Read sango Ezekiel 34 Bible Online

Ezekiel 34 - sango bible

Ezekiel 34

¹Tënë ti *KOTA GBIA asi na mbi, atene:

²“*Molenge ti zo, tene peko ti tënë ti yanga ti mbi na tere ti awabatango-zo ti Israel. Tene peko ti tënë ti yanga ti mbi na tere ti ala, mo tene: Tënë so Kota Gbia NZAPA atene ayeke so: Mawa na awabatango-zo ti Israel! Ala yeke gi kobe gi ndali ti ala wani! Awabatango-taba alingbi fade ti gi kobe ndali ti ataba pepe?

³Ti ala, ala yeke te mafuta ti ataba ni, ala yeke yu bongo so a sara na kua ti tere ti ataba ni, ala yeke fâ ataba so akono nzoni; me ala yeke gi kobe ndali ti ataba ni pepe.

⁴Ataba so awoko, ala sara pepe titene ataba ni awara ngangu; ataba so ayeke na kobela, ala kai kobela na tere ti ala pepe; ataba so awara ka, ala kanga ka ni pepe; ataba so agirisa lege, ala kiri na ala na ndö ti lege pepe; ataba so agirisa, ala gi ala pepe. Me ala sara komandema na ndö ti ataba ni na ngangu, ala sara ngangu mingi na ala.

⁵Ataba ni akangbi kirikiri, ngbanga ti so wabatango ala ayeke daa pepe. Ataba ni aga kobe ti anyama kue ti ngonda; ala kangbi kirikiri.

⁶Ataba ti mbi ahon kirikiri na ndö ti akota hoto kue nga na ndö ti akete hoto kue; ataba ti mbi akangbi kirikiri, mbage na mbage na ndö ti sese kue. Zo oko ti baa tënë ti ala ayeke daa pepe; zo oko ti gi ala ayeke daa pepe.

⁷Ndani laa, ala awabatango-zo ti Israel, ala ma tënë ti KOTA GBIA!

⁸Fini ti mbi! Tënë so mbi Kota Gbia NZAPA, mbi tene ayeke so: Azo anzi ataba ti mbi; anyama kue ti ngonda ate ala, ngbanga ti so wabatango ala ayeke daa pepe. Awabatango-taba ni ague, agi peko ti ataba ti mbi pepe. Me ala gi kobe gi ndali ti ala wani, ala gi kobe ndali ti ataba ni pepe.

⁹Ndani laa, ala awabatango-zo ti Israel, ala ma tënë ti KOTA GBIA!

¹⁰Tënë so mbi Kota Gbia NZAPA, mbi tene ayeke so: Mbi yeke ga na tere ti awabatango-taba ni. Mbi yeke gi ataba ti mbi, mbi yeke zi ala na maboko ti ala; mbi yeke zi ala na kua ti batango ataba ni, tongaso si awabatango-taba ni alingbi ti gi kobe ndali ti ala wani mbeni pepe. Mbi yeke gboto ataba ni na yanga ti ala si ataba ni ayeke kiri ti duti kobe ti ala pepe.

¹¹“Biani, tënë so mbi Kota Gbia NZAPA, mbi tene ayeke so: Mbi wani, mbi yeke ga ti gi ataba ti mbi si mbi yeke baa ndo nzoni na ndö ti ala.

¹²Legeoko tongana ti so mbeni wabatango-taba ayeke na popo ti ataba ti lo so akangbi kirikiri, lo yeke baa ndo na ndö ti ala, mbi nga, fade mbi yeke baa ndo na ndö ti ataba ti mbi. Mbi yeke zi ala na ando so kue ala kangbi kirikiri daa, na lango so mbinda asara si ndo avuko vukongo.

¹³Mbi yeke mu ala na kodro wande, mbi yeke zi ala na ya ti akodro so kue ala yeke daa si mbi yeke kiri na ala na kodro ti ala. Mbi yeke gue na ala titene ala te kobe na ndö ti ahoto ti Israel, na ando so ngu ayeke sua daa nga na ando so kue azo asara kodro daa.

¹⁴Mbi yeke gue na ala na nzoni ndo ti tengo pere; ala yeke wara nzoni pere ti tengo ni na ndö ti ahoto ti Israel. Kâ, ataba ti mbi alingbi ti lango kpoo na ndo so nzoni pere ayeke daa si ala te nzoni pere na ndö ti ahoto ti Israel.

¹⁵Mbi wani, mbi yeke gi kobe ndali ti ataba ti mbi; mbi wani, mbi yeke sara titene ala lango kpoo. So tënë ti yanga ti Kota Gbia NZAPA laa.

