Read sango Daniel 3 Bible Online

Daniel 3 - sango bible

Daniel 3

¹Gbia Nabukodonosor asara yanda so ayeke na lôro: yongo ni na nduzu ayeke metere baleota, konongo ni ayeke metere ota. Lo zia ni aluti na nduzu na lando ti Dura, na kodro ti Babilone.

²Na pekoni, gbia Nabukodonosor atokua azo ti bongbi amakonzi, akota komanda, agovoronere, awamungo-wango, awabatango-nginza, azo ti ndia, awafango-ngbanga na akota zo ti akete kodro ni kue. A iri ala ti ga na matanga ti vorongo yanda so gbia azia ni aluti na nduzu so.

³Tongaso amakonzi, akota komanda, agovoronere, awamungo-wango, awabatango-nginza, azo ti ndia, awafango-ngbanga na akota zo ti akete kodro ni kue abongbi tere ti ala ti sara matanga ti yanda so gbia azia ni aluti na nduzu so. Ala luti na dawa ti yanda ni.

⁴Zo ti batango bongbi ni adekongo ngangu, atene: “Ala azo kue, azo ti amara nde nde kue na ala, azo ti ayanga ti kodro nde nde kue, ala ma tënë so gbia atene. Lo mu yanga, lo tene:

⁵‘Na ndembe so ala yeke ma toto ti tatalita, ti *ngoli, ti kete kundi na kota kundi, kalangba na amara ti ngoli nde nde, na aye ti sarango na mozoko nde nde, fade ala kuku na sese, ala voro yanda so gbia Nabukodonosor azia ni aluti na nduzu so.

⁶Zo so ake ti kuku ti voro yanda ni, a yeke bi lo biaku na ya ti kota wâ so ayeke za ngangu.’ ”

⁷Na ndö ti tënë so, gi na ndembe so azo ti amara nde nde kue na azo ti ayanga ti kodro nde nde kue ama toto ti tatalita, ti ngoli, ti kete kundi, ti kota kundi na ti kalangba, ala kuku na sese si ala voro yanda ti lôro so gbia Nabukodonosor azia ni aluti na nduzu so.

⁸Kete na pekoni, ambeni zo ti Babilone aga si abi tënë na li ti azuife.

⁹Ala mu tënë si ala tene na gbia Nabukodonosor, atene: “Gbia na nduzu!

¹⁰Gbia, mo wani, mo mu yanga, mo tene: ‘Tongana azo ama toto ti tatalita, ti ngoli, ti kete kundi na ti kota kundi, ti kalangba na amara ti ngoli nde nde, na aye ti sarango na mozoko nde nde, fade azo ni akuku na sese, ala voro yanda ti lôro ni.

¹¹Zo so ake ti kuku ti voro yanda ni, fade a bi lo biaku na ya ti kota wâ so ayeke za ngangu.’

¹²Gbia, ambeni zuife ayeke daa so mo zia ala na li ti akua ti kodro ti Babilone. Azo ni ayeke Shadrak, Meshak na Abed-Nego. Ala ma yanga ti mo pepe: ala ke ti sara na anzapa ti mo, ala ke nga ti voro yanda ti lôro so mo zia ni aluti na nduzu so.”

¹³Tongaso ngonzo ti wâ alondo na be ti Nabukodonosor si lo mu yanga titene ala ga na lo Shadrak, Meshak na Abed-Nego. Azo aga na ala na dawa ti gbia.

¹⁴Gbia ahunda ala, atene: “Mbi ma a tene, ala ke ti sara na anzapa ti mbi si ala ke ti voro yanda ti lôro so mbi zia aluti na nduzu so. So ayeke taa-tënë?

¹⁵Fade ala yeke kiri ti ma toto ti tatalita, ti ngoli, ti kete kundi na ti kota kundi, ti kalangba na mara ti angoli nde nde na aye ti sarango na mozoko nde nde. Ala yeke fadeso nduru ti kuku na sese ti voro yanda ti lôro so mbi sara ni so? Tongana ala ke, fade a yeke bi ala biaku na ya ti kota wâ so ayeke za ngangu. Nzapa wa si ayeke zi ala na maboko ti mbi?”

¹⁶Shadrak, Meshak na Abed-Nego akiri tënë na gbia, atene: “Gbia, e ye ti diko gba ti tënë na ndö ti tënë so na mo pepe.

¹⁷Me ayeke nzoni mo hinga, mo tene, Nzapa ti e so e yeke sara na lo, tongana lo lingbi ti zi e na ya ti kota wâ ni nga na maboko ti mo, fade lo yeke zi e senge.

