Read sango Daniel 8 Bible Online

Daniel 8 - sango bible

Daniel 8

¹“Na ya ti ota ngu so Baltazar ayeke gbia, mbi Daniel, mbi kiri mbi baa mbeni ye na ya ti mbeni ye tongana bango-li na peko ti so mbi baa kozo so.

²Ye so mbi baa na ya ti mbeni ye tongana bango-li ayeke tongaso: Mbi baa tere ti mbi tongana mbi yeke na yanga ti ngu so iri ni Ulai, na Suze, li-kodro ni so ngangu gbagba ayeke na tere ni si ayeke na sese ti Elam.

³Mbi yo le ti mbi na nduzu, mbi baa mbeni koli-taba so aluti na yanga ti ngu ni. Lo yeke na ayongoro didi use; me didi so asigigi na peko ayo ahon ti so asigigi kozo so.

⁴Mbi baa koli-taba ni ayeke pika ye na didi ti lo na mbage ti Do, na mbage ti Banga nga na mbage ti Mbongo. Mbeni nyama so alingbi ti gbu le ni na lo ayeke daa pepe; mbeni zo so alingbi ti zi zo na maboko ti lo ayeke daa pepe. Koli-taba ni ayeke sara gi ye so be ti lo aye si lo yeke kono lakue.

⁵“So mbi ngba ti gbu li ti mbi na ndö ti ye so mbi baa, mbi baa mbeni koli-ngasa alondo na mbage ti Do, aga. Lo yeke tambula na ndö ti sese kue, me gere ti lo andu sese pepe. Koli-ngasa ni ayeke na mbeni didi so ayeke pika le ti zo si ayeke na popo ti ale ti lo.

⁶Lo si na tere ti koli-taba so ayeke na didi use, lo so mbi baa lo si lo yeke luti na yanga ti ngu so. Koli-ngasa ni akpe loro, ati na ndö ti koli-taba ni na ngangu ti lo kue.

⁷Mbi baa lo ga nduru na tere ti koli-taba ni; ngonzo alondo na be ti lo tongana wâ na tere ti lo. Lo pika koli-taba ni si lo fâ adidi ti lo use so. Me koli-taba ni ayeke na ngangu pepe ti gbu le ni na koli-ngasa ni. Lo bi lo na sese, lo do lo si zo oko so alingbi ti zi koli-taba ni na gbe ti koli-ngasa ni ayeke daa pepe.

⁸Koli-ngasa ni akono mingi. Me so ngangu ti lo ahon ndoni awe, kota didi ti lo ni afâ si akota didi osio asigigi na ndo ni; ala sigigi na ndangoro osio ti le ti nduzu.

⁹“Na ya ti oko ti adidi osio so, mbeni kete didi asigigi daa si aga kota mingi na mbage ti Mbongo, na mbage ti To nga na mbage ti pendere kodro.

¹⁰Kete didi ni aga kota ngbii asi na ndo so aturugu ti yayu ayeke daa. Lo kinda ambeni turugu ni na ambeni tongoro ni na sese si lo do ala na gbe ti gere ti lo.

¹¹Didi ni asara nga bira na makonzi ti aturugu ti yayu ni; didi ni akanga lege ti *sandaga so azo ayeke mu na ya ti lango oko oko na makonzi ni; lo sara si ndo so a zia ni nde ndali ti makonzi ni aga sioni.

¹²Ndali ti sioni sarango ye so, a zia aturugu ti yayu ni legeoko na sandaga so ayeke mu na ya ti lango oko oko na maboko ti didi ni. Mbirimbiri lege ti vorongo Nzapa, didi ni abuba ni kue. Ye so kue didi ni ayeke sara aga nzoni na lo.

¹³“Tongaso, mbi ma mbeni ange so ayeke tene tënë. Mbeni ange nde ahunda lo ti kozoni so, atene: ‘Aye so azo abaa na ya ti mbeni ye tongana bango-li so ayeke ninga ngbii asi lawa? A yeke zia lege ti mungo sandaga so a yeke mu na ya ti lango oko oko so ngbii asi lawa? Sioni sarango ye ti bubango ndo so ayeke ninga ngbii asi lawa? A yeke ngba ti do na gere ndo so a zia ni nde ndali ti Nzapa ngbii asi lawa? A yeke ngba ti do na gere aturugu ti yayu ngbii asi lawa?’

