Read sango Daniel 11 Bible Online

Daniel 11 - sango bible

Daniel 11

¹Ti mbi, na kozo ngu so Darius, zo ti mara ti Medii ayeke gbia, mbi duti na tere ti Michel ti mu maboko na lo, ti sara nga si lo wara ngangu.

²Fadeso, mbi yeke fa na mo taa-tënë.’ ” “ ‘Baa, ambeni gbia ota ayeke kiri ti ga na li ti kodro ti Perse; osio ni ayeke ga nga. Me osio ni ayeke wara mosoro mingi ahon ambeni so kue. Tongana lo baa so mosoro ti lo ni amu na lo ngangu so alingbi awe, fade lo yeke londo ti sara bira na kodro ti Grese.

³Me kâ na Grese, mbeni ngangu gbia ayeke londo; komandema ti lo ayeke duti ngangu si lo yeke sara ye so be ti lo aye.

⁴Tongana lo duti ande gbia si gere ti lo agbu sese mbirimbiri awe, ya ti kodro ti lo ayeke fâ si ya ni ayeke kangbi na ndangoro osio ti le ti nduzu. *Ahale ti lo laa ayeke mu kodro ni na peko ti lo pepe. Fade a yeke zi kodro ni na maboko ti lo, a kangbi ni na popo ti ambeni zo nde. Me komandema ti azo ni ayeke lingbi na ti lo pepe.

⁵‘Fade gbia so ayeke na Mbongo ayeke ga ngangu. Me mbeni turugu ti kota kamba ti lo oko ayeke duti ngangu ahon lo; komandema ti turugu ni ayeke hon ti gbia ni.

⁶Ngu kete na pekoni, ala yeke ga ambuki: molenge ti gbia ti Mbongo ayeke ga wali ti gbia ti Banga ti sara si songo aduti na popo ti ala. Me molenge ni ayeke bata komandema ti lo ni pepe. Koli ti lo ayeke ngba na fini pepe; molenge ti ala nga ayeke ngba na fini pepe. Lo nga, lo yeke kui na ngoi ni kâ, lo na azo so ague na peko ti lo nga na babâ ti lo na koli ti lo.

⁷Mbeni zo ti sewa ti molenge-wali ni laa ayeke ga gbia na peko ti babâ ti lo. Zo ni ayeke gue ti gi yanga ti aturugu so ayeke na Banga. Lo yeke li taa na ya ti ngangu gbagba ti aturugu ni; lo yeke sara bira na ala si lo yeke kinda ala.

⁸Anzapa ti ala so lo gbu na ya ti bira, na ayanda ti ala so a sara na wen, fade lo yeke mu ni ti gue na ni na Ezipte. Lo yeke gue nga na aye ti kua ti nzoni ni so a sara na wen ti nginza na lôro. Na pekoni, lo yeke zia lege ti sarango bira na gbia so ayeke na Banga aninga ambeni ngu.

⁹Me gbia ti Banga ayeke gue na ndo ti gbia ti Mbongo; na pekoni, lo yeke kiri na kodro ti lo.

¹⁰‘Fade amolenge ti gbia ti Banga ayeke londo ti sara bira; ala yeke bongbi aturugu gbani gbani. Mbeni oko ti amolenge ni ayeke ga na aturugu ti lo si ala yeke mu akodro mingi. Na kiringo ti gbia ni na kodro ti lo, lo yeke li na ya ti mbeni gbata tongana ngu so asuku si amu ndo kue; lo yeke sara bira na ya ti mbeni gbata so ngangu gbagba ayeke na tere ni.

¹¹Ngonzo ayeke gbu gbia ti Mbongo sioni sioni si lo yeke gue ti sara bira na gbia ti Banga. Gbia ti Banga ayeke bongbi aturugu gbani gbani, me ala yeke ti na gbe ti gbia ti Mbongo.

¹²So gbia ti Mbongo abaa atene ni kinda azo gbani gbani awe, baba ayeke hon ndö ti lo. Me ataa so lo yeke fâ aturugu kutu kutu, lo yeke so benda pepe.

¹³Gbia ti Banga ayeke kiri ti bongbi aturugu gbani gbani ahon ti kozo. Na peko ti ngu mingi, lo yeke mu gba ti aturugu na akungba ti bira mingi ti ga na ni.

¹⁴Na ngoi ni kâ, azo gbani gbani ayeke londo ti tiri bira na gbia ti Mbongo. Ataa ambeni zo ti mara ti mo Daniel, ala so kua ti ala ayeke ti sarango ngangu na azo, ala yeke londo nga ti tiri bira na gbia ni ti sara si ye so azo abaa na ya ti mbeni ye tongana bango-li aga taa-tënë; me a yeke kinda ala.

¹⁵Gbia ti Banga ayeke ga, lo yeke bongbi sese aga *koto na tere ti mbeni gbata so ngangu gbagba ayeke na tere ni si lo yeke mu gbata ni. Aturugu ti Mbongo, ataa so ala yeke akpengba turugu mingi, ala yeke gbu le ni na lo pepe, ngbanga ti so ngangu ti ala alingbi pepe.

