Read sango Daniel 7 Bible Online

Daniel 7 - sango bible

Daniel 7

¹Na ya ti kozo ngu so Baltazar ayeke gbia ti Babilone, Daniel abaa li ti lo na ndembe so lo ngba ti lango na ndö ti gbogbo ti lo. Na ya ti bango-li ni, aye aga na li ti lo si lo baa ni na ya ti mbeni ye tongana bango-li. Na pekoni lo su ni na mbeti si lo fa gi amama ti tënë ni.

²Lo tene: “Na bi, na ya ti mbeni ye so mbi baa tongana bango-li, mbi baa pupu so alondo na ndangoro osio ti le ti nduzu si ayingi le ti kota ngu-ingo ngangu mingi.

³Akota nyama osio so akono sioni sioni, ala londo na ya ti kota ngu-ingo ni asigigi; anyama ni ayeke nde nde.

⁴Kozo nyama ni ayeke tongana bamara, me akpangi ti lo ayeke tongana ti *ngoalo. So mbi ngba ti baa ndo, andaa a zi akpangi ti lo ni awe; a yo lo na nduzu na ndö ti sese, lo luti na ndö ti gere ti lo tongana zo si a mu na lo hingango ndo ti zo.

⁵Use nyama ni ayeke tongana *urse. Lo mu tere ti lo na nduzu si lo luti mbage oko; abio ota ti kate ayeke na yanga ti lo, na popo ti apembe ti lo. A mu yanga na lo, atene: ‘Londo, mo te akasa mingi!’

⁶Na pekoni mbi baa ndo, mbi baa mbeni nyama so ayeke tongana ze. Akpangi osio ayeke na ndö ti peko ti lo tongana ti ndeke. Li ti lo ayeke osio si a mu na lo ngangu ti sara komandema.

⁷Na pekoni mbi baa ndo, mbi baa na bi na ya ti mbeni ye tongana bango-li osio nyama ni. Lo yeke mu mbeto mingi na zo, lo yeke taa sioni sioni; ngangu ti lo ahon ndoni. Lo yeke na akota pembe ti wen so lo yeke te na ye, lo yeke suru na ya ti aye kete kete. Aye so lo yeke te ni pepe, lo yeke do na gere ti lo. Lo yeke ti lo nde na akozo nyama ota so; lo yeke na didi baleoko.

⁸So mbi ngba ti gbu li ti mbi na ndö ti adidi ni, mo ye ti baa, mbeni fini didi so ayeke kete ato nda ti sigigi na popo ti adidi ni. Na dawa ti kete didi ni, a gboto didi ota ti akozo didi ni. Le ti fini didi ni ayeke daa tongana ti zo si yanga ni ayeke daa so ayeke tene gba ti atënë ti baba.

⁹“So mbi ngba ti baa ndo, a zia ambata ti gbia si mbeni mbakoro aga aduti na ndö ti mbeni oko: bongo ti lo avuru tongana tukia; kua ti li ti lo avuru tongana kua ti tere ti taba so zende oko ayeke daa pepe. Mbata ti lo aza tongana menga ti wâ; agere ti mbata ni ayeke tongana wâ so aza mingi.

¹⁰Mbeni wâ asigigi na dawa ti mbakoro ni si ayeke sua tongana ngu. Azo saki saki ayeke sara na lo si ambeni kutu mingi aluti na dawa ti lo. Awafango-ngbanga aduti si ala zi abuku.

¹¹“Mbi ngba ti baa ndo ndali ti gba ti atënë ti baba so didi ni ayeke tene so. So mbi ngba ti baa ndo, a fâ osio nyama ni si a bi kuâ ti lo na ya ti wâ so aza ngangu si kuâ ni agbi kue.

¹²A zi komandema na maboko ti tanga ti anyama ni, me asara si ala lingbi ti ngba na fini na ya ti mbeni ngoi so a diko ndali ti ala.

¹³“Mbi ngba ti baa aye so na bi tongana bango-li: mbi baa mbeni ye so akpa zo; zo ni alondo na ya ti mbinda, azu. Lo ga nduru na tere ti mbakoro ni si a mu lo, a gue na lo na dawa ti mbakoro ni.

