Read sango Ezekiel 5 Bible Online

Ezekiel 5 - sango bible

Ezekiel 5

¹“Ti mo, *molenge ti zo, mo mu mbeni yongoro zeme so yanga ni aza mingi, mo kio na kua ti li ti mo nga na kua ti yanga ti mo. Na pekoni, mo zia kua ti li ti mo na kua ti yanga ti mo ni na ndö ti kilo ti haka ni; mo kangbi ya ni.

²Tongana lango so awato angoro gbata ni ti mu na bira alingbi awe, fade mo yeke mu kozo mbage ni, mo gbi ni na be ti gbata ni. Mo yeke mu use mbage ni, mo fâ ya ni na yongoro zeme, mo ngoro na gbata ni kue. Mo yeke mu ota mbage ni, mo tuku ni na le ti nduzu si pupu amu ahon na ni; ti mbi, fade mbi yeke gboto yongoro zeme ti mbi ti tumba na peko ni.

³Me mo yeke mu mbage ti kua ni so kete, mo kanga ni na yanga ti bongo ti mo.

⁴Na pekoni, mo yeke mu ambeni kua ni, mo tuku na le ti wâ, mo gbi ni. Fade wâ ayeke londo daa ti gbi azo ti Israel kue.

⁵“Tënë so mbi Kota Gbia NZAPA, mbi tene ayeke so: Gbata ti Jérusalem laa! Mbi zia ni na popo ti amara nde, akodro wande angoro ni kue.

⁶Me azo ti gbata ni ake ti sara ye alingbi na atënë ti ndia ti mbi nga na aye so mbi fa. Ala kiri asara aye ti sioni ahon azo ti amara nde nga na azo ti akodro so angoro ala. Biani, ala bi atënë ti ndia ti mbi na ngonda, ala sara ye alingbi na aye so mbi fa pepe.

⁷Nilaa, tënë so mbi Kota Gbia NZAPA, mbi tene ayeke so: Ala sara aye ti kirikiri mingi ahon amara nde so angoro ala, ala sara ye alingbi na atënë ti ndia ti mbi pepe nga na aye so mbi fa; ataa atënë ti ndia ti mbi na ti amara nde so angoro ala, ala azo ti Jérusalem, ala sara ye alingbi na ni pepe.

⁸Ndani laa, tënë so mbi Kota Gbia NZAPA, mbi tene ayeke so: Mbi yeke ga na tere ti ala, azo ti Jérusalem. Mbi yeke fâ ngbanga na li ti ala taa na ya ti gbata ni, na le ti amara nde.

⁹Ndali ti so ala sara aye ti sioni so zo alingbi ti baa na le ti lo fani use pepe, mbi yeke sara na ala mara ti ye so mbi de mbi sara laoko pepe, mbi yeke kiri nga ti sara ni laoko pepe.

¹⁰Na ya ti gbata ni, fade babâ na mama ayeke te amolenge ti ala, amolenge ayeke te babâ na mama ti ala. Mbi yeke fâ ngbanga na li ti ala; ti tanga ti azo so ayeke ngba na fini, mbi yeke kangbi ala kirikiri na ndo kue.

¹¹“Fini ti mbi, Nzapa! So tënë ti yanga ti mbi, Kota Gbia NZAPA laa: Ndo so a zia ni nde ndali ti mbi, ala sara si aga *sioni na lege ti asioni sarango ye ti ala nga na lege ti afungo yanda ti ala. Mbi nga, mbi yeke gboto tere ti mbi, mbi yeke baa mawa ti ala oko pepe, mbi yeke zia zo oko pepe.

¹²Fade a yeke kangbi ya ti ala ota: kozo kangbi ni ayeke kui ande na sioni kobela ti bubango kodro nga na kota nzara taa na ya ti gbata ni; use kangbi ni ayeke kui kuâ ti yongoro zeme na tere ti gbata ni. Fade mbi yeke kangbi tanga ti azo ni kirikiri na ndo kue si mbi yeke gboto yongoro zeme ti mbi ti tumba peko ti ala.

¹³Le ti mbi ayeke be na tere ti ala si ngonzo ti mbi ti wâ ayeke tuku na ndö ti ala ngbii be ti mbi ade si. Mbi yeke kiri na ala peko ti sioni so ala sara. Tongaso, fade ala yeke hinga atene, mbi KOTA GBIA laa mbi tene tënë na ala; mbi kanga be ti mbi na ala gbaa ndali ti so ala bata tere ti ala na mbi pepe. Ndani laa, mbi yeke tuku ngonzo ti mbi ti wâ na ndö ti ala ngbii be ti mbi ade si.

¹⁴Jérusalem, mbi yeke sara si mo buba kue, mbi yeke zia kamene na le ti mo na popo ti amara so angoro mo nga na le ti azo so kue ahon na lege.

¹⁵Na lege ti ngonzo ti mbi, ngonzo ti mbi ti wâ, mbi yeke fâ ngbanga na li ti mo, mbi yeke suku na mo na ngonzo ti mbi ti wâ. Amara so angoro mo ayeke he mo na ngia si ayeke zonga mo. Na bango mo, mbeto ayeke gbu azo ni si mo yeke ga ye ti gbungo-li na ala. Mbi KOTA GBIA, mbi tene tënë awe.

¹⁶“Mbi yeke tokua kota nzara titene afâ ala, ahunzi ala kue. Nzara ni ayeke kpo ala tongana ti so kokora ayeke kpo zo. Akobe so ala bata, mbi yeke buba ni kue.

¹⁷Mbi yeke tokua kota nzara na tere ti ala nga na asioni nyama ti fâ amolenge ti ala. Sioni kobela ti bubango kodro nga na bira ayeke hunzi ala. Mbi KOTA GBIA, mbi tene tënë awe.”