¹⁶Zo so ayeke ga ti mu kodro ni ayeke sara ye tongana ti so be ti lo aye, ngbanga ti so zo ti kanga lege na lo ayeke daa pepe. Lo yeke duti na ya ti pendere kodro ni si lo yeke buba aye kue.

¹⁷Na pekoni, lo yeke leke na be ti lo ti ga na ngangu so kue lo wara ndali ti azo ti kodro ti lo; lo yeke sara songo na gbia ti Mbongo. Nilaa lo yeke mu na gbia ti Mbongo ni molenge ti lo ti wali ti ga wali ti lo, tongaso si lo wara lege ti buba kodro ni. Me ye so lo leke na be ti lo so ayeke si pepe.

¹⁸Na pekoni, gbia ti Banga ayeke zia le ti lo na mbage ti azoa si lo yeke mu akodro mingi na lege ti bira. Me mbeni makonzi ayeke kanga lege na zonga ti lo; lo yeke sara si zonga ni akiri gi na ndö ti gbia ti Banga ni wani.

¹⁹Gbia ti Banga ayeke zia le ti lo na mbage ti agbata ti kodro ti lo wani so angangu gbagba ayeke na tere ni. Me lo yeke baa nzoni daa pepe; lo yeke kui si zo ayeke kiri ti baa lo pepe.

²⁰Zo so ayeke ga gbia na peko ti lo ayeke tokua ande mbeni zo ti nzi aye ti pendere da ti kodro ni. Me lango kete na pekoni, a yeke fâ fini gbia ni; a yeke fâ lo na ngonzo pepe wala na ya ti bira pepe.’ ”

²¹“ ‘Zo so ayeke ga na peko ti lo ayeke duti mbeni mbumbuse zo so azo amu na lo nengo ti gbia pepe. Lo yeke ga na ndembe so siriri ayeke daa si lo yeke mu kodro ni na lege ti sarango aye ti handa.

²²Aturugu gbani gbani so amu ndo tongana ngu so asuku alingbi ti kinda lo pepe; lo yeke nika ala kue. Lo yeke fâ nga makonzi ti azo ti *mbuki.

²³Na peko ti so azo mingi ayeke ma tere na lo, lo yeke sara mayere ti handa azo. Ngangu ti lo ayeke gue gi na nduzu, ataa so li ti azo ti lo awu mingi pepe.

²⁴Na ngoi so siriri ayeke duti na ya ti kodro ni, lo yeke gue na ando nde nde ti sese ni so mosoro asi singo daa. Kâ, fade lo yeke sara aye so akotara ti lo ade ti sara mara ni laoko pepe: lo yeke kangbi na azo ti lo aye so lo gbu na peko ti bira, aye so lo gbu na ngangu na maboko ti azo nga na aye ti mosoro nde nde. Lo yeke leke na be ti lo ti sara bira titene lo mu angangu gbagba. Me ye so kue ayeke ninga mingi pepe.

²⁵‘Lo yeke gbu ngangu, lo yeke sara ye ti koli si lo yeke mu gba ti aturugu ti gue ti tiri bira na gbia so ayeke na Mbongo. Gbia ti Mbongo na aturugu so awu ahon ndoni si ala yeke ngangu mingi ayeke leke tere ti ala ti tiri bira. Me ala yeke gbu le ni na gbia ti Banga pepe, ngbanga ti so a yeke leke mbeni tënë na hondengo ni na tere ti gbia ti Mbongo ni.

²⁶Biani, gi azo so gbia ti Mbongo ayeke te kobe na ala oko laa ayeke sara si lo ti. Ya ti aturugu ti lo ayeke kangbi kirikiri si ala mingi ayeke kui.

²⁷Agbia use so ayeke wara tere na tere ti meza oko. Me ndali ti so sioni ye laa asi be ti ala, ala yeke tene gi atënë ti mvene na popo ti ala. Atënë ti ala ni ayeke sara ye oko pepe, ngbanga ti so tënë ni ayeke ko ndani gi na lango so a diko awe.

²⁸Fade gbia ti Banga ayeke kiri na kodro ti lo na gba ti mosoro. Na kiringo ti lo, lo yeke sara ye so lo leke na be ti lo ti sarango ni na azo so Nzapa aga mbuki na ala. Na pekoni, lo yeke kiri na kodro ti lo.

²⁹‘Tongana lango so a diko alingbi awe, gbia ti Banga ayeke kiri ti gue na kodro so ayeke na Mbongo. Me ti so ni, aye ni ayeke duti nde na ti kozoni.

³⁰Azo ti mbage ti Do ayeke mu amangboko si ayeke ga ti tiri bira na lo. Be ti lo ayeke woko si lo yeke mu lege ti kiri. Na kiringo ni, lo yeke de ngonzo ti be ti lo na ndö ti azo so Nzapa aga mbuki na ala. Me azo so azia lege ti mbuki ti ala na Nzapa, lo na ala ayeke ma tere.

