Read sango Osée 11 Bible Online

Osée 11 - sango bible

Osée 11

¹*KOTA GBIA atene: “So Israel ade ando maseka, mbi ye lo, mbi iri molenge ti mbi ti koli titene lo sigigi na kodro ti Ezipte.

²Me na pekoni, so mbi yeke iri ala, ala yeke hon gi hongo yongoro na tere ti mbi. Ala mu *sandaga na anzapa *Baal, ala zö dukani na ayanda.

³Andaa mbi laa mbi fa lege ti tambula na Efraim, mbi gbu maboko ti lo; me lo hinga pepe lo tene, mbi yeke bata lo.

⁴Mbi fa lege na lo na nzoni be, na lege ti kamba ti yengo tere. Mbi sara na lo tongana zo so ayo kete molenge ti lo aga na lo nduru na tere ti ngbangba ti lo; mbi yeke mu kobe ti tengo ni na Efraim.

⁵“Fade azo ti Israel ayeke kiri na sese ti Ezipte pepe, me azo ti Asirii laa ayeke ga gbia ti ala, ngbanga ti so azo ti Israel ake ti kiri na mbage ti mbi.

⁶Ndani laa, fade bira ayeke londo ngangu na ya ti agbata ti ala, bira ni ayeke kungbi angbongboro wen so ala kanga na ayanga ti agbata ni; bira ni ayeke buba asioni ye so azo ni aleke na be ti ala ti sarango ni.

⁷Azo ti mbi aleke be ti ala ti ke mbi biani biani; a iri ala titene ala londo na nduzu, me zo oko na popo ti ala alondo pepe.

⁸“Efraim, mbi lingbi ti sara na mo tongana nyen? Israel, mbi lingbi ti ka mo tongana nyen? Mbi lingbi ti sara na mo ye so mbi sara ando na agbata ti Adma na ti Seboim so tongana nyen? Be ti mbi ado si mawa ti mo agbu be ti mbi mingi.

⁹Fade mbi yeke sara ye na lege ti sioni ngonzo ti mbi pepe, mbi yeke kiri ti ga ti buba Efraim pepe, ngbanga ti so mbi yeke zo pepe, me mbi yeke ti mbi Nzapa. Na ndo ti mo Efraim, mbi yeke nde si mbi yeke nzoni kue; fade mbi yeke kiri ti ga na lege ti sioni ngonzo pepe.”

¹⁰Azo so a gbu ala ague na ala na kodro wande, fade ala yeke tambula na peko ti KOTA GBIA. Fade lo yeke toto tongana bamara; tongana lo yeke toto, fade amolenge ti lo ayeke londo na mbage ti Do ti ga na dongo tere.

¹¹Ala yeke londo na Ezipte ti ga na dongo tere tongana akete ndeke; ala yeke londo na Asirii ti ga tongana ambipa. “Fade mbi yeke sara titene ala lango na ya ti kodro ti ala”; so tënë ti yanga ti KOTA GBIA laa.