayanda ti ala, ala yeke fâ azo. Ala ye ti mu sese so ti ga ye ti ala tongana nyen?

²⁶Ala yeke zia be ti ala na ndö ti aye ti bira ti ala, ala yeke sara sioni ye so zo alingbi ti baa na le ti lo fani use pepe; ala yeke lango na wali ti amba ti ala. Ala ye ti mu sese so ti ga ye ti ala tongana nyen?

²⁷“Mo tene na ala, mo tene: Tënë so Kota Gbia NZAPA atene ayeke so: ‘Fini ti mbi! Azo so angba na ya ti gbata so abuba awe so, fade ala yeke kui kuâ ti yongoro zeme; azo so ayeke na ya ti ngonda, mbi yeke mu ala na anyama ti ngonda titene ate ala; azo so ahonde tere ti ala na ndö ti ahoto nga na ya ti adu ti têne, sioni kobela ti bubango kodro ayeke fâ ala.

²⁸Mbi yeke sara si kodro ni abuba, aga ngonda; ngangu so lo yeke fa baba ni ayeke hunzi. Ahoto ti Israel ayeke ga benyama, zo ayeke kiri ti hon kâ pepe.’

²⁹Na ndembe so mbi yeke sara titene kodro ni aga benyama biani ndali ti asioni sarango ye ti azo ti Israel so zo alingbi ti baa na le ti lo fani use pepe, fade azo ayeke hinga atene, mbi laa mbi yeke KOTA GBIA.

³⁰“Molenge ti zo, azo ti mara ti mo ayeke tene tënë ti mo na tere ti agbagba ti gbata ni ti gue na ni, wala na yanga ti ada. Ala yeke tene na popo ti ala, atene: ‘Ala ga, e gue, e ma tënë so alondo na KOTA GBIA.’

³¹Tongaso ala mingi aga si ala duti na dawa ti mo. Ala ma atënë ti mo, me ala sara ye alingbi na ni pepe. Ala yeke sara ye alingbi na ye so anzere na be ti ala, ala yeke gi gi ye so ala lingbi ti wara ye na peko ni.

³²Ti mo, mo yeke tongana mbeni nzoni zo ti hengo bia na ala; mo yeke he pendere bia si nzoni mozoko ayeke toto na gbe ni. Ala yeke ma atënë ti mo, me ala yeke sara ye alingbi na ni pepe.

³³Tongana aye so mo tene tënë ni asi ande, — aye ni aga nduru ti si, — fade ala yeke hinga atene, mbeni wayanga-Nzapa ayeke lani na popo ti ala.”