Read sango Daniel 5 Bible Online

Daniel 5 - sango bible

Daniel 5

¹Mbeni lâ, gbia Baltazar asara kota matanga ti tengo kobe ndali ti akota zo ti lo so wungo ti ala ayeke saki oko si na dawa ti ala, lo nyon samba.

²So lo tara samba ni awe, lo mu yanga titene ala ga na akopo ti lôro na ti wen ti nginza so babâ ti lo Nabukodonosor amu ando na ya ti kota da ti Nzapa so ayeke na Jérusalem. Lo ye ti mu akopo ni titene lo na akota zo ti lo, na awali ti lo so lo ne ala mingi na ala so lo ne ala mingi pepe anyon na samba.

³Tongaso azo aga na akopo ti lôro so ala mu ni na ya ti kota da, so ti tene da-Nzapa ti Jérusalem. Gbia amu akopo ni si lo na akota zo ti lo, na awali ti lo so lo ne ala mingi nga na ala so lo ne ala mingi pepe titene ala anyon na samba.

⁴So ala kue anyon samba ni agbu le ti ala awe, ala londo ti gonda anzapa so a sara ala na lôro na wen ti nginza; ala so a sara ala na bengba wen, na wen, na keke nga na têne.

⁵Taa gi na ndembe ni so, maboko ti zo asigigi nduru na tere ti gere ti alamba. Maboko ni ayeke su mbeti na tere ti vuru dere ti yangbo ti gbia ni. So gbia abaa maboko so ayeke su mbeti ni,

⁶le ti lo aga nde si li ti lo kue akpe; ya ti agere ti lo kue akanga si alikunu ti lo ayeke pika tere.

⁷Lo dekongo ngangu si lo mu yanga titene azo airi azo ti nganga ti Babilone, azo ti mazi, azo ti yoro na azo ti bango nda ti aye ti ga. So azo ti bango nda ti aye ni aga awe, gbia atene na ala, atene: “Zo so ayeke diko mbeti so si lo fa na mbi nda ni, fade a yeke yu na lo bongo ti agbia so abe bengo; a yeke zia na go ti lo ye ti go so ayeke na lôro si lo yeke duti oko ti akota zo ota ti ya ti govoroma ti kodro ni.”

⁸Azo ti nganga ti gbia kue ali na da; me ala ha ti diko mbeti ni gbaa; ala lingbi nga ti fa nda ni na gbia pepe.

⁹Ye ni azia kota mbeto na be ti gbia Baltazar si le ti lo aga nde; be ti akota zo ti lo nga agi ala mingi.

¹⁰Mama ti gbia ama tënë ti ye so gbia na akota zo ti lo atene si lo li na ndo so ala yeke sara matanga ni daa. Lo mu tënë si lo tene: “Gbia na nduzu! Ayeke nzoni be ti mo agi mo pepe, le ti mo aga nga nde pepe!

¹¹Na ya ti kodro ti mo so, mbeni koli ayeke daa so yingo ti anzapa so ayeke nde si ayeke nzoni kue asi lo singo. Lani so babâ ti mo angba gbia, azo abaa lo tongana zo so le ti lo ahan mingi, so ahinga ye mingi si ayeke na ndara tongana anzapa. Ndani laa, babâ ti mo Nabukodonosor azia lo makonzi na li ti azo ti nganga, azo ti yoro, azo ti mazi na azo ti bango nda ti aye.

¹²Azo abaa lo tongana zo so ahinga ndo ahon azo mingi, so ahinga nda ti aye si ayeke na ndara so ayeke nde; lo lingbi ti fa nda ti abango-li, nda ti aye so ahonde na nda ti aye so akara azo. Ala iri Daniel ni aga, lo so gbia adi iri ti lo Beltasar so. Fade lo yeke fa na mo nda ti mbeti so a su na tere ti dere ti da so.”

¹³Tongaso azo ague, aga na Daniel na dawa ti gbia. Gbia ahunda lo, atene: “Mo laa Daniel? Oko ti azuife so gbia, babâ ti mbi agbu ala na sese ti Juda si aga na ala so?

¹⁴Mbi ma a tene, mo yeke zo so yingo ti anzapa asi mo singo; mo hinga ndo mingi, mo hinga ye mingi si mo yeke na ndara so ambeni zo ayeke na ni pepe.