³¹Aturugu so lo tokua ala ayeke gue ti luti na tere ti ngangu gbagba so ayeke na tere ti ndo so a zia ni nde ndali ti Nzapa ti sara si ndo ni aga sioni. Asandaga so azo ayeke mu na Nzapa na ya ti lango oko oko, aturugu so ayeke kanga lege ni. Ala yeke zia na ndö ti gbalaka Sioni-kpale-ti-bubango-ndo-kue

³²Na lege ti sarango aye ti mayere, fade gbia ni ayeke handa azo ti ke lege ti mbuki ti ala na Nzapa. Me azo so angba na lege ti Nzapa, fade ala ngba ti luti ngangu na ya ti asarango ye ti ala.

³³Azo so le ti ala ahan na popo ti azo ti kodro ayeke sara si ambeni zo mingi ahinga ye. Me na ya ti mbeni ngoi, a yeke fâ ambeni, a yeke gbi ambeni na wâ; ti ambeni, a yeke nzi aye ti ala kue si a yeke gbu ala na ya ti bira.

³⁴Na ndembe ti aye ti ngangu ni so, azo ayeke mu maboko na ala gi kete. Me na lege ti atënë ti handa, azo gbani gbani ayeke bongbi na ala.

³⁵Fade azo mingi na popo ti azo so le ti ala ahan ayeke kui. Kuâ ti ala ayeke sara si a *sukula sioni ti azo ti kodro, ala ga nzoni si ala vuru nzoni ti ku na lango ti ndani. Lango ti ndani ayeke si gi na ngoi so a diko awe.

³⁶‘Fade gbia ni ayeke sara gi ye so be ti lo aye; lo yeke gonda tere ti lo mingi si lo yeke baa tere ti lo kota ahon anzapa. Lo yeke tene atënë so akpa titene zo atene pepe na tere ti Nzapa so ahon anzapa kue. Aye so kue gbia ni ayeke sara ayeke ga nzoni na lo ngbii asi na ngoi so ngonzo ti Nzapa ayeke si na ndani. Tongaso, fade Nzapa ayeke sara ye so lo leke na be ti lo ti sara.

³⁷Gbia ni ayeke baa anzapa ti akotara ti lo tongana senge ye. Ataa nzapa so awali aye mingi, wala mbeni nzapa nde, lo yeke baa ala tongana senge ye. Biani, lo yeke baa tere ti lo kota ahon anzapa kue.

³⁸Fade lo yeke voro anzapa so pepe, me lo yeke voro nzapa ti agbagba ti bira, nzapa so akotara ti lo ahinga ni ando pepe. Lo yeke mu na nzapa so lôro, wen ti nginza, atêne ti ngangu ngere na ambeni ye ti ngangu ngere.

³⁹Nzapa so laa ayeke mu maboko na gbia ni ti tiri na azo ti gbata so ngangu gbagba ayeke na tere ni. Azo so ayeda na lo, gbia ni ayeke sara si ala wara gonda. Lo yeke zia ala amakonzi na ndö ti gba ti azo si lo yeke kangbi na ala sese tongana futa ti ala.

⁴⁰‘Na lango ti ndani, gbia ti Mbongo ayeke kiri ti sara bira na lo. Me gbia ti Banga ayeke mu pusu ti bira, na azo ti kpengo na mbarata na amangboko mingi si lo yeke ga na ndö ti lo tongana kota pupu. Lo yeke li na ya ti akodro nde nde; lo yeke li na ya ti mbeni kodro tongana ngu so asuku si amu ndo kue.

⁴¹Lo yeke li na ya ti pendere kodro ni. Kâ, fade azo mingi ayeke kui. Me azo ti kodro ti Edom, ti Moab na akpengba zo ti mara ti Amon laa ayeke kpe na maboko ti lo.

⁴²Lo yeke sara komandema na ndö ti akodro mingi. Ataa kodro ti Ezipte, fade ayeke sigigi na gbe ti lo pepe.

⁴³Aye ti mosoro ti kodro ti Ezipte tongana lôro, wen ti nginza na aye ti ngangu ngere kue, fade lo yeke mu ni titene aga ti lo. Azo ti Libii na ti Etiopii ayeke duti na gbe ti lo.

⁴⁴Me ambeni sango ayeke londo na mbage ti To nga na mbage ti Banga; asango ni ayeke zia kota mbeto na be ti lo. Nilaa ngonzo ti wâ ayeke londo na be ti lo si lo yeke gue ti fâ azo gbani gbani ti hunzi ala kue.

⁴⁵Fade lo yeke zia ada ti lo ti bongo ti gbia na popo ti kota ngu-ingo na hoto so ayeke nde si ayeke nzoni kue si ayeke na pendere kodro. Na ndo so laa lango ti lo ayeke hunzi, me zo oko ayeke mu maboko na lo pepe.’ ”