Read sango Ezekiel 9 Bible Online

Ezekiel 9 - sango bible

Ezekiel 9

¹Na pekoni, mbi ma *KOTA GBIA so adekongo na kota go, atene: “Ala ga, ala so a mu na ala lege ti ga na tere ti Jérusalem so! Ayeke nzoni zo oko oko aga na ye ti bira ti lo ti buba na gbata ni.”

²Tongaso mbi baa akoli omene alondo na yanga ti kota da ti Nzapa si ayeke ga; yanga ti da so ayeke na mbage ti nduzu si ayeke baa le na mbage ti Banga so. Zo oko oko ayeke na ye ti bira ti bubango na ye na maboko ti lo. Na popo ti ala, mbeni koli ayeke daa so ayu bongo ti *len; lo yoro ye ti sungo na mbeti na gbe ti kamba ti ndö ti bongo ti lo. Akoli ni kue aga aluti na tere ti gbalaka so a sara ni na bengba wen.

³Gonda ti Nzapa ti Israel so ayeke na ndö ti *asheruben alondo na ndö ti ala si ague na mbage ti yanga ti kota da ti Nzapa. KOTA GBIA airi koli so ayu bongo ti len si ayoro ye ti sungo na mbeti na gbe ti kamba ti ndö ti bongo ti lo so;

⁴lo tene na lo: “Mo tambula na ya ti gbata ti Jérusalem kue. Ambeni zo ayeke na ya ti gbata ni so ayeke dema si ayeke toto ndali ti asioni ye so azo ayeke sara na ya ti gbata ni si zo alingbi ti baa na le ti lo fani use pepe so. Fade mo yeke su mbeni nzoroko na ndö ti le ti ala.”

⁵Na pekoni, mbi ma KOTA GBIA atene na ambeni koli ni, atene: “Ala mu peko ti koli so na ya ti gbata ni, ala fâ azo. Mawa ti azo ni asara ala pepe, ala baa mawa ti zo oko pepe.

⁶Ataa ambakoro, ataa amaseka-koli wala amaseka-wali, ataa amolenge wala awali, ala fâ ala, ahunzi ala kue. Me azo so nzoroko ayeke na ndö ti le ti ala, ala ndu ala pepe. Ala to nda ni ge na ndo so a zia ni nde ndali ti mbi.” Nilaa akoli ni ato nda ti fâ *akangba so ayeke na dawa ti kota da ti Nzapa.

⁷Tongaso KOTA GBIA amu yanga na ala, atene: “Ala sara si ya ti da ni aga *sioni, ala sara si kuâ asi singo na ya ti gbagba ni, na pekoni, ala sigigi!” Nilaa ala gue si ala fâ azo ti ya ti gbata ni.

⁸Na ndembe so ala yeke fâ azo ti gue na ni, mbi ngba gi mbi oko. Mbi ti, mbi kpo li ti mbi na sese si mbi dekongo, mbi tene: “Ae, Kota Gbia NZAPA! So mo yeke de ngonzo ti mo ti wâ tongaso na ndö ti Jérusalem so, mo ye ti fâ tanga ti azo ti Israel kue ti hunzi ala?”

⁹KOTA GBIA akiri tënë na mbi, atene: “Sioni ti azo ti Israel na ti azo ti Juda ayeke kota ahon ndoni; mene asi singo na ya ti kodro ni, sarango ngangu na azo asi singo na ya ti gbata ni. Biani, azo ni ayeke tene: ‘KOTA GBIA ado kodro ni azia awe, lo lingbi ti baa e oko pepe.’

¹⁰Tongaso mbi nga, fade mbi yeke baa mawa ti ala oko pepe, mbi yeke zia zo oko pepe; mbi yeke futa ala alingbi na lege ti sarango ye ti ala.”

¹¹Na ndembe ni so, koli so ayu bongo ti len, lo so lo yoro ye ti sungo na mbeti na gbe ti kamba ti ndö ti bongo ti lo so aga ti fa peko ti aye so lo sara, lo tene: “Mbi sara ye alingbi na yanga so mo mu na mbi.”