Read sango Daniel 1 Bible Online

Daniel 1 - sango bible

Daniel 1

¹Na ya ti ngu ota ni so Yoakim ayeke gbia ti Juda, Nabukodonosor, gbia ti Babilone aga na Jérusalem si lo ngoro gbata ni na bira.

²KOTA GBIA azia Yoakim, gbia ti Juda na maboko ti Nabukodonosor; lo zia nga lege na Nabukodonosor si lo mu mbeni mbage ti akungba ti ya ti kota da ti Nzapa. Nabukodonosor ague na akungba ni na kodro ti Shinear si lo zia ni na ya ti kubu ti batango amosoro ti lo so ayeke na ya ti da ti anzapa ti lo.

³Na pekoni, gbia amu yanga na Ashepenaz, makonzi ti *ambaiwa ti lo titene lo soro ambeni maseka-koli ti kodro ti Israel, lo ga na ala: ala so ayeke na ya ti asewa ti agbia, wala ala so ayeke na ya ti asewa ti akota zo ti kodro.

⁴Alingbi mbeni ye ti tere ti amaseka-koli ni oko abuba pepe; ala yeke pendere mingi; ala si singo na ndara, ala yeke azo ti hingango mbeti na azo ti hingango ndo. Tongaso, fade ala yeke sara kua na yangbo ti gbia; fade a yeke fa na ala agere ti mbeti nga na yanga ti kodro ti azo ti Babilone.

⁵Gbia amu yanga titene a mu lakue na amaseka-koli ni gi oko kobe so lo yeke te, na oko samba so lo yeke nyon. Lo mu yanga titene a bata ala nzoni na ya ti ngu ota. Na pekoni, fade ala yeke londo ti sara kua na lo.

⁶Andaa amaseka-koli osio ti mara ti Juda ayeke na popo ti amaseka-koli so a soro ala so: Daniel, Hanania, Mishael na Azaria.

⁷Makonzi ti ambaiwa azia fini iri na ndö ti ala. Lo di iri ti Daniel, Beltasar; lo di iri ti Hanania, Shadrak; lo di iri ti Mishael, Meshak si lo di iri ti Azaria, Abed-Nego.

⁸Daniel aleke na be ti lo ti ke ti ga *sioni ndali ti kobe ti gbia nga ndali ti samba ti lo. Tongaso Daniel ahunda na makonzi ti ambaiwa ti gbu lo na ngangu pepe si lo ga *sioni.

⁹Nzapa asara si makonzi ti ambaiwa ni asara nzoni be na Daniel. Lo sara na Daniel alingbi na ye so Daniel ahunda.

¹⁰Me lo tene na Daniel, lo tene: “Gbia wani laa amu yanga titene a mu na ala kobe so ala lingbi ti te na samba so ala lingbi ti nyon. Mbeto asara mbi ngbanga ti so, tongana lo baa si ala nge ahon amba ti ala so ngu ti ala ayeke oko na ala, fade lo yeke fâ go ti mbi ndali ti ala.”

¹¹Tongaso Daniel atene na zo ti kua so makonzi ti ambaiwa amu lo titene lo bata Hanania, Mishael, Azaria na Daniel so, atene:

¹²“Mbi gbu gere ti mo, mo tara e, azo ti kua ti mo na ya ti lango baleoko si. A yeke mu na e gi kugbe ti kasa ti tengo ni, na senge ngu ti nyongo ni.

¹³Na pekoni, fade mo baa le ti e na le ti amaseka-koli so ate akobe ti gbia; tongaso si fade mo sara na azo ti kua ti mo alingbi na ye so mo baa.”

¹⁴Koli ni aye peko ti ye so Daniel na amba ti lo ahunda na lo so. Tongaso lo tara ala na ya ti lango baleoko.

¹⁵Na peko ti lango baleoko, le ti ala akiri aza pendere ahon ti kozoni si ala kiri akono nzoni ahon amba ti ala so ate ti ala gi akobe ti gbia so.

¹⁶Ndani laa zo ti kua ni azi akobe na samba ti gbia si lo yeke mu na ala gi akugbe ti kasa ti tengo ni.

¹⁷Nzapa asara si amaseka-koli osio so ahinga nda ti aye. Lo sara si ala hinga mbeti si ala duti nga na ndara mingi. Ti Daniel, lo hinga nda ti aye so ayeke ga na le ti zo tongana bango-li nga na abango-li kue.

¹⁸Ngoi so gbia Nabukodonosor afa titene a ga na amaseka-koli so kue a soro ala lani so alingbi awe. Makonzi ti ambaiwa amu amaseka-koli ni si ague na ala na lo.

¹⁹Gbia asara lisoro na ala. Na popo ti amaseka-koli so kue, lo wara mbeni zo oko so alingbi na Daniel, Hanania, Mishael na Azaria pepe. Tongaso amaseka-koli ni aga azo ti sarango kua na gbia.

²⁰Lakue gbia ayeke hunda na ala atënë so ahunda ndara na hingango ye. Nilaa lo baa amaseka-koli osio so ahinga ye fani baleoko ahon azo ti nganga na azo ti yoro so kue ayeke na ya ti kodro ti lo.

²¹Daniel asara kua na gbia ngbii asi na ngu so Sirus aga gbia.