¹⁴Kozo ange ni akiri tënë na lo: ‘Alingbi lakui na ndaperere saki use na ngbangbo ota ahon si. Na pekoni, fade a yeke sara titene ndo so a zia ni nde ndali ti Nzapa akiri aga tongana ti kozo.’ ”

¹⁵“So mbi Daniel, mbi ngba ti baa ye so na ya ti mbeni ye tongana bango-li si mbi ye ti hinga nda ni, mbeni zo so akpa koli aga aluti na le ti mbi.

¹⁶Mbi ma mbeni go so alondo na mbage ti ngu ti Ulai; go ni adekongo, atene: ‘Gabriel, ye so zo so abaa tongana bango-li so, ayeke nzoni mo fa nda ni na lo.’

¹⁷Gabriel aga na tere ti mbi na ndo so mbi yeke daa so. Mbeto agbu mbi mingi tongana lo yeke ga nduru na mbi. Mbi ti mbi kpo li ti mbi na sese. Me lo tene na mbi, lo tene: ‘Daniel, mo yeke gi senge zo. Ayeke nzoni mo hinga, mo tene, ye so mo baa na ya ti mbeni ye tongana bango-li so abaa tënë ti lango ti ndani.’

¹⁸So Gabriel angba ti tene tënë na mbi, le ti mbi ayeke gi na sese si mbi hon na ndö ti yingo ti mbi. Lo ndu mbi si lo yo mbi na nduzu na ndo so mbi yeke daa.

¹⁹Na pekoni, lo tene na mbi: ‘Mbi ye ti fa na mo ye so ayeke si ande na lango ti ndani, lango so ngonzo ti Nzapa ayeke hunzi na ni, ngbanga ti so a fa lango so ye kue ayeke hunzi na ni awe.

²⁰Koli-taba so mo baa lo si lo yeke na didi use so ayeke agbia ti Medii na ti Perse.

²¹Koli-ngasa ni ayeke gbia ti kodro ti Grese; kota didi so ayeke na popo ti ale ti lo ayeke kozo gbia ni laa

²²Kota didi ni afâ si adidi osio asigigi na ndo ni: so ayeke agbia osio so ayeke londo na ya ti kodro ni, me ngangu ti ala ayeke lingbi na ti kozo gbia ni pepe.

²³Lango ti ala ti dutingo gbia ayeke hunzi si azo ayeke sara siokpari ngbii ahon ndoni. Na pekoni mbeni gbia ayeke londo ande so be ti lo ayeke sioni mingi; zo ti hinga lege ti handango azo tongana lo ayeke daa pepe.

²⁴Ngangu ti lo ayeke gue ande gi na nduzu, me ngangu ni alondo na lo wani pepe. Lo yeke buba aye sioni; ye so kue lo yeke sara ayeke ga nzoni na lo. Ataa azo ti ngangu na azo so Nzapa asoro ala, lo yeke fâ ala, lo hunzi ala kue.

²⁵Ndali ti so lo yeke na mayere mingi, lo yeke wara lege ti handa azo. Ndali ti baba so asi be ti lo singo, lo yeke fâ gba ti azo so aduti si ala hinga atene, mbeni sioni ye ayeke ga na ndö ti ala pepe so. Lo yeke londo ti sara bira na Makonzi ti amakonzi. Na ndembe ni so, fade a yeke fâ lo, me zo laa ayeke fâ lo pepe.

²⁶Ye so mo baa na ya ti mbeni ye tongana bango-li na ndö ti asandaga ti lakui na ti ndaperere si a tene tënë ni so ayeke taa-tënë. Me ti mo, ayeke nzoni mo honde ye so mo baa so hondengo, ngbanga ti so ye so a tene ni so, lango ni ade yongoro.’

²⁷Tongaso, mbi Daniel, mbi woko kue si mbi ti na kobela aninga lango kete. Na pekoni, so tere ti mbi akai awe, mbi kiri na kua so gbia amu na mbi. Mbeto asara mbi mingi ndali ti ye so mbi baa na ya ti mbeni ye tongana bango-li so, ngbanga ti so mbi ma ya ni pepe.”