Read sango Ezekiel 35 Bible Online

Ezekiel 35 - sango bible

Ezekiel 35

¹Tënë ti *KOTA GBIA asi na mbi, atene:

²“*Molenge ti zo, mo baa ndo na mbage ti hoto ti Seir si mo tene peko ti tënë ti yanga ti mbi na tere ti azo so ayeke lango na ndö ti hoto ni.

³Mo tene na ala, mo tene: Tënë so Kota Gbia NZAPA atene ayeke so: Mbi yeke ga na tere ti ala! Mbi yeke yoro maboko ti mbi ti pika mo, hoto ti Seir; mbi yeke sara si mo ga benyama biani biani.

⁴Mbi yeke sara titene agbata ti mo aga ndo ti gba ti atêne; mo wani, mo yeke ga benyama. Tongaso, fade mo yeke hinga, mo tene, mbi laa mbi yeke KOTA GBIA.

⁵Mo ke azo ti Israel kpu na kpu. Na ngoi so ala yeke na ya ti mawa, na ngoi so a yeke kai asiokpari ti ala, mo londo na bira na tere ti ala.

⁶Tongaso, fini ti mbi! So tënë ti yanga ti mbi, Kota Gbia NZAPA laa. Fade mbi yeke tuku mene ti mo si mene so mo tuku so ayeke mu gi peko ti mo. Ndali ti so mo ye tënë ti tukungo mene mingi, fade a yeke tuku nga mene ti mo.

⁷Mbi yeke sara titene sese ti ahoto ti Seir aga ngonda biani biani; azo so kue ayeke hon kâ, mbi yeke fâ ala kue ti hunzi ala.

⁸Mbi yeke sara titene akuâ asi singo na ndö ti ahoto ti mo. Azo so kue a fâ ala na ya ti bira ayeke ti na ndö ti akete hoto ti mo, na popo-hoto ti mo nga na ya ti adu so angu ti mo ayeke sua daa.

⁹Mbi yeke sara titene mo ga benyama kpu na kpu; azo ayeke kiri ti lango na ya ti agbata ti mo pepe. Tongaso, fade mo yeke hinga, mo tene, mbi laa mbi yeke KOTA GBIA.

¹⁰“Mo tene: ‘Amara use so, Israel na Juda, asese use so ayeke ga ti mbi, e yeke mu ni ti ga ye ti e; andaa KOTA GBIA ayeke na ndo so.’

¹¹Mo sara lani kota be na tere ti ala, mo sara ngonzo na tere ti ala si be ti mo ake ala. Fini ti mbi! So tënë ti yanga ti mbi, Kota Gbia NZAPA laa. Fade mbi yeke sara na mo gi oko ye so mo sara na ala. Fade mbi yeke sara titene ala hinga mbi tongana mbi fâ ngbanga na li ti mo.

¹²Tongaso, fade mo yeke hinga, mo tene, mbi yeke KOTA GBIA; mbi ma azongango ndo so kue mo zonga na ahoto ti Israel, mo tene: ‘Ahoto ni aga benyama awe! A mu ala na e titene e te!’

¹³Ala tene tënë na tere ti mbi na baba; ala tene atënë ti baba na tere ti mbi: mbi ma atënë ni kue awe.

¹⁴“Tënë so mbi Kota Gbia NZAPA, mbi tene ayeke so: Na ndembe so azo ti kodro kue ayeke duti ande na ngia, mbi yeke sara si mo ga benyama.

¹⁵Na ndembe so a buba ye so aga ti azo ti Israel, tere ti mo anzere. Mbi yeke sara na mo gi oko ye so mo sara. Mo yeke ga benyama, mo na hoto ti Seir nga na sese ti Edom kue. Tongaso, fade azo ayeke hinga atene, mbi laa mbi yeke KOTA GBIA.”