¹⁸Ataa lo zi e pepe, o gbia, hinga, mo tene, e yeke sara ande na anzapa ti mo pepe; e yeke voro nga yanda ti lôro so mo zia aluti na nduzu so pepe.”

¹⁹Tongaso be ti Nabukodonosor asi na ngonzo ti wâ si le ti lo abe na tere ti Shadrak, Meshak na Abed-Nego. Lo mu yanga titene a sara wâ ni si akiri aza ngangu fani mbarambara, ahon ti so a yeke sara ka lakue.

²⁰Na pekoni, lo mu yanga na akpengba turugu ti lo ti kanga Shadrak, Meshak na Abed-Nego na kamba titene a bi ala na ya ti kota wâ ni.

²¹Hio na pekoni, aturugu akanga akoli ota so na kamba; abongo ti ala kue angba na tere ti ala, ayongoro gere ti bongo, akota bongo na akpoto. Aturugu amu akoli ota so si abi ala na ya ti kota wâ ni.

²²Ndali ti so gbia aluti biani na ndö ti yanga so lo mu, azo asara wâ ni si akiri aza ngangu ahon ti so ala yeke sara lakue. Nilaa aturugu so amu Shadrak, Meshak na Abed-Nego si abi ala na ya ti wâ ni, menga ti wâ ni agbi aturugu ni si ala kui.

²³Ti akoli ota so, Shadrak, Meshak na Abed-Nego, ala ngba na ya ti kamba ni si ala ti taa na be ti wâ ni so ayeke za ngangu so.

²⁴Li ti gbia Nabukodonosor kue akpe si hio, lo londo na nduzu. Lo hunda awamungo-wango ti lo, lo tene: “E kanga akoli ota na kamba si e bi ala na ya ti wâ pepe?” Awamungo-wango ni akiri tënë na lo, atene: “Gbia, tënë ni laa!”

²⁵Gbia akiri atene na ala: “Me mbi baa azo osio so kamba ayeke na tere ti ala pepe, ala yeke tambula taa na be ti wâ; ka oko ayeke na tere ti ala pepe si osio zo ni akpa mbeni nzapa!”

²⁶Na pekoni, Nabukodonosor aga nduru na tere ti yanga ti du ti kota wâ ni si lo dekongo, lo tene: “Shadrak, Meshak na Abed-Nego, azo ti kua ti Nzapa so ayeke na ndö ti aye kue, ala sigigi aga ge!” Tongaso Shadrak, Meshak na Abed-Nego alondo na ya ti wâ ni si ala sigigi.

²⁷Amakonzi, akota komanda, agovoronere na awamungo-wango ti gbia abongbi gbani gbani ti baa akoli ota so; ala baa tere ti ala kpoo: wâ ni andu mbeni ye ti tere ti ala oko pepe, kua ti li ti ala agbi pepe, abongo ti ala agbi nga pepe, tere ti ala afun guru pepe.

²⁸Nabukodonosor amu tënë si atene: “E mu singila na Nzapa ti Shadrak, ti Meshak na ti Abed-Nego! Lo tokua *ange ti lo ti soo azo ti kua ti lo na kuâ. Ala zia be ti ala kue gi na ndö ti lo si ala ke ti ma yanga ti mbi so mbi yeke gbia. Ala yeda ti mu tere ti ala na kuâ, ahon titene ala sara na mbeni nzapa nde si ala voro mbeni nzapa so ayeke Nzapa ti ala pepe.

²⁹Ndani laa, mbi mu yanga fadeso, mbi tene: ‘Zo so ayeke tene sioni tënë ti Nzapa ti Shadrak, ti Meshak na ti Abed-Nego, ataa zo ni ayeke ti mara wa, wala ti yanga ti kodro wa, fade a yeke fâ ya ti zo ni nduru nduru; fade da ti zo ni aga ndo ti azende. Biani, mbeni nzapa nde ti soo zo na kuâ tongaso ayeke daa pepe.’ ”

³⁰Na pekoni, gbia akiri azia Shadrak, Meshak na Abed-Nego na kota ndo ahon ti kozo na kodro ti Babilone.

³¹Gbia Nabukodonosor atokua ndo na azo ti akodro kue, azo ti amara kue na azo ti ayanga ti kodro so kue ayeke na ndö ti sese mobimba, lo tene: “Mbi sambela na ala gba ti siriri!

³²“Mbi baa, ayeke nzoni titene mbi fa na ala aye ti kpene na aye ti dongo be so Nzapa, lo so ayeke na ndö ti aye kue, asara na mbi.

³³Aye ti kpene so lo sara ayeke kota mingi! Aye ti dongo be so lo sara ayeke ngangu! Nzapa ayeke gbia lakue lakue; komandema ti lo angba kpu na kpu!