¹⁶Taba so agirisa, fade mbi yeke gi lo; lo so agirisa lege, mbi yeke kiri na lo na ndö ti lege; lo so awara ka, mbi yeke kanga ka ni; lo so ayeke na kobela, mbi yeke sara titene lo wara ngangu. Me taba so akono konongo, lo so ayeke na ngangu, mbi yeke fâ lo. Mbi yeke gi kobe ndali ti ataba ti mbi na legeni.”

¹⁷“Âdu ti ala, ataba ti mbi, tënë so mbi Kota Gbia NZAPA, mbi tene ayeke so: Fade mbi yeke fâ ngbanga na popo ti ataba na ataba, na popo ti akoli-taba na akoli-ngasa.

¹⁸Nzoni pere so ala te so alingbi na ala pepe? Ngbanga ti nyen si ala kiri ado na gbe ti gere ti ala tanga ti pere so angba so? Ngu so le ni avuru vurungo si ala nyon so alingbi na ala pepe? Ngbanga ti nyen si ala kiri ado ya ti ngu ni si le ni abuba so?

¹⁹Ye so angba na tanga ti ataba ti mbi ayeke pere so ala do na gbe ti gere ti ala na ngu so ala sara si le ni abuba so.

²⁰Ndani laa, tënë so mbi Kota Gbia NZAPA, mbi tene ayeke so: Mbi wani laa mbi yeke fâ ngbanga na popo ti ataba so akono konongo na ala so ange ngengo.

²¹Ala pusu angengo taba ni na kate ti ala, ala pusu ala na ndö ti go ti ala; ala mu didi akpo na ataba so kue ayeke na kobela; ala sara ngbii ataba ni akangbi kirikiri, yongoro na ndo ti tengo pere.

²²Mbi yeke ga ti mu maboko na ataba ti mbi, tongaso si a kiri anzi ala pepe. Mbi yeke fâ ngbanga na popo ti ataba na ataba.

²³Mbi yeke zia gi wabatango-taba oko na ndö ti ataba ti mbi titene lo bata ala. Wabatango-taba ni ayeke duti David, zo ti kua ti mbi. Lo laa lo yeke gi kobe na ataba ni, lo laa lo yeke duti wabatango ala.

²⁴Mbi KOTA GBIA, mbi yeke duti Nzapa ti ala si David, zo ti kua ti mbi ayeke duti makonzi na popo ti ala. Mbi KOTA GBIA, mbi tene tënë awe.

²⁵“Fade mbi yeke sara *mbuki ti siriri na ala, mbi yeke zi asioni nyama na ya ti kodro ni. Tongaso, fade ataba ti mbi alingbi ti duti na siriri na ya ti benyama si ala lango na ya ti ngonda.

²⁶Mbi yeke sara tufa na ndö ti ala nga na ndö ti ando nde nde so ayeke na tere ti hoto ti mbi. Mbi yeke sara titene ngu-Nzapa apika na ngoi ni, ngu-Nzapa so ayeke sara nzoni na zo.

²⁷Fade akeke ti yaka ayeke le alengo ni, sese ayeke du ale ti kobe; azo ti mbi ayeke duti na siriri na sese ti ala. Mbi yeke fâ ya ti *zuge so ane na ndö ti ala, mbi yeke zi ala na gbe ti azo so asara ala ngbaa. Tongaso, fade ala yeke hinga atene, mbi laa mbi yeke KOTA GBIA.

²⁸Amara nde ayeke kiri ti nzi aye ti ala pepe, asioni nyama ayeke kiri ti te ala pepe. Ala yeke duti na siriri, zo oko ti zia mbeto na be ti ala ayeke daa pepe.

²⁹Mbi yeke mu na ala yaka so azo ama sango ni ndali ti nzoni lengo ti lo. Na ya ti kodro ni, fade azo ayeke kiri ti kui nzara pepe; amara nde ayeke kiri ti zia kamene na le ti ala pepe.

³⁰Tongaso, fade azo ayeke hinga atene, mbi laa mbi yeke KOTA GBIA, Nzapa ti azo ti Israel; mbi yeke na ala si ala yeke azo ti mbi. So tënë ti yanga ti Kota Gbia NZAPA laa.

³¹“Ala azo, ala yeke ataba ti mbi, ataba so mbi yeke mu na ala kobe. Biani, mbi yeke Nzapa ti ala. So tënë ti yanga ti Kota Gbia NZAPA laa.”