Read sango Daniel 4 Bible Online

Daniel 4 - sango bible

Daniel 4

¹“Mbi Nabukodonosor, mbi yeke duti ti mbi lani kpoo na ya ti da ti mbi si mbi yeke nzoni na yangbo ti mbi.

²Na mbeni bi, tongana mbi yeke na ndö ti gbogbo ti mbi, mbi baa li ti mbi. Bango-li ni azia mbeto mingi na be ti mbi si be ti mbi angba lakue gi na nduzu ndali ti aye so mbi baa.

³Nilaa mbi mu yanga titene a iri azo ti nganga so kue ayeke na Babilone, aga na ala na le ti mbi titene ala fa na mbi nda ti bango-li ni.

⁴Tongaso azo ti nganga, azo ti mazi, azo ti yoro, na azo kue ti bango nda ti aye aga. So ala ga awe, mbi fa na ala bango-li ti mbi ni, me zo oko na popo ti ala afa na mbi nda ni pepe.

⁵Na pekoni Daniel, so mbeni iri ti lo ayeke Beltasar, aga. Beltasar ayeke iri ti nzapa ti mbi so a mu na lo. Yingo ti anzapa so ayeke nde si ayeke nzoni kue asi Daniel singo. Mbi fa bango-li ni na lo, mbi tene:

⁶‘Beltasar, mo yeke makonzi na li ti azo ti bango nda ti aye kue; mbi hinga, mbi tene, yingo ti anzapa so ayeke nde si ayeke nzoni kue asi mo singo; mbeni ye ti ndima akara mo pepe. Mbi baa li ti mbi, ayeke nzoni mo fa na mbi nda ni.

⁷So mbi ngba ti lango na ndö ti gbogbo ti mbi, mbi baa li ti mbi tongaso: Mbi baa mbeni keke so aluti taa na be ti sese; keke ni ayo na nduzu ahon ndoni.

⁸Keke ni angba ti kono si akpengba: li ni ague ngbii akpo le ti nduzu si azo ti dunia kue alingbi ti baa ni.

⁹Akugbe ni ayeke pendere si ale ni ayeke gbani gbani. Tongaso kobe ayeke daa ndali ti aye kue. Anyama ti ngonda ayeke lango na gbe ni; andeke ti nduzu ayeke sara ada ti ala na tere ti amaboko ni. Aye so kue ayeke na fini ayeke wara kobe gi na lege ti keke ni.

¹⁰‘So mbi ngba ti lango na ndö ti gbogbo ti mbi, mbi kiri mbi baa li ti mbi tongaso: Mbi baa mbeni sanziri, lo so lo yeke nde si lo yeke nzoni kue alondo na yayu azu.

¹¹Lo dekongo ngangu, lo tene: Ala de keke ni na sese, ala fâ amaboko ni. Ala zi akugbe ni; ala kangbi ya ti ale ni kirikiri. Ayeke nzoni anyama so ayeke lango na gbe ti de ni akpe ahon; andeke so asara ada ti ala na tere ti amaboko ni akpe ahon!

¹²Me kota gere ni na agunda ni, ala zia ni angba na ya ti sese. Fade angba na ya ti zingiri ti wen na ti bengba wen; fade angba na popo ti apere ti ngonda. Fade ngu ti pere ayeke mu tere ni kue si lo na anyama ayeke te pere.

¹³Fade a zi hingango ndo ti lo ti zo si a mu na lo mbeni hingango nde so ayeke hingango ndo ti nyama. Fade lo ngba tongaso na ya ti ngu mbarambara.

¹⁴‘Ngbanga so aga na lege ti mbela ti asanziri; tënë so aga na lege ti ndia ti ala so ayeke nde si ayeke nzoni kue; tongaso si aye so kue ayeke na fini ahinga atene, Nzapa so ayeke na yayu kâ na ndö ti aye kue laa ayeke gbia na ndö ti akodro ti azo. Lo laa lo yeke zia zo so be ti lo aye na li ti kodro; lo lingbi nga ti zia mbumbuse zo na li ti kodro ni.

¹⁵‘Bango-li so mbi, gbia Nabukodonosor, mbi baa so laa. Ti mo, Beltasar, mo fa na mbi nda ni, ngbanga ti so azo ti nganga so kue ayeke na kodro ti mbi alingbi ti fa nda ni na mbi pepe. Me mo, mo lingbi ti fa nda ni na mbi, ngbanga ti so yingo ti anzapa so ayeke nde si ayeke nzoni kue ayeke na ya ti mo.’ ”

¹⁶Na ya ti mbeni kete ngoi, mbeto asara Daniel mingi, lo so mbeni iri ti lo ayeke Beltasar so; gbungo-li ti lo ague kirikiri. Tongaso gbia atene na lo, atene: “Gbungo-li ti mo ague kirikiri ndali ti bango-li ni pepe, wala ndali ti nda bango-li ni pepe.” Beltasar akiri tënë: “Gbia, mbi ye fade titene bango-li ni na nda ti bango-li ni aduti ti mo pepe, me aduti ti awato ti mo na ala so ake mo!

¹⁷Mo baa keke so akono si aga ngangu, li ni ague ngbii akpo le ti nduzu si azo ti dunia kue alingbi ti baa ni;

¹⁸akugbe ti keke ni ayeke pendere si ale ni ayeke gbani gbani, kobe ayeke daa ndali ti aye kue. Anyama ti ngonda ayeke lango na gbe ni, andeke ti nduzu asara ada ti ala na tere ti amaboko ni.

