Read sango Ezekiel 38 Bible Online

Ezekiel 38 - sango bible

Ezekiel 38

¹Tënë ti *KOTA GBIA asi na mbi, atene:

²“*Molenge ti zo, baa ndo na mbage ti Gog, kota makonzi ti azo ti Tubal na ti azo ti Meshek so lo yeke na kodro ti Magog. Tene peko ti tënë ti yanga ti mbi na tere ti lo.

³Mo tene na lo, mo tene: Tënë so Kota Gbia NZAPA atene ayeke so: Mo Gog, kota makonzi ti azo ti Meshek na ti azo ti Tubal, mbi yeke ga na tere ti mo.

⁴Mbi yeke yoro *kongi na ngbangba ti mo si mbi yeke gboto mo na ngangu ti hon na mo, mbi yeke sigigi na mo na ya ti kodro ni, mo na aturugu ti mo, ambarata ti mo, azo ti kpengo na mbarata ti mo; ala so kue ayu apendere bongo, gba ti aturugu so ala kue agbu *avala na ayongoro zeme na maboko ti ala.

⁵Aturugu ti Perse, ti Etiopii na ti Put kue ayo avala si ala yu akpoto ti bira; fade mo na ala ayeke gue.

⁶Gomer na aturugu ti lo kue, Bet-Togarma so ayeke yongoro kâ na mbage ti Banga, lo na aturugu ti lo kue, mo na ala nga na gba ti amara so ayeke na tere ti mo ayeke gue.

⁷Leke tere ti mo nzoni, duti nduru, mo na gba ti azo so kue abongbi na tere ti mo; mo laa mo yeke bata ala.

⁸Gbanda, ngu mingi na pekoni, mbi yeke tokua mo ti sara bira na kodro ti Israel. Andaa na ngoi ni so, azo ti kodro ni so akpe lani bira, ala yeke bongbi tere ti ala na ndö ti ahoto ti Israel, ahoto so abuba aninga awe. Na peko ti so azo ni agboto tere ti ala na popo ti gba ti amara, ala yeke duti na siriri.

⁹Mo na aturugu ti mo kue nga na gba ti amara so ayeke na tere ti mo, ala yeke ga ti tiri bira na azo ni; ala yeke ti na ndö ti azo ni tongana kota pupu; ala yeke kanga ndö ti kodro ti ala tongana gba ti mbinda.

¹⁰“Tënë so mbi Kota Gbia NZAPA, mbi tene ayeke so: Na lango ni so, fade atënë mingi mingi ayeke ga na be ti mo; mo yeke leke pialo so ayeke sioni.

¹¹Fade mo yeke tene: ‘Kodro so gbagba ayeke na tere ni pepe so, mbi yeke gue ti tiri bira na azo ni. Kâ, azo ni aduti kpoo, ala yeke lango na siriri, ala yeke lango na ya ti agbata so gbagba ayeke na tere ni pepe, ayanga ti agbata ni ayeke daa pepe si kota kerere ti kangango na ni ayeke daa pepe.

¹²Mbi yeke gue kâ ti gbu aye, ti nzi aye. Mbi yeke tiri bira na agbata so a buba ni ando si fadeso azo akiri ti lango daa so; azo ni alondo na ya ti akodro ti amara nde si ala bongbi tere ti ala; ala yeke na anyama na amosoro ti ala si ala yeke lango taa na be ti sese kue.’

¹³Azo so alango na Saba nga na Dedan, azo ti dengo buze ti Tarsis na agbata so ayeke na tere ni ayeke hunda ande mo, atene: ‘Mo ga ti gbu aye? Mo ga ti nzi ye laa mo bongbi aturugu ti mo so? Mo ga ti mu wen ti nginza na lôro, anyama nga na amosoro; mo ye ti gbu gba ti aye na peko ti bira ti gue na ni?’

¹⁴“Ndani laa, mo, molenge ti zo, tene peko ti tënë ti yanga ti mbi na tere ti Gog, mo tene: Tënë so Kota Gbia NZAPA atene ayeke so: Na lango so azo ti mbi, azo ti Israel, ayeke duti na siriri, fade mo yeke hinga tënë ni.

¹⁵Mo yeke londo na kodro ti mo so ayeke yongoro kâ na mbage ti Banga ti ga, mo na gba ti amara so ayeke na tere ti mo, ala kue ako na ndö ti ambarata; mo na ala ayeke bongbi ti ga gba ti aturugu.

¹⁶Mo yeke ga ti tiri bira na Israel, azo ti mbi. Mo yeke kanga ndö ti kodro ti ala tongana ti so mbinda ayeke kanga ndö ti sese. Ye ni ayeke si ande na lango ti ndani. Fade mbi yeke tokua mo ti gue ti tiri bira na kodro ti mbi. Tongaso si amara nde ahinga atene, mbi yeke Nzapa so mbi yeke nde si mbi yeke nzoni kue. Mbi yeke fa ye ni na ala na lege ti mo, Gog.

¹⁷“Tënë so mbi Kota Gbia NZAPA, mbi tene ayeke so: Mbi tene tënë ti mo ando na lege ti azo ti kua ti mbi, awayanga-Nzapa ti Israel. Na ya ti angu mingi, ala tene peko ti tënë ti yanga ti mbi atene, mo laa mbi yeke tokua mo ti gue ti tiri bira na azo ti mbi.

¹⁸Me na lango ni so, mo Gog, mo yeke si na sese ti Israel, fade ngonzo ti mbi ti wâ ayeke londo ngangu mingi. So tënë ti yanga ti Kota Gbia NZAPA laa.

¹⁹Na ya ti mbanda ti mbi nga na ya ti ngonzo ti mbi ti wâ, mbi deba yanga ti mbi, mbi tene: Na lango ni so, fade sese ayeke yingi ngangu na Israel.

²⁰Asusu ti kota ngu-ingo, andeke ti nduzu, anyama ti ngonda, anyama so kue ayeke hara harango nga na azo kue ti ndö ti sese, tere ti ala ayeke do na mbeto na dawa ti mbi. Ahoto ayeke ti na sese, atêne ayeke tuku na sese, agbagba kue ayeke ti na sese.

²¹Na ndö ti ahoto ti mbi kue, mbi yeke ga na bira na tere ti mo, Gog. So tënë ti yanga ti mbi, Kota Gbia NZAPA laa. Fade zo oko oko ayeke fâ ita ti lo na yongoro zeme.

²²Mbi yeke fâ ngbanga na li ti mo na lege ti sioni kobela ti bubango kodro nga na lege ti tukungo mene. Mbi yeke tokua ngangu ngu-Nzapa, *pembe ti bekpa, wâ nga na *sufre na ndö ti mo, na ndö ti aturugu ti mo nga na ndö ti gba ti amara so ayeke na tere ti mo.

²³Tongaso, fade mbi yeke fa na gba ti amara nde so mbi yeke kota, mbi yeke nde si mbi yeke nzoni kue. Tongaso, fade ala yeke hinga atene, mbi laa mbi yeke KOTA GBIA.”