Read sango Ezekiel 6 Bible Online

Ezekiel 6 - sango bible

Ezekiel 6

¹Tënë ti *KOTA GBIA asi na mbi, atene:

²“*Molenge ti zo, mo baa ndo na mbage ti ahoto ti Israel si mo tene peko ti tënë ti yanga ti mbi na ndö ni,

³mo tene: Ahoto ti Israel, ala ma tënë ti Kota Gbia NZAPA! Baa, tënë so Kota Gbia NZAPA atene na azo ti ahoto na azo ti akete hoto, azo ti gbe ti ahoto na azo ti popo-hoto ayeke so: Fade mbi wani, mbi yeke ga na bira na tere ti ala, mbi yeke buba ando so ala leke na nduzu si ala yeke voro anzapa ti ala daa so.

⁴A yeke kungbi na sese agbalaka ti ala, a yeke fâ ya ti gbalaka ti zongo na ayombo ti ala. Mbi yeke sara si azo akui kirikiri na gbe ti ayanda ti ala.

⁵Mbi yeke sara si kuâ ti ala, azo ti Israel, alango kirikiri na sese na gbe ti ayanda ti ala; mbi yeke kangbi abio ti ala na tere ti agbalaka ti ala angoro ni kue.

⁶Na ndo so kue ala yeke lango daa, fade agbata ayeke buba, ando so ala leke na nduzu ti voro anzapa ti ala daa, ayeke buba kue. Azo ayeke kungbi na sese agbalaka ti ala si ayeke ga senge ye, ya ti ayanda ti ala ayeke kungbi kete kete si mbeni ye oko ayeke ngba pepe. Azo ayeke fâ ya ti aye ti zongo na ayombo ti ala si ye so maboko ti ala asara, peko ni ayeke ngba pepe.

⁷Fade azo mingi na popo ti ala ayeke kui. Tongaso, fade ala yeke hinga atene, mbi laa mbi yeke KOTA GBIA.

⁸Me mbi yeke zia ambeni zo na popo ti ala angba na fini na peko ti bira. A yeke kangbi azo ni so na ya ti akodro wande.

⁹Azo so ayeke ngba na fini ayeke dabe ti ala na mbi kâ na popo ti amara nde, ndo so a gbu ala si a gue na ala daa. Azo ni ayeke dabe ti ala na lege so mbi sara si be ti ala afâ, be ti ala so ala mu na anzapa nde si ala ke mbi so. Ala yeke dabe ti ala nga na lege so mbi sara si le ti ala abuba, le ti ala so ala yeke baa na anzapa nde so. Tongaso, nzara ti aye ni ayeke sigigi na be ti ala ndali ti asioni ye so ala sara nga ndali ti aye so ala sara si zo alingbi ti baa na le ti lo fani use pepe so.

¹⁰Fade ala yeke hinga atene, mbi yeke KOTA GBIA. Tongana mbi tene tënë ti sarango mara ti sioni tongaso na ala, andaa mbi tene tënë ni senge pepe.”

¹¹Tënë so Kota Gbia NZAPA atene ayeke so: “Mo pika maboko ti mo, mo do sese na gere ti mo si mo tene: ‘Ae!’ ndali ti asioni ye so kue azo ti Israel asara nga ndali ti aye so ala sara si zo alingbi ti baa na le ti lo fani use pepe so. Fade ala yeke kui na ya ti bira, na lege ti kota nzara nga na sioni kobela ti bubango kodro.

¹²Zo so ayeke na yongoro ndo, sioni kobela ti bubango kodro ayeke fâ lo, zo so ayeke nduru ge, lo yeke kui na ya ti bira. Ti atanga ni, ala so angba si a ngoro ala na bira so, fade nzara ayeke fâ ala. Mbi yeke tuku ngonzo ti mbi ti wâ na ndö ti ala ngbii be ti mbi ade si.

¹³Fade kuâ ti ala ayeke lango na sese gbani gbani na popo ti ayanda ti ala, kuâ ni ayeke lango na sese angoro tere ti agbalaka ti ala, na ndö ti akota hoto na akete hoto kue, na gbe ti akeke so akugbe ni angba fini ni nga na gbe ti akeke so kue kugbe ni ayeke gbani gbani, na ando so kue ala yeke zö ayombo so fion ni anzere na ayanda ti ala kue. Tongaso, fade ala yeke hinga atene, mbi laa mbi yeke KOTA GBIA.

¹⁴Mbi yeke yoro maboko ti mbi ti pika ala. Kodro so kue ala yeke lango daa, ti londo na benyama na mbage ti Mbongo ngbii asi na gbata ti Ribla na mbage ti Banga, mbi yeke hunzi azo ti ya ti agbata ni kue si agbata ni ayeke ga ngonda. Tongaso si ala hinga atene, mbi yeke KOTA GBIA.”