¹⁴A mu na lo ngangu ti sara komandema, a mu na lo gonda si a mu lo gbia. Tongaso amara nde nde na azo ti ayanga ti kodro nde nde kue asara kua na lo. Ngangu ti lo ti sara komandema angba lakue lakue, fade ayeke hunzi pepe. Mbeni ye ti buba lengo-gbia ti lo ayeke daa laoko pepe.

¹⁵“Mbi Daniel, be ti mbi afun kue ndali ti abango-li so; aye so mbi baa azia mbeto mingi na be ti mbi.

¹⁶Mbi ga nduru na tere ti mbeni zo oko so ayeke na ndo so. Mbi hunda lo titene lo fa na mbi mbirimbiri nda ti ye so mbi baa. Tongaso lo fa na mbi nda ni, lo tene:

¹⁷‘Akota nyama osio so ayeke agbia osio so ayeke londo ande na sese.

¹⁸Me a yeke mu kodro ni na azo so Nzapa asoro ala; Nzapa so ayeke na yayu kâ na ndö ti aye kue so; fade kodro ni ayeke ngba ti ala lakue lakue, kpu na kpu.’

¹⁹Na pekoni, mbi ye ti hinga tënë mbirimbiri na ndö ti osio nyama ni so lo yeke ti lo nde na tanga ti anyama ni so; lo yeke zia mbeto mingi na be ti zo. Apembe ti lo ayeke na wen si anzënë ti gere ti lo ayeke na bengba wen. Lo yeke te ye, lo suru ya ni kete kete si atanga ni lo yeke do na gere ti lo.

²⁰Mbi ye nga ti hinga tënë mbirimbiri na ndö ti adidi baleoko so ayeke na li ti nyama ni so, na mbeni so ayeke sigigi si adidi ota ati na dawa ni so: ale ti didi ni ayeke daa si yanga ni ayeke daa so ayeke tene gba ti atënë ti baba. Azo abaa didi ni kota ahon atanga ni.

²¹Mbi ngba ti baa ndo, mbi baa didi ni ayeke sara bira na azo so Nzapa asoro ala si lo yeke nduru ti kinda ala na ya ti bira ni.

²²Me mbakoro ni aga si lo fâ ngbanga ti azo so Nzapa asoro ala na legeni; Nzapa so ayeke na yayu kâ na ndö ti aye kue so. So ndembe ni alingbi awe, a mu na azo ni kodro ni titene aga ti ala.

²³“Zo so mbi hunda lo so atene na mbi tongaso: ‘Osio nyama ni ayeke osio kodro so ayeke duti ande na ndö ti sese; kodro ni ayeke ti lo nde na atanga ni kue. Fade kodro ni ayeke te aye so kue ayeke na ndö ti sese, lo yeke do ye kue na gere si lo yeke suru ya ni kete kete.

²⁴Adidi baleoko so ayeke agbia baleoko so ayeke duti oko na oko na li ti kodro ni. Na peko ti ala, mbeni gbia baleoko na oko ni ayeke londo; fade lo yeke nde na agbia ti kozoni so. Lo yeke kinda agbia ota;

²⁵lo yeke tene asioni tënë na tere ti Nzapa so ayeke na yayu kâ na ndö ti aye kue si lo yeke sara ngangu na azo so Nzapa asoro ala. Lo yeke leke na be ti lo ti sanze alango ti nze nga na andia ti azo ti Nzapa. Fade a yeke zia azo ti Nzapa na maboko ti gbia ni na ya ti ngu ota na ndambo.

²⁶Na pekoni, awafango-ngbanga ayeke duti ti fâ ngbanga na li ti lo si ala yeke zi komandema na maboko ti lo. Fade a yeke fâ lo si komandema ti lo ni ayeke mingo biani biani.

²⁷Kodro, komandema na dutingo na kota ndo na ya ti akodro nde nde so ayeke na ndö ti sese, fade a mu ni na azo so Nzapa asoro ala; Nzapa so ayeke na yayu kâ na ndö ti aye kue so. Komandema ti azo ti Nzapa ayeke ngba lakue lakue; fade angangu kue ti dunia ayeke ma yanga ti ala si ayeke sara kua na ala.’

²⁸“Tënë ni ahunzi na ndo so. Me ti mbi Daniel, be ti mbi agi mbi mingi, mbi woko kue si mbi ngba ti gbu li ti mbi daa.”