¹⁵Fafadeso, a ga na mbi azo ti ndara na azo ti mazi titene ala diko mbeti so a su na tere ti da so awe. Mbi ye nga fade titene ala fa na mbi nda ni, me ala ha gbaa.

¹⁶Me ti mbi, mbi ma a tene, mo lingbi ti fa nda ti aye so akara azo na nda ti aye so ahonde. Fadeso, tongana mo diko mbeti so si mo fa nda ni na mbi, fade a yeke yu na mo bongo ti agbia so abe bengo; a yeke zia na go ti mo ye ti go so a sara na lôro si mo yeke duti oko ti akota zo ota ti ya ti govoroma ti kodro ni.”

¹⁷Daniel akiri tënë na gbia, atene: “Gbia, ayeke nzoni mo bata akadoo ni ndali ti mo wani, wala mo lingbi ti mu ni na mbeni zo nde. Ti mbi, mbi yeke diko mbeti ni si mbi yeke fa nda ni na mo.

¹⁸Babâ gbia, Nzapa so ayeke na ndö ti aye kue asara si babâ ti mo Nabukodonosor aga ando kota gbia, azo agonda lo mingi si ane lo na taa nengo ti gbia.

¹⁹Ndali ti so Nzapa asara si lo ga kota zo mingi, azo kue, azo ti amara nde nde kue na azo ti ayanga ti kodro nde nde kue ayeke do na mbeto na le ti lo. Lo yeke fâ zo so be ti lo aye si lo yeke zia zo so be ti lo aye ti ngba na fini; lo yeke zia na kota ndo zo so be ti lo aye si lo yeke zia na kete ndo zo so be ti lo aye.

²⁰Me na pekoni, pikango kate ahon ndö ti lo si lo baa tere ti lo kota ahon azo kue. Tongaso Nzapa azi lo na ndö ti mbata ti gbia si azo akiri ane lo pepe.

²¹Azo atumba lo na popo ti ala, be ti lo ti zo aga tongana ti nyama si lo yeke lango gi na popo ti alele ti ngonda; lo yeke te gi apere tongana bagara si ngu ti pere amu tere ti lo kue. Lo ngba tongaso ngbii asi na lango so lo yeda atene, Nzapa so ayeke na ndö ti aye kue laa ayeke gbia na ndö ti akodro ti azo, lo laa lo yeke zia zo so be ti lo aye na li ti kodro.

²²Ti mo Baltazar, molenge ti lo, mo hinga aye so kue, me mo ke ti sara tere ti mo kete.

²³Mo londo ti ke Nzapa so ayeke na yayu: azo ague, amu aye ti da ti lo aga na ni si mo na akota zo ti mo, na awali ti mo so mo ne ala mingi nga na ala so mo ne ala mingi pepe, ala tuku samba na ya ni, ala nyon. Na pekoni, mo gonda anzapa so a sara na wen ti nginza na lôro, ala so a sara na bengba wen, na wen, na keke nga na têne. Anzapa ni ayeke baa ndo pepe, ala yeke ma tënë pepe si ala hinga ye pepe. Me mo ke ti gonda Nzapa so pupu ti ya ti mo ayeke na maboko ti lo si lo yeke bata tambula ti mo.

²⁴Tongaso Nzapa atokua mbeni maboko ti su mbeti so mo baa so.

²⁵A su mbeti ni tongaso: MENE, MENE, TEKEL na PARSIN.

²⁶Nda ni ayeke tongaso: MENE aye ti tene a diko ni awe: Nzapa adiko ngu ti mo ti dutingo gbia si lo kai ni awe;

²⁷TEKEL aye ti tene a baa nengo ni awe: a zia mo na ndö ti kilo ti baa nengo ti mo, me mo ne pepe;

²⁸PARSIN aye ti tene ya ni akangbi awe: ya ti kodro ti mo akangbi awe, a mu ni na azo ti Medii na ti Perse.”

²⁹Biaku na pekoni, Baltazar amu yanga na azo ti gbe ti lo titene ala yu Daniel na bongo ti gbia so abe bengo; ala zia na go ti lo ye ti go so ayeke na lôro. Lo mu yanga titene ala to mbela ti tene na azo atene, fade a yeke zia Daniel ti duti oko ti akota zo ota ti ya ti govoroma ti kodro ni.

³⁰Gi na bi ni, azo afâ Baltazar, gbia ti Babilone.