¹⁹Gbia, keke so ayeke mo, ngbanga ti so mo ga kota si mo ga ngangu; kota ti mo ni ague ngbii akpo le ti nduzu si ngangu ti mo ti sara komandema asi na nda ti sese kue.

²⁰Na pekoni, mo baa mbeni sanziri, lo so lo yeke nde si lo yeke nzoni kue alondo na yayu azu; lo tene: ‘Ala de keke ni na sese, ala buba ni kue! Me kota gere ni na agunda ni, ala zia ni angba na ya ti sese. Fade ayeke ngba na ya ti zingiri ti wen na ti bengba wen; ayeke ngba na popo ti apere ti ngonda. Fade ngu ti pere ayeke mu tere ni kue si lo na anyama ayeke te pere. Lo yeke ngba tongaso na ya ti ngu mbarambara.’

²¹Gbia, nda ti bango-li ni laa, alingbi na mbela so Nzapa so ayeke na yayu kâ na ndö ti aye kue amu na tere ti mo. Mbela ni ayeke so:

²²Azo ayeke tumba mo na popo ti ala si mo yeke lango na popo ti anyama ti ngonda; a yeke mu na mo gi apere ti te tongana bagara. Fade ngu ti pere ayeke mu tere ti mo kue si mo yeke ngba tongaso na ya ti ngu mbarambara. Mo yeke ngba tongaso ngbii mo hinga, mo tene, Nzapa so ayeke na yayu kâ na ndö ti aye kue laa ayeke gbia na ndö ti kodro ti azo. Lo laa lo yeke zia zo so be ti lo aye na li ti kodro ni.

²³Kota gere ni na agunda ni so angba na ya ti sese aye ti tene: Fade kodro ni ayeke kiri ti ga ti mo gi na ndembe so mo yeke hinga, mo tene, lo so ayeke na yayu si ayeke taa gbia.

²⁴Ndani laa, babâ gbia, ayeke nzoni mo yamba wango ti mbi na nzoni be: mo zia lege ti siokpari ti mo, mo sara ye ti mbirimbiri; mo sara nzoni be na azo ti mawa. Mbi hinga pepe, fade Nzapa ayeke sara si mo ngba ti duti kpoo.”

²⁵Atënë so kue a tene na ndö ti Nabukodonosor asi gi tongana ti so Daniel afa.

²⁶Nze baleoko na use na pekoni, gbia ayeke tambula na ndö ti yangbo ti lo so ayeke na Babilone.

²⁷Lo mu tënë si lo tene: “So Babilone pepe? Kota gbata so mbi sara ni titene aga ndo ti lango ti gbia so! Mbi sara ni na lege ti ngangu ti mbi ti gbia. Mbi sara ni titene azo agonda iri ti mbi.”

²⁸So gbia angba ti tene tënë, mo ye ti baa, mbeni go alondo na yayu, atene: “Gbia Nabukodonosor, mo ma kota tënë so: ‘A kai kua ti mo ti gbia awe!

²⁹Fade azo ayeke tumba mo na popo ti ala. Mo yeke lango na popo ti anyama ti ngonda si mo yeke te gi pere tongana bagara. Mo yeke ngba tongaso na ya ti ngu mbarambara ngbii mo yeke hinga, mo tene, Nzapa so ayeke na yayu kâ na ndö ti aye kue laa ayeke gbia na ndö ti akodro ti azo. Lo laa lo yeke zia zo so be ti lo aye na li ti kodro.’ ”

³⁰Taa gi na ngbonga ni so, tënë so a tene na ndö ti Nabukodonosor aga taa-tënë: azo atumba lo na popo ti ala; lo yeke te pere tongana bagara si ngu ti pere amu tere ti lo kue. Kua ti li ti lo ayo aga tongana kua ti tere ti *ngoalo si anzënë ti maboko ti lo ayo aga tongana ti andeke.

³¹“So ngoi ni so ahon awe, mbi Nabukodonosor, mbi yo le ti mbi na nduzu si ndara ti mbi ti zo akiri daa. Mbi mu singila na Nzapa so ayeke na yayu kâ na ndö ti aye kue, mbi sepela lo si mbi gonda lo so angba lakue lakue: lo yeke gbia lakue lakue, kodro ti lo ayeke ngba kpu na kpu.

³²Lo baa azo ti sese kue na le ti lo tongana ye senge, lo yeke sara ye so be ti lo aye na aye so ayeke na yayu nga na azo ti sese. Ye so lo ye ti sara, zo oko alingbi ti kanga lege ni na lo pepe, wala zo oko ti tene na lo: ‘Nyen laa mo yeke sara so?’, zo ni ayeke daa pepe.

³³“Taa gi na ndembe ni so, hingango ndo ti mbi akiri daa. Titene azo ane mbi tongana gbia, gonda na pendere ti mbi akiri daa; awamungo-wango ti mbi na akota zo so ayeke sara kua na gbe ti mbi akiri na tere ti mbi. A kiri a zia mbi na ndö ti mbata ti gbia tongana ti kozo. Mbi kiri mbi ga kota ahon ti kozo.

³⁴Ndani laa, fadeso mbi Nabukodonosor, mbi sepela, mbi ya iri si mbi gonda gbia so ayeke na yayu! Aye so kue lo yeke sara ayeke na legeni; asarango ye ti lo kue ayeke mbirimbiri. Lo yeke na ngangu ti sara si azo ti baba aga akete zo.”