Read sango Ezekiel 46 Bible Online

Ezekiel 46 - sango bible

Ezekiel 46

¹Tënë so Kota Gbia NZAPA atene ayeke so: “Yanga ti gbagba ti ya ni ayeke ngba na kangango ni na ya ti lango omene so azo ayeke sara kua; me a yeke zi ni na *lango ti wungo tere nga na lango ti matanga ti fini nze.

²Makonzi ayeke ga, lo li na lege ti kota kubu ti yanga ni ti gigi. Lo yeke luti na tere ti adere ti yanga ti da. Awayango-sandaga ayeke ya *sandaga so a yeke gbi ni kue na wâ nga na sandaga ti beoko ndali ti lo. Na ya ti yanga ti gbagba ni, makonzi ni ayeke kuku akpo li ti lo na sese; na pekoni, lo yeke sigigi. Yanga ti gbagba ni ayeke kanga pepe ngbii asi na lakui.

³Na lango ti wungo tere nga na lango ti matanga ti fini nze, azo ti kodro ayeke ga akuku, akpo li ti ala na sese na dawa ti yanga ti gbagba ti voro KOTA GBIA.

⁴“Na lango ti wungo tere, makonzi ayeke mu akete taba omene na koli-ngasa oko so mbeni mbage ti tere ti lo abuba pepe ti mu na KOTA GBIA tongana sandaga so a yeke gbi ni kue na wâ.

⁵Lo yeke mu kilo baleota ti *ble ndali ti koli-taba ni; ndali ti akete taba ni, lo yeke mu kilo ti ble alingbi na ye so lo yeke na ni. Lo yeke mu litere omene ti mafuta ndali ti kilo baleota ti ble.

⁶Na lango ti matanga ti fini nze, lo yeke mu koli-bagara so mbeni mbage ti tere ti lo abuba pepe, lo yeke mu akete taba omene nga na koli-ngasa oko so mbeni mbage ti tere ti ala abuba pepe ti mu na Nzapa.

⁷Lo yeke mu kilo baleota ti ble ndali ti koli-bagara nga ndali ti koli-taba ni. Ti akete taba, lo yeke mu kilo ti ble alingbi na ye so lo yeke na ni. Lo yeke mu omene litere ti mafuta ndali ti kilo baleota ti ble.

⁸Tongana makonzi aye ti li na ya ti gbagba ni, lo yeke hon na lege ti kota kubu ti yanga ti gbagba ni; fade lo yeke sigigi gi na oko lege ni.

⁹Tongana azo ti kodro ayeke ga ti voro KOTA GBIA na lango ti kota matanga, ala so ali na yanga ti gbagba ni ti mbage ti Banga, fade ala yeke sigigi na yanga ni ti mbage ti Mbongo; ala so ali na yanga ti gbagba ni ti mbage ti Mbongo, fade ala yeke sigigi na yanga ni ti mbage ti Banga. Yanga ti gbagba so zo ali na ni, lo lingbi ti sigigi gi na oko lege ni pepe; me lo yeke sigigi na yanga ti gbagba ti mbeni mbage ni.

¹⁰Fade makonzi na azo ti kodro ayeke li legeoko; tongana azo ni ayeke sigigi, lo kue, lo yeke sigigi.”

¹¹“Alango ti matanga nga na alango ti kota matanga, fade makonzi ayeke mu kilo baleota ti *ble ndali ti koli-bagara oko, kilo baleota ti ble ndali ti koli-taba oko. Ti akete taba, makonzi ayeke mu kilo ti ble alingbi na ye so lo yeke na ni. Lo yeke mu litere omene ti mafuta ndali ti kilo baleota ti ble.

¹²Tongana makonzi aleke na be ti lo ti mu na KOTA GBIA *sandaga so a yeke gbi ni kue na wâ, wala sandaga ti beoko, fade a yeke zi na lo yanga ti gbagba so ayeke na mbage ti To ti kota da ni. Lo yeke mu sandaga ni tongana ti so lo yeke sara ka na *lango ti wungo tere. Gi so lo yeke sigigi, a yeke kanga yanga ti gbagba ni.

¹³“Na ya ti lango oko oko, a yeke mu na KOTA GBIA mbeni kete taba ti ngu oko so mbeni mbage ti tere ti lo abuba pepe ti mu na sandaga so a yeke gbi ni kue na wâ. A yeke mu sandaga ni lakue na ndaperere.

¹⁴Lakue na ndaperere, a yeke mu nga na KOTA GBIA kilo oku ti farini nga na litere use ti mafuta titene a tuku na ya ti farini ni. Andia ti mungo sandaga na KOTA GBIA so ayeke ngba lakue lakue, kpu na kpu.

¹⁵Lakue na ndaperere, a yeke mu na KOTA GBIA kete taba, farini nga na mafuta ndali ti sandaga so a yeke gbi ni kue na wâ.”

¹⁶“Tënë so Kota Gbia NZAPA atene ayeke so: Tongana makonzi amu mbeni sese ti lo na mbeni molenge ti lo ti koli oko, sese ni ayeke ga ye ti molenge ni; ayeke ga ye ti amolenge ti lo nga na ti amolenge ti amolenge ti lo ti gue na ni.

¹⁷Me tongana makonzi amu mbeni sese ti lo na mbeni zo ti kua ti lo oko, sese ni ayeke ga ye ti zo ti kua ni ngbii asi na ngu so a yeke zi azo na gbe ti ngbaa. Na pekoni, sese ni ayeke kiri na makonzi ni. Tongaso sese ti makonzi ayeke ngba gi na amolenge ti lo.

¹⁸Sese so ayeke ti mbeni zo ti kodro, makonzi alingbi ti mu na ngangu na maboko ti zo ni pepe. Me ye ti lo wani laa lo lingbi ti mu mbeni na amolenge ti lo titene aga ye ti ala; tongaso si na popo ti azo ti mbi, a tumba mbeni zo na ndö ti sese ti lo pepe.”

¹⁹Koli ni amu mbi, ahon na mbi na lege so ayeke na tere ti yanga ni si e li na ya ti akubu so ayeke nde si ayeke nzoni kue. Akubu ni abaa ndo na mbage ti Banga; a leke ni ndali ti awayango-sandaga. Mbeni ndo so angba senge ayeke na ngbonda ti da ni, na mbage ti Do.

²⁰Lo tene na mbi, lo tene: “Na ndo so laa awayango-sandaga ayeke to anyama so azo amu na *sandaga titene Nzapa azi sioni na li ti ala. Na ndo so nga laa awayango-sandaga ayeke to aye so azo amu na Nzapa. Tongaso si zo oko asigigi na mbeni ye ti sandaga ni na ya ti gbagba ti gigi ni pepe si azo ti kodro andu tere ti ye so ayeke nde si ayeke nzoni kue pepe.”

²¹Koli ni amu mbi, ague na mbi na ya ti gbagba ti gigi ni si lo hon na mbi na andangoro osio ti gbagba ni. Ndangoro oko oko ayeke na mbeni kete gbagba ti lo.

²²Akete gbagba ni osio kue ayeke kete; ayo kudee baleosio na mbage, kudee baleota na mbeni mbage. Ala osio kue ayo alingbi tere.

²³Mbeni dere ayeke na tere ti akete gbagba ni osio kue; a leke ando ti tongo kobe na tere ti gbagba ni, angoro ni kue.

²⁴Koli ni atene na mbi: “So ndo ti tongo kobe laa. Anyama so azo amu na sandaga, azo ti kua ti kota da ti Nzapa ayeke to ni na ndo so.”